Levítiko 18 - Papiamentu Bible 2013

Relashon seksual prohibí

¹ SEÑOR a ordená Moises

² pa bisa e israelitanan lo siguiente: ‘Mi ta SEÑOR, boso Dios.

³ No hasi manera e hendenan di Egipto, e pais kaminda boso tabata biba, ta hasi; ni manera e hendenan di Kanaan, kaminda Mi ta bai hiba boso, ta hasi; no sigui kustumber di e hendenan ei.

⁴ Praktiká mi reglanan i sòru di kumpli ku mi leinan, pasobra Ami ta SEÑOR, boso Dios.

⁵ Kumpli anto ku mi leinan i reglanan. Esun ku praktiká nan, lo biba dor di nan. Ami ta SEÑOR.

⁶ Niun israelita no mag tene relashon seksual ku un muhé ku ta su famia yegá. Ami ta SEÑOR.

⁷ No deshonrá bo tata dor di tene relashon seksual ku bo mama; bo ta deshonrá bo mama tambe, pasobra ta bo mama e ta.

⁸ No tene relashon ku un otro kasá di bo tata, pasobra bo ta deshonrá bo tata.

⁹ No tene relashon seksual ku bo ruman muhé di parti di tata òf mama, ni maske e no a lanta den mes kas ku bo.

¹⁰ No tene relashon seksual ku bo ñetu sea ku e ta yu muhé di bo yu hòmber òf di bo yu muhé, bo ta deshonrá bo mes.

¹¹ No tene relashon seksual ku yu muhé di bo tata i un otro kasá di bo tata. Dor ku e ta yu di bo tata, e ta bo ruman.

¹² No tene relashon seksual ku ruman muhé di bo tata, ta bo tata su sanger.

¹³ No tene relashon seksual ku ruman muhé di bo mama, ta bo mama su sanger.

¹⁴ No deshonrá ruman hòmber di bo tata dor di tene relashon seksual ku su kasá, pasobra su kasá ta bo tanta.

¹⁵ No tene relashon seksual ku bo suegra, pasobra ta kasá di bo yu hòmber e ta.

¹⁶ No tene relashon seksual ku kasá di bo ruman hòmber, pasobra bo ta deshonrá bo ruman hòmber.

¹⁷ No tene relashon seksual ku un muhé i ku su yu muhé òf ku su ñetu muhé tambe, pasobra nan ta su mes sanger i esei lo ta bibamentu ku bo mes famia.

¹⁸ No tuma ruman muhé di bo kasá tambe komo kasá, pa tene relashon seksual kuné, tanten bo kasá ta na bida. Nan por bira rival di otro.

¹⁹ No tene relashon seksual ku un muhé durante dianan di su regla, pasobra e ta impuru.

²⁰ No tene relashon seksual ku kasá di bo próhimo, pasobra bo ta bira impuru.

²¹ No entregá boso yunan pa nan ta sakrifiká na dios Molèk. Pasobra asina boso ta deshonrá mi nòmber. Ami ta SEÑOR, boso Dios.

²² No tene relashon seksual ku un otro hòmber manera ta tene relashon ku un muhé, ta un akto mashá repugnante.

²³ No tene relashon seksual ku un bestia, pasobra bo ta bira impuru. Un muhé tampoko no mester entregá su mes na un bestia, ta akto perverso.

²⁴ No hasi boso mes impuru dor di ningun di e aktonan akí, pasobra e nashonnan ku Mi ta bai yag boso dilanti a bira impuru dor di entregá nan mes na e aktonan akí.

²⁵ E pais mes a bira impuru. Mi mester a kastig'é i e mes a skupi saka su habitantenan.

²⁶ P'esei, israelitanan òf strañeronan ku ta biba meimei di e israelitanan, kumpli ku mi leinan i reglanan; i nenga tur e aktonan repugnante akí.

²⁷ E hendenan ku a biba den e pais promé ku boso, a kometé e aktonan akí i e pais a bira impuru.

²⁸ No hasié impuru atrobe, pa e no skupi saka boso afó, manera el a hasi ku esnan ku tabata einan promé ku boso.

²⁹ P'esei mester saka tur esnan ku ta entregá nan mes na e aktonan repugnante akí for di komunidat di Israel.

³⁰ Kumpli fielmente ku loke Mi ta ordená boso; no sigui ku e aktonan repugnante ku tabata kustumber promé ku boso a yega, pa boso no bira impuru. Ami ta SEÑOR, boso Dios.’