Levítiko 20 - Papiamentu Bible 2013

Kastigu pa desobediensia

¹ SEÑOR a ordená Moises

² pa bisa e israelitanan lo siguiente: ‘Si un israelita òf un strañero ku ta biba na Israel sakrifiká un di su yunan na dios Molèk, mata mester mat'é. Henter pueblo mester batié ku piedra mata.

³ Lo Mi no ke mira e hòmber ei mas ku wowo, i lo Mi sak'é for di komunidat di Israel. Pasobra pa motibu ku el a sakrifiká un di su yunan na Molèk, el a hasi mi santuario impuru i deshonrá mi nòmber santu.

⁴ Si pueblo sera wowo pa kos asina pa evitá di mata e hòmber ei,

⁵ Mi no ke mira e ni su famia mas ku wowo; lo Mi saka nan for di komunidat di Israel, e i tur esnan ku a kuminsá adorá Molèk segun su ehèmpel sin tene bèrgwensa di kibra fieldat ku Dios.

⁶ Si un hende, di un manera òf otro, konsultá spiritu di morto, loke ta un forma di adorá dios falsu, lo Mi no ke mir'é mas i lo Mi sak'é for di komunidat di Israel.

⁷ Komportá boso manera hende santu, pasobra Ami ta SEÑOR, boso Dios.

⁸ Tene bon kuenta ku mi leinan i kumpli ku nan. Mi ta SEÑOR ku a skohe boso pa hasi boso un pueblo santu.

⁹ Si un hende maldishoná su tata òf su mama, mata mester mat'é. E mes ta responsabel pa su morto, pasobra el a maldishoná un di su mayornan.

¹⁰ Si un hòmber kometé adulterio ku kasá di un otro hòmber, mata mester mata e dos kulpabelnan.

¹¹ Si un hòmber tene relashon seksual ku kasá di su tata, e ta deshonrá su tata; mata mester mata e dos kulpabelnan. Nan mes ta responsabel pa nan morto.

¹² Si un hòmber tene relashon seksual ku su suegra, esta kasá di su yu hòmber, mata mester mata e dos kulpabelnan, pasobra nan a kometé un akto perverso. Nan mes ta responsabel pa nan morto.

¹³ Si un hòmber tene relashon seksual ku un otro hòmber manera ta tene relashon ku un muhé, tur dos ta hasi nan mes kulpabel na un akto repugnante; mata mester mata tur dos. Nan mes ta responsabel pa nan morto.

¹⁴ Si un hòmber tuma un mama i su yu muhé pa esposa, ta trata di bibamentu ku su mes famia. Kima mester kima e hòmber i e dos muhénan. Di tal manera ta evitá ku kos asina ta keda tuma lugá meimei di boso.

¹⁵ Si un hòmber tene relashon seksual ku un bestia, mata mester mata e i e bestia.

¹⁶ Si un muhé tene relashon seksual ku un bestia, mata mester mata e i e bestia. Nan mes ta responsabel pa nan morto.

¹⁷ Si un hòmber kasa ku su ruman muhé di parti di tata òf di parti di mama, i nan tene relashon seksual ku otro, nan ta komportá nan mes bergonsoso i públikamente mester saka nan for di komunidat di Israel. Komo ku e hòmber a tene relashon seksual ku su ruman muhé, e mester paga p'e.

¹⁸ Si un hòmber drumi ku un muhé durante dianan di su regla, e eksponé e muhé su sunú, bròn di menstruashon, i e muhé lag'é, mester saka tur dos for di komunidat di Israel.

¹⁹ No tene relashon seksual ku ruman muhé di bo mama ni ku ruman muhé di bo tata: ta trata di un famia yegá. Den tal kaso boso tur dos mester paga p'e.

²⁰ Ora un hòmber tene relashon seksual ku kasá di su tio, e ta deshonrá su tio. E dos kulpabelnan mester paga p'e. Nan lo muri sin yu.

²¹ Si un hòmber tuma kasá di su ruman hòmber pa esposa, ta bibamentu den famia. E pareha lo no haña yu, pasobra e hòmber a deshonrá su ruman hòmber.

²² Tene bon kuenta ku mi leinan i reglanan i kumpli ku nan. E ora ei e pais kaminda Mi ta bai hiba boso pa boso keda, no ta skupi saka boso afó.

²³ No sigui kustumber di e pueblonan ku Mi ta bai kore kuné pa boso haña e pais; pasobra nan a hasi tur e aktonan bergonsoso ei i Mi a haña asko di nan.

²⁴ P'esei Mi a bisa boso: “Ta boso lo bira doño di nan pais. T'Ami ta duna boso e den poseshon, e pais ku ta mana lechi i miel. Mi ta SEÑOR, boso Dios, ku a apartá boso di e otro nashonnan.”

²⁵ P'esei boso mester respetá e distinshon ku Mi a pone entre bestia puru i impuru; entre para puru i impuru. No hasi boso mes impuru dor di mishi ku esnan ku ta impuru, bestia riba tera, para i bestia ku ta move riba suela.

²⁶ Sea santu, konsagrá na mi servisio, pasobra Ami, SEÑOR, ta santu. Mi a apartá boso di otro nashon pa boso pertenesé na Mi.

²⁷ Si un hòmber òf muhé tin kustumber di yama òf konsultá spiritu, mata mester mat'é. Mester batié ku piedra mata. E mes ta responsabel pa su morto.’