Levítiko 8 - Papiamentu Bible 2013

Konsagrashon di Aaron i su yunan

¹ SEÑOR a bisa Moises:

² ‘Laga yama Aaron i su yu hòmbernan i bai ku nan na entrada di tènt di enkuentro; bai tambe ku e pañanan saserdotal, e zeta pa konsagrá saserdote, e toro pa e sakrifisio pa pordon di piká, dos chubatu di karné i un makutu ku pan sin is.

³ Yama henter e komunidat tambe huntu einan.’

⁴ Moises a hasi manera SEÑOR a orden'é: el a reuní e israelitanan na entrada di tènt

⁵ i bisa nan: ‘Loke nos ta bai hasi awor, ta òrdu di Dios.’

⁶ El a laga Aaron i su yunan bini dilanti i a laga nan tuma un baño ritual.

⁷ Despues el a bisti Aaron un toga saserdotal i a mara un faha na su sintura. Riba e toga el a bisti Aaron un túnika saserdotal i eiriba e frèskòt saserdotal, ku el a mara ku su mes sintanan patras.

⁸ Kaba el a mara e pechero riba Aaron su pechu i den dje el a pone e Urim i e Tumim, e ophetonan pa tira lòt.

⁹ Despues el a pone e tùlbant riba Aaron su kabes i a pega e plachi di oro den forma di un flor, señal di su konsagrashon, dilanti riba e tùlbant, manera SEÑOR a orden'é.

¹⁰ Ora Moises a kaba el a kohe e zeta di konsagrashon i hunta e tènt sagrado i tur loke tabatin aden; asina el a konsagrá tur kos na SEÑOR.

¹¹ Ku e mesun zeta el a sprengu e altá i tur loke tabata pertenesé n'e, tambe e palangana ku e pedestal, shete bia pa konsagrá nan na SEÑOR.

¹² Despues Moises a basha zeta riba kabes di Aaron i a konsagr'é saserdote.

¹³ El a pidi e yunan di Aaron tambe bini dilanti i a bisti nan tambe un toga saserdotal, mara un faha na nan sintura, i pone un tùlbant simpel riba nan kabes, manera SEÑOR a orden'é.

¹⁴ Kaba el a laga nan trese e toro ku tabata destiná pa sakrifisio pa haña pordon di piká, dilanti. Aaron i su yunan a pone man riba kabes di e bestia.

¹⁵ Moises a mata e toro, kohe su sanger i a hunt'é ku su dede na e kachunan ku tin na e kuater skinanan di e altá, pa purifik'é di e manchanan di piká ku el a pega kuné. E sanger sobrá el a basha na pia di altá. Asina el a konsagrá e altá pa purifik'é di e pikánan ku el a pega kuné.

¹⁶ Despues Moises a kohe tur e sebu ku ta tapa e mondongo di tur banda, e klòmpi di sebu ku tin na e higra i e dos nirnan ku e sebu pegá na nan i el a kima tur riba altá.

¹⁷ Sobrá di e toro, esta e kueru, e karni i e tripanan ku nan sushi, el a kima pafó di e kampamentu manera SEÑOR a orden'é.

¹⁸ Despues el a laga nan trese e chubatu di karné ku tabata destiná pa sakrifisio di kandela. Aaron i su yunan a pone man riba kabes di e bestia.

¹⁹ Moises a mata e karné i a sprengu e sanger tur banda di e altá.

²⁰ El a kap e bestia na pida pida i a kima e karni huntu ku e kabes i e partinan ku sebu.

²¹ Despues el a laba e mondongo i e patanan di patras ku awa i a kima nan tambe riba altá huntu ku sobrá di e bestia. Manera SEÑOR a ordená, el a hasié un sakrifisio di kandela, un sakrifisio di kuminda ku un holó agradabel pa SEÑOR.

²² Ora el a kaba, el a laga nan trese e otro chubatu ku tabata destiná pa sakrifisio di konsagrashon. Aaron i su yunan a pone man riba kabes di e bestia.

²³ Moises a mata e bestia i a hunta un tiki sanger na e parti abou di orea drechi, na e dùim drechi i na e tenchi grandi di Aaron su pia drechi.

²⁴ Despues el a laga e yunan di Aaron tambe bini dilanti i a hunta sanger na e parti abou di nan orea drechi, na nan dùim drechi i nan tenchi grandi di pia drechi. Ora el a kaba, el a sprengu e sobrá sanger tur banda di e altá.

²⁵ El a kohe e partinan ku sebu di e bestia, esta e rabu, tur e sebu ku ta tapa e mondongo, e klòmpi di sebu na e higra, e dos nirnan ku e sebu pegá na nan i e parti ariba di e pia di patras na banda drechi.

²⁶ For di den e makutu ku pan sin is, ku nan a pone dilanti di santuario, el a kohe un arepa diki sin is, un arepa plat huntá ku zeta i un arepa di hariña fini; el a pone nan riba tur e sebu i e pida pata.

²⁷ Despues el a pone tur e kosnan akí den man di Aaron i su yunan, el a laga nan hisa nan na altu, komo un rito di presentashon pa ofresé nan na SEÑOR i a duna e saserdote nan bèk den nòmber di SEÑOR.

²⁸ Ora nan a kaba Moises a tuma e ofrenda for di nan i a kim'é riba altá, riba e sakrifisio di kandela. Asina el a hasié un sakrifisio di konsagrashon, un sakrifisio di kuminda ku holó agradabel pa SEÑOR.

²⁹ El a kohe pechu di e bestia den su man i a present'é na SEÑOR ku e rito di presentashon i despues el a duna e saserdote e bèk den nòmber di SEÑOR. E parti akí di e ofrenda tabata p'e, manera SEÑOR a orden'é.

³⁰ Despues di esei el a kohe un tiki di e zeta sagrado i un tiki di e sanger ku tabatin riba altá i a sprengu riba Aaron i su pañanan, kaba el a sprengu riba e yunan i nan pañanan. Asina Moises a apartá Aaron i su yunan i nan pañanan pa sirbishi di Dios.

³¹ El a bisa Aaron i su yunan: ‘Kushiná karni di e di dos karné na entrada di tènt di enkuentro i kom'é aya boso mes ku e arepa sin is, ku ainda tin den e makutu di ofrenda, manera mi a ordená.

³² Ora boso kaba di kome, tira sobrá karni i arepa den kandela.

³³ Keda shete dia na entrada di tènt di enkuentro. No bai for di ei promé ku shete dia pasa, pasobra asina tantu boso konsagrashon ta dura.

³⁴ SEÑOR mes a ordená pa sigui hasi e shete dianan akí manera nos a hasi awe pa drecha tur kos atrobe entre boso ku Dios.

³⁵ Keda shete dia i shete anochi na entrada di tènt di enkuentro. Obedesé SEÑOR su òrdunan pa boso no muri. Asina SEÑOR a ordená mi.’

³⁶ Aaron i su yunan a hasi tur kos manera SEÑOR a ordená pa medio di Moises.