Levítiko 7 - Papiamentu Bible 2013

Sakrifisio di debe

¹ Aki ta sigui instrukshon pa sakrifisio di debe: ta trata di un sakrifisio mashá sagrado.

² Kaminda ta mata e bestia pa sakrifisio di kandela, ei mes ta mata esun ku un hende ke ofresé komo sakrifisio di debe; despues mester sprengu su sanger tur banda di e altá

³ i ofresé SEÑOR e partinan ku sebu: esta e rabu, e sebu ku ta tapa e mondongo di tur banda,

⁴ e dos nirnan i e sebu ku tin pegá na e nirnan i na e hepnan. Enkuanto e klòmpi di sebu na e higra mester kita esei huntu ku e nirnan.

⁵ E saserdote ta kima tur e sebu ei riba altá komo un sakrifisio di kuminda na SEÑOR. Asina e ta un sakrifisio di debe.

⁶ Solamente e hòmbernan di e famianan saserdotal por kome for di e karni di ofrenda; mester kom'é na un lugá sagrado, pasobra ta un kos mashá sagrado.

⁷ Loke ta konta pa e sakrifisio pa pordon di piká ta konta tambe pa e sakrifisio di debe; e instrukshonnan pa tur dos ta meskos. E karni ta pa e saserdote ku ta drecha tur kos atrobe entre e hende i Dios.

⁸ Meskos tambe ora un saserdote ofresé un sakrifisio di kandela pa un hende, kueru di e bestia ta pa e saserdote.

⁹ Tur ofrenda vegetal hinká na fòrnu, òf prepará den panchi òf riba kasuela, tambe ta pa e saserdote ku ta ofresé e sakrifisio.

¹⁰ Di tur otro ofrenda vegetal, tantu esnan prepará ku zeta komo esnan seku, kada saserdote ta haña un porshon igual.

Sakrifisio di pas

¹¹ Aki ta sigui e instrukshonnan pa ora ta ofresé sakrifisio di pas na SEÑOR.

¹² Si e sakrifisio di pas akí ta pa gradisí SEÑOR, e hende mester ofresé huntu ku e bestia arepa sin is; por ta arepa diki prepará ku zeta òf arepa plat huntá ku zeta òf arepa trahá di hariña fini mesklá ku zeta.

¹³ Huntu ku e arepanan ei e por ofresé pan trahá ku is.

¹⁴ Di tur loke e ofresé, e ta destiná un parti pa SEÑOR; e parti ei ta pa e saserdote ku ta sprengu sanger di e bestia kontra e bandanan di altá.

¹⁵ Mester kome karni di e bestia sakrifiká e mesun dia ei; no mester warda nada pa su manisé.

¹⁶ Si un hende ofresé e sakrifisio akí boluntariamente òf pa kumpli ku un promesa, por kome un parti di e karni e dia ei mes i e otro parti su manisé.

¹⁷ Pero si di tres dia ainda a sobra karni, mester kim'é.

¹⁸ Si riba e di tres dia un hende kome ainda for di e karni di su sakrifisio di pas, Dios no ta aseptá su sakrifisio. Su sakrifisio no ta na SEÑOR su agrado, pasobra e karni no ta sirbi mas pa uso religioso. Esun ku kom'é tin ku paga pa su piká.

¹⁹ No mester kome karni ku a mishi ku algu impuru; mester kim'é. Sobrá karni di e sakrifisio tur hende ku ta puru por kome.

²⁰ Pero si un hende ku ta personalmente impuru kome di e karni akí ku ta ofresé na SEÑOR, mester sak'é for di komunidat di Israel.

²¹ Meskos ta konta pa e hende ku kome e karni despues di a mishi ku algu impuru, por ehèmpel, un hende òf bestia òf kualke otro kos.’

Uso di sebu i sanger

²² SEÑOR a ordená Moises

²³ pa bisa e israelitanan: ‘Boso no mester kome sebu di baka, ni di karné, ni di kabritu.

²⁴ Boso por usa sebu di un bestia ku a muri un morto natural òf di un bestia ku animal salbahe a mata, pa hasi kualke kos, pero no kom'é sí.

²⁵ Si un hende kome sebu di un bestia destiná komo sakrifisio di kuminda na SEÑOR, mester sak'é for di komunidat di Israel.

²⁶ Unda ku boso por ta biba, no kome sanger nunka ni di para ni di otro bestia.

²⁷ Mester saka e hende, ku tòg kome sanger di kualke bestia, for di komunidat di Israel.’

Loke ta toka e saserdote for di e sakrifisionan di pas

²⁸ SEÑOR a ordená Moises

²⁹ pa bisa e israelitanan: ‘Ora un hende ofresé un sakrifisio di pas, e ta duna SEÑOR e parti ku ta tok'É.

³⁰ E mes ta ofresé e sakrifisio di kuminda na SEÑOR, esta e partinan ku sebu i e pechu. E ta his'é i di e manera ei ta present'é na SEÑOR, kaba e ta pas'é pa e saserdote den nòmber di SEÑOR.

³¹ Despues e saserdote ta kima e sebu riba altá, pero e pechu ta keda pa Aaron i su yunan, e saserdotenan.

³² Boso mester duna e parti ariba di e pia di patras na banda drechi komo boso kontribushon pa e saserdote

³³ ku ta hiba e sanger i e klòmpinan di sebu di e bestia altá.

³⁴ Di tur sakrifisio ku e israelitanan ta ofresé komo sakrifisio di pas, SEÑOR a destiná e pechu i e pia di patras pa Aaron i su yunan, e saserdotenan.

³⁵ E partinan akí di e sakrifisio na SEÑOR ta toka Aaron i su yunan for di e momento ku a nombra nan saserdote di SEÑOR.

³⁶ SEÑOR mes a ordená pa e israelitanan duna e saserdotenan e partinan akí for di dia ku a konsagrá nan na SEÑOR. Esaki ta un lei permanente pa tur generashon.’

³⁷ Esaki ta e instrukshonnan pa sakrifisio di kandela, ofrenda vegetal, sakrifisio pa pordon di piká, sakrifisio di debe, sakrifisio di konsagrashon i sakrifisio di pas.

³⁸ SEÑOR a duna Moises e instrukshonnan akí riba seru Sinai den desierto, dia ku SEÑOR a ordená e israelitanan pa nan ofres'É sakrifisio.