Lukas 4 - Papiamentu Bible 2013

Hesus ta vense tentashon

¹ Hesus a regresá for di Yordan, yená ku Spiritu Santu, ku a gui'É hiba desierto.

² Ei diabel a purba lag'É kai den tentashon durante kuarenta dia largu. E no a kome nada durante e dianan ei i na final El a haña hamber.

³ Diabel a bini serka djE i bis'É: ‘Si Bo ta Yu di Dios, bisa e piedra ei bira pan!’

⁴ Hesus a kontest'é: ‘Skritura ta bisa: Hende no ta keda na bida di pan so.’

⁵ Diabel a subi bai ariba kunÉ i mustr'É tur e reinonan di mundu den un frega di wowo.

⁶ El a bisa Hesus: ‘Lo mi duna Bo tur poder i rikesa di e reinonan akí, pasobra a entregá nan na mi i mi por duna ken ku mi ke nan.

⁷ Ke men si Bo hinka rudia pa mi i adorá mi, tur e kosnan akí lo bira di Bo.’

⁸ Hesus a kontest'é: ‘Skritura ta bisa: Señor, bo Dios, so bo mester adorá i t'E so bo mester sirbi.’

⁹ Despues diabel a bai Herusalèm kunÉ i a pon'É riba e punta di mas altu di tèmpel. El a bisa Hesus: ‘Si Bo ta Yu di Dios, bula abou for di aki,

¹⁰ pasobra Skritura ta bisa tòg ku: Lo E duna su angelnan òrdu pa nan protegé bo,

¹¹ i tambe: Riba nan man nan lo karga bo, pa bo no dal bo pia kontra piedra.’

¹² Hesus a kontest'é: ‘Skritura ta bisa tambe: No pone Señor bo Dios na prueba.’

¹³ Ora diabel a kaba di purba tur manera pa lag'É kai den tentashon, el a bai lag'É pa un tempu.

Hesus ta kuminsá prediká

¹⁴ Hesus a regresá Galilea yená ku poder di Spiritu Santu. Su fama a plama den henter e bisindario ei.

¹⁵ E tabata siña e hendenan den nan snoa i nan tur tabata gab'É.

Nan ta rechasá Hesus na Nazarèt

¹⁶ Hesus a bai Nazarèt, kaminda El a lanta komo mucha, i riba sabat El a bishitá snoa manera kustumber. El a lanta para pa E lesa Skritura.

¹⁷ Nan a dun'É e ròl di buki di profeta Isaías pa lesa. Hesus a habri e ròl di buki i a haña e troso ku ta bisa:

¹⁸ ‘Spiritu di Señor ta riba Mi, p'esei El a ungi Mi pa anunsiá e bon notisia na pobernan. El a manda Mi proklamá libertat pa prezunan; bista pa siegunan; i pa esnan oprimí, libertat.

¹⁹ Mi mester anunsiá e era di Señor su grasia.’

²⁰ Hesus a lora e ròl ser'é bèk, dun'é na e asistente di snoa i kai sinta. Tur hende den snoa a keda ku nan bista fihá riba djE.

²¹ E ora ei El a kuminsá papia ku nan; El a bisa: ‘Awe e palabranan ku boso a tende, a keda kumplí.’

²² Tur hende a ekspresá ku nan tabata di akuerdo kunÉ; nan a keda asombrá di tende e palabranan bunita ku Hesus tabata papia i nan a bisa: ‘N' ta Hesus, yu di Hosé, esei ta?’

²³ Hesus a deklará: ‘Sigur boso lo bisa Mi: “Dòkter, kura bo mes antó!” Tambe boso lo bisa: “Nos a tende tur e kosnan ku Bo a hasi na Kafárnao, hasi e kosnan ei aki den bo mes pueblo, no!” ’

²⁴ El a sigui bisa nan: ‘Mi ta sigurá boso: Ningun profeta no ta bonbiní den su mes siudat.

²⁵ Mi ta bisa boso: Enberdat tabatin hopi biuda na Israel den tempu di Elías, tempu áwaseru a stòp di kai pa tres aña i mei i un hamber grandi a plama rònt pais.

²⁶ Tòg no a manda Elías serka niun di nan, ma serka un biuda di e pueblo Sarfat na Sidon.

²⁷ Tambe tabatin hopi leproso na Israel tempu di profeta Eliseo. Niun di nan no a kura, ta e sirio Naaman sí a haña su kura.’

²⁸ Ora nan a tende loke Hesus a kaba di bisa, e hendenan den snoa a bira furioso.

²⁹ Nan a bula lanta kohe Hesus tene, sak'É fo'i siudat i hib'É riba kabes di e seru, kaminda a traha nan siudat. Nan ker a bent'É for di e subida,

³⁰ ma Hesus a kana pasa meimei di e multitut, bai.

Hesus ta saka mal spiritu for di un hòmber

³¹ Hesus a bai Kafárnao, un siudat na Galilea, kaminda E tabata siña e hendenan riba sabat.

³² Nan a keda babuká di su manera di siña, pasobra E tabata papia ku outoridat.

³³ Tabatin den snoa un hòmber ku tabatin mal spiritu den dje. El a kuminsá grita:

³⁴ ‘Ei, ta kiko Bo ke di nos, Hesus di Nazarèt? Akaso Bo a bini pa kaba ku nos? Mi sa bon bon ta ken Bo ta; Bo ta e Santu di Dios!’

³⁵ E ora ei Hesus a skual e spiritu i El a orden'é: ‘Keda ketu i sali for di e hòmber ei!’ E spiritu a hisa e hòmber benta meimei di e snoa i a sali for di e hòmber sin hasié niun daño.

³⁶ Tur hende a keda asombrá i un tabata puntra otro: ‘Ta ki e palabranan ei? E hòmber akí ta komandá mal spiritu ku poder i outoridat i nan ta sali bai tambe!’

³⁷ E notisia tokante Hesus a plama tur kaminda den bisindario.

Hesus ta kura hopi hende

³⁸ Hesus a sali for di snoa i a bai kas di Simon. Suegra di Simon tabatin keintura hopi altu i nan a pidi Hesus yud'é.

³⁹ Hesus a bùig riba dje, skual e keintura i e keintura a baha. Mesora e suegra a lanta i a kuminsá sirbi nan.

⁴⁰ Anochi, ora solo a baha, tur hende a trese nan hende malunan, ku tur sorto di malesa, serka Hesus. E tabata pone man riba kada un di nan i kura nan.

⁴¹ For di hopi hende demoño tabata sali; nan tabata grita: ‘Abo ta Yu di Dios!’ Hesus tabata skual e demoñonan; E no tabata laga nan papia, pasobra nan tabata sa ku E tabata e Mesias.

Hesus ta biaha rònt pa prediká

⁴² Ora di dia a habri, Hesus a sali for di e siudat ei i bai un lugá solitario. E multitut tabata busk'É i ora nan a hañ'É, nan no ker a lag'É bai.

⁴³ El a bisa nan: ‘Mi mester prediká e bon notisia tokante reino di Dios den e otro pueblonan tambe, p'esei a manda Mi!’

⁴⁴ I Hesus tabata prediká den e snoanan di Hudea.