Lukas 3 - Papiamentu Bible 2013

Huan Boutista ta prediká

¹ Den e di diessinku aña ku Tiberio tabata emperador, Ponsio Pilato tabata gobernador di Hudea, Heródes tabata gobernador di Galilea, su ruman Filipo tabata na kabes di e distrito Iturea i Tragonitis, i Lisonia tabata na kabes di Abilene.

² Anas i Kaifas tabata gransaserdote. Den e tempu ei Dios a papia ku Huan, yu di Zakarías, den desierto.

³ El a pasa prediká den henter e region rònt di Yordan. E tabata bisa e hendenan ku nan mester kombertí i batisá pa Dios pordoná nan pikánan.

⁴ Manera ta skibí den Isaías su buki di profesia: Un hende ta grita den desierto: Prepará kaminda pa Señor, hasi kaminda korkobá règt pa E pasa.

⁵ Tur vaye lo ta yená, kada seru i seritu bahá. Lo hasi kaminda korkobá règt i lo paria tereno ku no ta kore pareu.

⁶ Tur hende lo mira e salbashon, ku ta bini di Dios.

⁷ Huan a bisa e gran kantidat di hende ku tabata bin batisá serka dje: ‘Rasa di kolebra, ken a atvertí pa hui pa e huisio benidero di Dios?

⁸ Mihó boso produsí fruta adekuá pa mustra boso kombershon. No bisa otro: “Nos ta desendiente di Abraham”, pasobra laga ami bisa boso: Dios por traha desendiente pa Abraham for di e piedranan akibou.

⁹ Ya a pone machete kla na tronkon di e palunan, pa kòrta tur palu ku no karga bon fruta i tira nan afó den kandela.’

¹⁰ E hendenan a puntra Huan: ‘Kiko nos tin ku hasi anto?’

¹¹ Huan a kontestá: ‘Esun ku tin dos paña, kompartí ku un ku no tin nada. Esun ku tin di kome, hasi meskos.’

¹² E kobradónan di belasting tambe a bini serka dje pa batisá i a puntr'é: ‘Maestro, kiko nos mester hasi?’

¹³ El a bisa nan: ‘No kobra mas di loke ta stipulá pa boso.’

¹⁴ E sòldánan tambe a puntr'é: ‘Anto nos, kiko nos mester hasi?’ El a kontestá nan: ‘No chika plaka saka for di niun hende, ni bou di preteksto falsu, ma sea satisfecho ku boso pago!’

¹⁵ E pueblo tabata biba den gran ekspektativa i tur hende tabata puntra nan mes si ta Huan tabata e Mesias.

¹⁶ Ma Huan a duna nan tur e kontesta akí: ‘Ami ta batisá boso ku awa, ma Esun ku ta bini ta mas poderoso ku mi. Mi no ta sirbi ni pa lòs stribu di su sandalia. É lo batisá boso den Spiritu Santu i kandela.

¹⁷ E tin e zefta pa bencha trigo kla den su man i lo E limpia su plenchi di bati trigo. Lo E warda e trigo den su mangasina, ma e bagas E ta kima den un kandela ku no ta kaba nunka!’

¹⁸ Asin'akí i na hopi otro forma, Huan tabata prediká e bon notisia seriamente pa e hendenan.

¹⁹ Ma ora el a skual gobernante Heródes tokante e asuntu di Heródias, kasá di Heródes su mes ruman, i tambe tokante tur su sobrá malisianan,

²⁰ Heródes, pa koroná obra, a hinka Huan den prizòn.

Boutismo di Hesus

²¹ Ora Huan tabata batisá tur hende, Hesus tambe a lag'é batis'É. Durante Hesus su orashon, shelu a habri

²² i Spiritu Santu a baha riba djE den forma físiko di un palomba. A zona un stèm for di shelu: ‘Abo ta Mi Yu stimá; Bo ta legria di mi kurason.’

E antepasadonan di Hesus

²³ Hesus tabatin mas o ménos trinta aña tempu ku El a kuminsá ku su aktividatnan. Segun e hendenan, E tabata yu di Hosé; Hosé tabata yu di Eli;

²⁴ Eli tabata yu di Matat; Matat tabata yu di Levi; Levi tabata yu di Melki; Melki tabata yu di Yanai; Yanai tabata yu di Hosé;

²⁵ Hosé tabata yu di Matatías; Matatías tabata yu di Amos; Amos tabata yu di Nahum; Nahum tabata yu di Hesli; Hesli tabata yu di Nagai;

²⁶ Nagai tabata yu di Maat; Maat tabata yu di Matatías; Matatías tabata yu di Semein; Semein tabata yu di Yosek; Yosek tabata yu di Yoda;

²⁷ Yoda tabata yu di Yoanan; Yoanan tabata yu di Resa; Resa tabata yu di Zerubabel; Zerubabel tabata yu di Shealtiel; Shealtiel tabata yu di Neri;

²⁸ Neri tabata yu di Melki; Melki tabata yu di Adi; Adi tabata yu di Kosam; Kosam tabata yu di Elmadan; Elmadan tabata yu di Er;

²⁹ Er tabata yu di Yozue; Yozue tabata yu di Eliezer; Eliezer tabata yu di Yorim; Yorim tabata yu di Matat; Matat tabata yu di Levi;

³⁰ Levi tabata yu di Simeon; Simeon tabata yu di Huda; Huda tabata yu di Yosef; Yosef tabata yu di Yonam; Yonam tabata yu di Elyakim;

³¹ Elyakim tabata yu di Melea; Melea tabata yu di Mena; Mena tabata yu di Matata; Matata tabata yu di Natan; Natan tabata yu di David;

³² David tabata yu di Ishai; Ishai tabata yu di Obed; Obed tabata yu di Boaz; Boaz tabata yu di Salma; Salma tabata yu di Nagshon;

³³ Nagshon tabata yu di Aminadab; Aminadab tabata yu di Admin; Admin tabata yu di Arni; Arni tabata yu di Hèsron; Hèsron tabata yu di Pèrès; Pèrès tabata yu di Huda;

³⁴ Huda tabata yu di Yakob; Yakob tabata yu di Isak; Isak tabata yu di Abraham; Abraham tabata yu di Tèrag; Tèrag tabata yu di Nahor;

³⁵ Nahor tabata yu di Serug; Serug tabata yu di Reú; Reú tabata yu di Pèlèg; Pèlèg tabata yu di Ebèr; Ebèr tabata yu di Shèlag;

³⁶ Shèlag tabata yu di Kenan; Kenan tabata yu di Arpakshad; Arpakshad tabata yu di Sèm; Sèm tabata yu di Noe; Noe tabata yu di Lamèk;

³⁷ Lamèk tabata yu di Metusalem; Metusalem tabata yu di Henok; Henok tabata yu Yèrèd; Yèrèd tabata yu di Mahalalel; Mahalalel tabata yu di Kenan;

³⁸ Kenan tabata yu di Enosh; Enosh tabata yu di Sèt; Sèt tabata yu di Adam; i Adam tabata yu di Dios.