Marko 11 - Papiamentu Bible 2013

Hesus ta drenta Herusalèm

¹ Ora Hesus ku su disipelnan a yega den bisindario di Herusalèm, banda di e siudatnan Betfage i Betania, serka di Seru di Oleifi, El a manda dos disipel bai dilanti.

² El a bisa nan: ‘Bai e pueblo boso dilanti. Asina boso yega aya, boso lo haña un yu di buriku mará ei ku nunka niun hende no a kore ariba ainda. Lòs e i tres'é aki.

³ Si un hende puntra pakiko boso ta hasi asina, bis'é ku Señor mester di e buriku i ku E ta mand'é bèk umbe.’

⁴ Ora nan a bai, nan a haña un yu di buriku mará na porta di un kas, pafó riba kaminda i nan a lòs e.

⁵ Algun hende ku tabata ei banda a puntra nan: ‘Ta kiko esaki ta? Pakiko boso ta lòs e buriku?’

⁶ E dos disipelnan a kontestá manera Hesus a siña nan i e hendenan a laga nan bai.

⁷ E disipelnan a hiba e buriku pa Hesus, pone nan paña riba e buriku i Hesus a subi sinta.

⁸ Hopi hende a habri nan paña pone abou riba kaminda, otro a pone taki yen di blachi abou, ku nan a kita den mondi.

⁹ Tantu esnan ku tabata bai dilanti di Hesus, komo esnan ku tabata sigui su tras, tabata grita: ‘Hosana! Bendishoná ta esun ku ta bini den nòmber di Señor!

¹⁰ Bendishoná ta reino di nos tata David ku ta bini! Hosana den altura!’

¹¹ Hesus a drenta Herusalèm i despues di a mira tur kos den tèmpel, El a bai Betania huntu ku e diesdos disipelnan, pasobra a bira lat kaba.

Hesus ta maldishoná un palu di figo

¹² Su manisé ora nan a bini for di Betania, Hesus a haña hamber.

¹³ Leu aya, El a mira un palu di figo tur na blachi i El a hala mas serka pa E mira si no tabatin nada di kome na e palu. Ma ta blachi so El a haña na e palu, ya ku no tabata tempu di figo ainda.

¹⁴ E ora ei Hesus a maldishoná e palu bisando: ‘Nunka mas niun hende lo haña fruta pa kome for di bo!’ Su disipelnan a tende loke El a bisa.

Tèmpel ta kas di Dios

¹⁵ Ora nan a yega Herusalèm, Hesus a bai den tèmpel i kuminsá kore ku e bendedónan i e kumpradónan ku tabata eiden. El a bòltu mesa di e kambiadónan di plaka i stul di e bendedónan di palomba

¹⁶ i E no tabata pèrmití niun hende karga kos di bende dor di tèmpel.

¹⁷ El a splika nan: ‘No ta skibí den Skritura ku Dios a bisa: Mi kas lo yama kas di orashon pa tur nashon pagano? Ma boso a hasié un kueba di bandidu.’

¹⁸ E saserdotenan importante i e dòktornan di lei a tend'É i nan tabata buska un manera pa mat'É; nan tabatin miedu di djE, pasobra tur e hendenan tabata loko ku su siñansa.

¹⁹ Ora a bira anochi, Hesus ku su disipelnan a bandoná e siudat.

E palu di figo a seka

²⁰ Mainta trempan, ora nan tabata pasa banda di e palu di figo, nan a mira ku e palu a para seka kompletamente.

²¹ Pedro a kòrda kiko a pasa i el a bisa Hesus: ‘Ata…Maestro! E palu di figo ku Bo a maldishoná, a seka!’

²² Hesus a bisa nan: ‘Konfia den Dios.

²³ Mi ta sigurá boso: ken ku bisa e seru akí: “Hisa bo mes benta den laman” i e no tin duda den su kurason ku loke e bisa ta pasa, esei lo pasa tambe!

²⁴ P'esei Mi ta bisa boso: Tur loke boso resa pidi p'e, kere ku boso a hañ'é kaba, boso lo hañ'é tambe.

²⁵ I ora boso para resa, pordoná esun ku boso tin algu kontra dje pa asina boso Tata den shelu pordoná boso faltanan.’ [

²⁶ Ma si boso no pordoná, boso Tata den shelu tampoko lo pordoná boso faltanan.]

Nan ta kuestioná Hesus su outoridat

²⁷ Hesus ku su disipelnan a bolbe bai Herusalèm. Miéntras Hesus tabata kana den tèmpel, e saserdotenan importante, e dòktornan di lei i e ansianonan a aserk'É

²⁸ i puntr'É: ‘Ku ki outoridat bo ta hasi e kosnan ku bo ta hasi? Ta ken a duna bo outoridat pa hasi e kosnan akí?’

²⁹ Hesus a kontestá nan: ‘Mi ta djis hasi boso ún pregunta; si boso kontest'é, Mi ta bisa boso ku ki outoridat Mi ta hasi e kosnan akí.

³⁰ Bisa Mi: Huan su outoridat pa batisá hende, ta di Dios e ta bini òf di hende?’

³¹ Nan a konsultá ku otro bisa: ‘Si nos bisa “di Dios”, E ta puntra nos pakiko nos no a kere Huan.

³² Ma bisa “di hende” antó?’ Nan tabatin miedu di e multitut, pasobra tur e hendenan tabata aseptá Huan komo un profeta.

³³ E ora ei nan a bisa Hesus: ‘Nos no sa.’ Hesus a kontestá nan: ‘Awèl, Mi tampoko no ta bisa boso ku ki outoridat Mi ta hasi e kosnan akí.’