Lukas 2 - Papiamentu Bible 2013

Nasementu di Hesus

¹ Den e tempu ei emperador Augusto a duna òrdu pa tene un senso den henter su imperio.

² E promé senso akí a tuma lugá tempu ku Quirinio tabata gobernador di Siria.

³ Tur hende a bai skibi nòmber, kada ken den su mes siudat.

⁴ Komo Hosé tabata desendiente di David, e mester a sali for di Nazarèt na Galilea pa bai skibi nòmber na Betlehèm, e siudat di David na Hudea.

⁵ El a bai huntu ku Maria, ku kende e tabata komprometé pa kasa; Maria tabata na estado.

⁶ Miéntras nan tabata aya, e ora a yega pa Maria duna lus.

⁷ Maria a haña su promé yu, un yu hòmber. El a lor'é den paña i pon'é den un pesebre, pasobra no tabatin lugá pa nan den posada.

E wardadónan i e angelnan

⁸ Den bisindario di Betlehèm tabatin algun wardadó di karné ku tabata pasa anochi den kunuku pa wak nan karnénan.

⁹ Un angel di Señor a aparesé na nan i splendor di gloria di Señor a rondoná nan. Nan a spanta mashá!

¹⁰ E angel a bisa nan: ‘No spanta, pasobra mi a bin duna boso un bon notisia. E notisia akí lo hasi henter pueblo mashá kontentu.

¹¹ Awe boso Salbador, e Mesias, Señor, a nase den e siudat di David.

¹² Esaki ta e señal pa boso sa, ku mi ta papia bèrdat: boso lo topa un yu lorá den paña, drumí den un pesebre.’

¹³ Diripiente un ehérsito grandi di angel for di shelu a aparesé banda di e angel. Nan tabata alabá Dios bisando:

¹⁴ ‘Gloria na Dios den altura i pas na mundu pa e hendenan ku ta agradá Dios.’

¹⁵ Ora e angelnan a bai shelu bèk, e wardadónan a bisa otro: ‘Ban Betlehèm antó, pa nos mira loke a pasa, loke Señor a anunsiá na nos.’

¹⁶ Nan a bai lihé i a haña Maria, Hosé i e yu. E yu tabata drumí den un pesebre.

¹⁷ Ora nan a mir'É, nan a konta loke e angel a bisa nan di djE.

¹⁸ Tur hende ku a tende loke e wardadónan a konta, a keda asombrá.

¹⁹ Maria a warda tur loke e angel a bisa den su kurason i a meditá riba dje.

²⁰ Ora e wardadónan a bai bèk, nan a glorifiká i alabá Dios pa tur loke nan a tende i mira; tur kos a sosodé manera e angel a bisa nan.

²¹ Riba e di ocho dia, ora e momento pa sirkunsidá e yu a yega, nan a yam'É Hesus, e nòmber ku e angel a dun'É promé ku su mama sali na estado di djE.

Presentashon di Hesus den tèmpel

²² E momento a yega pa nan purifiká nan mes di akuerdo ku lei di Moises. Hosé i Maria a hiba Hesus Herusalèm pa ofres'É na Señor.

²³ Esaki tabata kuadra ku loke lei di Señor ta bisa: ‘Tur promé yu hòmber mester ta dediká na Señor.’

²⁴ Tambe nan a bai ofresé un sakrifisio di purifikashon ku segun lei di Moises, ta ‘dos tòrteldùif òf dos pichon’.

²⁵ Den e tempu ei tabatin un sierto hòmber, yamá Simeon, ta biba na Herusalèm. E tabata un hende hustu i deboto, ku tabata warda riba esun yamá ‘konsuelo di Israel’. Spiritu Santu tabata kuné.

²⁶ Spiritu Santu a revel'é ku lo e no muri promé ku e mira e Mesias ku Señor a primintí.

²⁷ Guiá pa Spiritu Santu el a drenta tèmpel. Ora e mayornan di e yu Hesus a drenta tèmpel kunÉ pa nan hasi loke lei ta eksigí en relashon ku su nasementu,

²⁸ Simeon a tuma e yu den su brasa i a alabá Dios bisando:

²⁹ ‘Awor Bo por laga bo kriá bai na pas, Señor, di akuerdo ku bo promesa.

³⁰ Pasobra ku mi mes wowo mi a mira e salbashon,

³¹ ku bo a prepará den bista di tur pueblo;

³² e lus ku lo trese revelashon pa e paganonan, i gloria pa Israel, bo pueblo.’

³³ Su mama i tata a keda asombrá di tende loke Simeon a bisa tokante e yu.

³⁴ Simeon a bendishoná nan i bisa Maria, su mama: ‘E mucha akí ta destiná pa pone hopi hende na Israel kai i hopi otro lanta. Lo E sirbi komo un señal kontroversial.

³⁵ Pa asin'ei pensamentu di hopi hende sali na kla. I abo lo sufri doló komo si fuera un spada ta traspasá bo kurason.’

³⁶ Tambe tabatin un sierto profeta Hana, yu di Fanuel, di tribu Asher. E tabata di edat hopi avansá. Shete aña so el a biba ku su kasá den su hubentut;

³⁷ anto awor e tabata un biuda pa 84 aña kaba. Nunka e no tabata sali for di tèmpel, ma e tabata sirbi Dios di dia i anochi, ku orashon i ayuno.

³⁸ Awor Hana tambe a yega na e momento ei i el a yama Dios danki pa loke a sosodé. Despues el a konta tur hende, ku tabata anhelá pa Dios liberá Herusalèm, di e yu.

Regreso pa Nazarèt

³⁹ Despues ku nan a hasi tur kos nesesario pa kumpli ku lei, nan a bai nan pueblo Nazarèt, na Galilea, bèk.

⁴⁰ E yu a krese i a bira dia pa dia mas fuerte, yená ku sabiduria; grasia di Dios tabata kunÉ.

Hesus komo mucha den tèmpel

⁴¹ Mayornan di Hesus tabatin kustumber di bai Herusalèm tur aña pa selebrá fiesta di Pésag.

⁴² Tempu E tabatin diesdos aña nan a bolbe bai Herusalèm, di akuerdo ku nan kustumber.

⁴³ Ora e dianan di fiesta a pasa i su mayornan tabata na kaminda pa bai kas bèk, e mucha hòmber Hesus a keda Herusalèm sin nan sa.

⁴⁴ Nan a suponé ku Hesus tabata huntu ku e otro kompañeronan di biahe i nan a sigui biaha henter un dia. Despues nan a bai busk'É serka nan famia i konosínan.

⁴⁵ Komo nan no por a hañ'É, nan a bira bèk bai busk'É na Herusalèm.

⁴⁶ Riba di tres dia nan a bin hañ'É den tèmpel, sintá meimei di e maestronan di lei. E tabata skucha nan i hasi nan sierto pregunta.

⁴⁷ Tur ku tabata skuch'É, a keda babuká di su konosementu i di tende su kontestanan.

⁴⁸ Ora su mayornan a mir'É, nan a keda asombrá i su mama a bis'É: ‘Mi yu, ta kiko e kos ku bo a hasi ku nos akí? Ami ku bo tata a buska Bo tur anshá.’

⁴⁹ Hesus a bisa nan: ‘Pakiko boso a buska Mi? Boso no sa ku ta den kas di mi Tata Mi mester ta?’

⁵⁰ Ma nan no a komprondé loke El a bisa nan.

⁵¹ Hesus a bai Nazarèt bèk ku nan i E tabata obedesidu na nan. Su mama a warda tur e kosnan akí den su kurason.

⁵² Hesus a bira grandi i a krese tambe den sabiduria; E tabata bon mirá tantu serka Dios komo serka hende.