Lukas 20 - Papiamentu Bible 2013

Nan ta kuestioná Hesus su outoridat

¹ Un dia ku Hesus tabata siña hende den tèmpel i anunsiá e bon notisia, e saserdotenan importante i e dòktornan di lei a aserk'É huntu ku e ansianonan.

² Nan a puntr'É: ‘Ku ki outoridat bo ta hasi e kosnan akí? Ta ken a duna bo e outoridat ei?’

³ Hesus a kontestá nan: ‘Mi tambe tin un pregunta pa hasi boso. Bisa Mi:

⁴ Huan su outoridat pa batisá hende, ta di shelu e ta bini òf di hende?’

⁵ Nan a konsultá ku otro i bisa: ‘Si nos bisa “di shelu”, E ta puntra nos pakiko nos no a kere Huan antó.

⁶ Ma si nos bisa “di hende”, henter e multitut akí ta piedra nos, pasobra nan ta konvensí ku Huan ta un profeta.’

⁷ Nan a kontestá Hesus: ‘Nos no sa di unda Huan su outoridat ta bini.’

⁸ E ora ei Hesus a bisa nan: ‘Awèl, Mi tampoko no ta bisa boso ku ki outoridat Mi ta hasi e kosnan akí.’

Parábola di e hürdónan mal hende

⁹ Hesus a kuminsá konta e pueblo e siguiente parábola: ‘Un dia tabatin un hòmber ku a planta un hòfi di wendrùif. Despues el a hür e hòfi ku algun kunukero i sali di biahe, pa un tempu largu.

¹⁰ Ora tabata tempu di kosecha, el a manda un kriá bai tuma su parti serka e kunukeronan. Sinembargo nan a kohe e kriá, dun'é un hala di sota i mand'é bai man bashí.

¹¹ E doño a bolbe manda un kriá serka nan, esun akí tambe nan a bati, maltrat'é i mand'é bai man bashí.

¹² E doño a manda un di tres kriá. Esun akí tambe nan a heridá i a kore kuné despues.

¹³ Doño di e hòfi a pensa den su mes: “Kiko mi tin ku hasi? Mi ta manda mi yu stimá, por ta e sí nan ta respetá.”

¹⁴ Ma ora e kunukeronan a mir'é, nan a bisa otro: “Esun akí ta e heredero! Ban kaba kuné, ya nos ta haña su herensia!”

¹⁵ Nan a sak'é for di e hòfi i mat'é. Kiko e doño di e hòfi lo hasi ku e kunukeronan ei awor?

¹⁶ E mes lo bin kaba ku nan i pasa su hòfi pa otro hürdó.’ Ora e hendenan a tende loke Hesus a bisa, nan a rospond'É: ‘Dios libra!’

¹⁷ Ma Hesus a mira nan i bisa: ‘Kiko e siguiente Skritura ta nifiká anto: E piedra ku e trahadónan a rechasá, a bira piedra prinsipal.

¹⁸ Ken ku kai riba e piedra ei, lo plèchè; i ken ku e piedra kai riba dje, lo keda garná.’

¹⁹ E saserdotenan importante i e dòktornan di lei tabata ker a kohe Hesus prezu e momento ei mes, pasobra nan tabata sa ku e komparashon tabata trata di nan. Pero nan tabatin miedu di e pueblo.

Dios òf emperador?

²⁰ Nan a ten'É bon na bista i a manda algun spiòn ku mester a hunga ròl di hende honesto, djis pa nan kohe Hesus den trampa ku su mes palabranan. Asina nan lo a haña oportunidat pa entregá Hesus den man di e gobernadó romano, ku tabatin poder i outoridat.

²¹ E hendenan akí a puntra Hesus: ‘Maestro, nos sa ku loke bo ta siña hende ta hustu. Bo no ta tuma parti pa hende, ma bo ta siña hende segun bèrdat kon Dios ke pa nan biba.

²² Bisa nos: ta korekto pa paga belasting na emperador di Roma òf nò?’

²³ Ma Hesus a mira nan astusia; p'esei El a kontestá:

²⁴ ‘Mustra Mi un moneda. Ken su nòmber i imágen ta riba dje?’ Nan a kontestá: ‘Di emperador.’

²⁵ E ora ei Hesus a bisa nan: ‘Wèl, duna emperador loke ta di emperador i duna Dios loke ta di Dios anto.’

²⁶ Nan no por a kohe Hesus den trampa dilanti di pueblo ku niun pia di palabra; nan a keda asombrá di tende su kontesta i a keda ketu.

Un pregunta tokante resurekshon

²⁷ Algun saduseo, esta e hendenan ku tabata nenga ku hende por lanta for di morto, a bin interogá Hesus di e siguiente forma:

²⁸ ‘Maestro, Moises a skibi e lei akí pa nos: “Si un hòmber muri bai laga su kasá sin yu, e ruman hòmber di e defuntu mester tuma e biuda pa kasá pa asina duna yu na su ruman ku a muri.”

²⁹ Awor, tabatin shete ruman hòmber. E mayó a kasa i muri bai sin laga yu atras.

³⁰ Esun di dos

³¹ i despues esun di tres a kasa ku e biuda; pero a pasa meskos ku nan tambe. Asina a sigui pasa ku tur e shete rumannan. Nan tur a muri, sin laga yu atras.

³² Por último e muhé mes a muri bai.

³³ Awor riba dia di resurekshon, ta kasá di ken e muhé ta? Pasobra e tabata kasá ku nan tur tòg?’

³⁴ Hesus a kontestá: ‘Hòmber i muhé di e mundu akí ta kasa i ta tuma otro pa kasá.

³⁵ Ma esnan ku ta digno di tuma parti den e mundu benidero i di lanta for di morto, no ta kasa ni lo no laga nan kasa.

³⁶ Nan lo no muri mas, pasobra nan lo ta manera angel. Nan lo ta yu di Dios, pasobra nan a lanta for di morto.

³⁷ Moises tambe a mustra bon kla ku e mortonan lo resusitá. Den e parti tokante e mata na kandela, e ta papia di Señor komo Dios di Abraham, Dios di Isak i Dios di Yakob.

³⁸ Dios no ta Dios di mortonan sino di bibunan, pasobra pa Dios tur hende ta bibu.’

³⁹ Algun dòktor di lei a bisa Hesus: ‘Bon bisá, Maestro!’

⁴⁰ Pasobra nan no tabata tribi puntra Hesus nada mas.

David i Mesias

⁴¹ E ora ei Hesus a puntra nan: ‘Ta kon por bisa ku Mesias ta yu di David?

⁴² Pasobra David mes ta bisa den e buki di Salmo: “Señor Dios a bisa mi Señor: Sinta na mi man drechi,

⁴³ te ora Mi pone bo enemigunan manera un banki pa bo pone bo pia.”

⁴⁴ Awor si David mes ta yam'É Señor, ta kon e Mesias por ta yu di David?’

Hesus ta bisa pa tene kuidou ku e dòktornan di lei

⁴⁵ Miéntras henter e pueblo tabata skuch'É, Hesus a bisa su disipelnan:

⁴⁶ ‘Tene kuidou ku e dòktornan di lei ku gusta kana rònt den paña largu i laga hende kumindá nan ku rèspèt riba plasa. Nan ta buska e mihó lugánan pa sinta den snoa i na fiesta, e lugánan di honor.

⁴⁷ Nan ta hòrta propiedat di biuda; i nan ta hasi orashon largu djis pa bista di hende. Ma nan sentensia lo ta hopi mas pisá!’