Lukas 14 - Papiamentu Bible 2013

Hesus ta kura un hòmber ku dewater

¹ Un sabat Hesus a bai kome na kas di un lider di fariseo; nan tabata ten'É bon na bista.

² Diripiente un hòmber ku dewater a bin para su dilanti.

³ E ora ei Hesus a puntra e ekspertonan di lei i e fariseonan: ‘Ta pèrmití pa kura un hende riba sabat òf nò?’

⁴ Ma nan a keda ketu. Hesus a tene e hòmber su man, kur'é i lag'é bai.

⁵ E ora ei El a bisa nan: ‘Kua di boso lo no saka su yu hòmber òf su bue mesora fo'i pos, maske e kai aden riba sabat?’

⁶ Nan no por a bisa nada.

Lugá di honor

⁷ Ora Hesus a mira kon e invitadonan tabata buska pa sinta na lugá di honor, El a duna nan un komparashon:

⁸ ‘Ora nan kombidá bo na un kasamentu, no bai sinta na e lugá di honor. Podisé esun ku a kombidá bo, tin un otro invitado mas importante ku bo.

⁹ Anto e ora ei lo e bini serka bo i bisa: “Lanta bo duna e hende akí bo lugá.” Yen di bèrgwensa, bo mester bai sinta patras e ora ei.

¹⁰ Mihó, ora nan kombidá bo, bo bai sinta patras. E anfitrion lo bini serka bo i bisa bo: “Amigu, hala bo bin sinta mas dilanti.” Den bista di esnan sintá na mesa huntu ku bo esei lo ta un honor.

¹¹ Pasobra tur hende ku alsa su mes, lo ta humiliá, ma esun ku humiliá su mes, lo ta alsá!’

¹² Tambe Hesus a bisa esun ku a kombid'É: ‘Ora bo tene un fiesta di komementu mèrdia òf anochi, no kombidá bo amigu, ruman, famia, òf bo bisiñanan ku tin plaka. Pasobra nan na nan turno tambe lo kombidá bo, pa hasi algu bèk pa bo.

¹³ Ora bo tene fiesta, mihó bo kombidá hende pober, mankaron, koho i siegu.

¹⁴ Lo ta un legria pa bo ku nan no por hasi nada bèk. Pasobra lo bo haña bo rekompensa dia e hustunan lanta fo'i morto.’

Parábola di e fiesta di kasamentu

¹⁵ Ora un di esnan ku tabata na mesa a tende kiko Hesus a bisa, el a bis'É: ‘Ki legria ta pa un hende por kome den reino di Dios!’

¹⁶ Hesus a bis'é: ‘Un dia un hende a tene un gran komementu, kaminda el a kombidá hopi hende.

¹⁷ Ora ku e momento a yega pa kuminsá ku e bankete, el a manda su kriá bisa e invitadonan: “Bini numa, tur kos ta kla.”

¹⁸ Ma tur e invitadonan a kuminsá diskulpá nan mes. Un di: “Mi a kumpra un kunuku i mi tin ku bai wak e urgentemente; por fabor despensá mi.”

¹⁹ Un otro a bisa: “Mi a kumpra sinku par di bue i mi ta na kaminda pa tèst nan. Por fabor, despensá mi.”

²⁰ Un otro a bisa: “Mi a kaba di kasa i p'esei mi no por bini.”

²¹ Ora e kriá a yega kas, e kriá a pone su shon na altura di tur kos. E shon a rabia; el a bisa e kriá: “Hasi lihé! Drenta kayanan i hanchinan di siudat i trese hende pober, mankaron, siegu i koho aki den.”

²² Despues di un ratu e kriá a bisa su shon: “Señor, a kumpli ku bo òrdu, ma tòg a sobra lugá!”

²³ E shon a bis'é: “Subi kaminda grandi, bai den kunuku i insistí pa e hendenan drenta paden, pa mi kas por yena.

²⁴ Pasobra mi ta sigurá boso: niun di e hendenan ku mi a invitá promé, lo no purba nada di mi bankete!” ’

Kuantu ta kosta pa ta Hesus su disipel

²⁵ Un multitut grandi di hende tabata kana Hesus su tras. El a bira kara mira nan i bisa:

²⁶ ‘Esun ku bini serka Mi, mester distansiá su mes di su mama i tata, su kasá i su yunan, su ruman hòmber i ruman muhé; asta di su mes bida. Sino e no por ta mi disipel!

²⁷ E mester karga su krus i sigui Mi, sino e no por ta mi disipel.

²⁸ Si un di boso ke traha un toren, e n' ta sinta promé pa konta kuantu sèn e ta salié i wak si e por kab'é?

²⁹ Pasobra si e pone e fundeshi so, sin kaba e trabou, tur hende ku mir'é ta harié!

³⁰ Nan lo bisa: “E hòmber a kuminsá un trabou, sin por a kab'é.”

³¹ Òf si un rei sali bai bringa kontra un otro rei, e n' ta sinta konsultá promé si e ta sufisientemente fuerte ku su dies mil hòmber, pa enfrentá esun ku ta bini riba dje ku binti mil hòmber?

³² Si e mira ku no por, e ta manda un representante ora esun aya ta leu ainda, pa informá kua ta e kondishonnan pa sera pas.

³³ Asin'ei boso kada un mester entregá tur loke boso ta poseé, sino boso no por ta mi disipel.

³⁴ Enberdat, salu ta un kos útil. Ma si salu mes pèrdè smak, ta ku kiko ta dun'é stansha atrobe?

³⁵ E ora ei e salu no ta sirbi ni pa tira riba tera ni den mèst; mester tir'é afó. Esun ku tin orea, tende!’