Levítiko 2 - Papiamentu Bible 2013

Ofrenda vegetal

¹ Ora un hende ke hasi un ofrenda vegetal na SEÑOR, e mester kohe hariña fini. Riba e hariña e ta basha zeta i stroi sensia.

² E ta hiba esaki serka e saserdotenan, yunan di Aaron; e saserdote ta kohe un man yen di e hariña fini ku zeta i tur e sensia i ta laga e parti ei di e ofrenda kima riba altá. Di e manera ei e ta ekspresá ku henter e ofrenda ta dediká na SEÑOR. Asina e ta un sakrifisio di kuminda ku un holó agradabel pa SEÑOR.

³ Loke sobra di e ofrenda ta pa Aaron i su yunan; e ta un porshon hopi sagrado, pasobra e ta forma parti di sakrifisio di kuminda ofresé na SEÑOR.

⁴ Ora bo ke trese algu ku bo a prepará den fòrnu komo ofrenda, e mester konsistí di hariña fini: arepa diki sin zürdeg prepará ku zeta, òf arepa plat sin zürdeg huntá ku zeta.

⁵ Si bo ofrenda ta algu ku bo a prepará riba kasuela, e mester ta trahá di hariña fini prepará ku zeta i sin is.

⁶ Ta kibr'é na pida pida i basha zeta riba dje. Asina e ta un ofrenda vegetal.

⁷ Si bo ofrenda ta un ofrenda prepará den panchi, bo mester prepar'é di hariña fini ku zeta.

⁸ Bo ta hiba e ofrenda, ku bo a prepará na un di e maneranan akí, pa SEÑOR; bo ta duna e saserdote e ofrenda i e ta tum'é hib'é altá.

⁹ E ora ei e saserdote ta kohe e parti di e ofrenda vegetal, ku ta ekspresá ku henter e ofrenda ta dediká na SEÑOR, i kim'é riba altá. Asina e ta un sakrifisio di kuminda ku un holó agradabel pa SEÑOR.

¹⁰ Loke sobra ta pa Aaron i pa su yunan, e ta un porshon hopi sagrado, pasobra e ta forma parti di e sakrifisio di kuminda ofresé na SEÑOR.

¹¹ No pone zürdeg den ningun di e ofrendanan vegetal ku bo ta prepará pa SEÑOR, pasobra no ta pèrmití pa kima ni zürdeg ni miel den un sakrifisio di kuminda pa SEÑOR.

¹² Bo por ofresé zürdeg i miel komo e promé produktonan di kosecha, pero no kima nan komo sakrifisio di holó agradabel riba altá.

¹³ Pone salu den tur bo ofrendanan vegetal. No keda sin pone salu, pasobra ta e salu ta indiká ku e aliansa entre Dios i boso ta duradero; p'esei pone salu den tur boso ofrendanan.

¹⁴ Si bo ke ofresé SEÑOR un ofrenda vegetal di e promé produktonan di bo kunuku, bo mester kuminsá tota tapushi fresku, kaba bati pipita di trigo.

¹⁵ Riba e ofrenda bo mester basha zeta i stroi sensia. Asina e ta un ofrenda vegetal.

¹⁶ Despues e saserdote ta kohe e parti di e trigo batí i poko di e zeta huntu ku tur e sensia i pone nan kima. Di e manera ei e ta ekspresá ku henter e ofrenda ta dediká na SEÑOR. Asina e ta un sakrifisio di kuminda pa SEÑOR.