Levítiko 15 - Papiamentu Bible 2013

Impuresa seksual di hende hòmber

¹ SEÑOR a ordená Moises i Aaron pa

² bisa e israelitanan lo siguiente: ‘Ora un hòmber tin drep, e malu akí ta hasié impuru.

³ Sea ku e sleim ta sali fásilmente òf difísilmente, e hòmber ta impuru tanten e ta den e estado ei.

⁴ Tur kama ku e hòmber ku drep drumi ariba òf tur loke e sinta ariba, ta bira impuru.

⁵ Esun ku mishi ku e kama ei, mester laba su pañanan i dal un baño; e ta keda impuru te ora nochi sera.

⁶ Esun ku kai sinta riba un opheto ku un hòmber asina a sinta ariba, mester laba su pañanan i dal un baño, e ta keda impuru te ora nochi sera.

⁷ Esun ku mishi ku e hòmber ei mester laba su pañanan i dal un baño, e ta keda impuru te ora nochi sera.

⁸ Si un hòmber ku drep skupi riba un hende puru pa demostrá su menospresio, e delaster akí mester laba su pañanan i dal un baño, e ta keda impuru te ora nochi sera.

⁹ Tur sia ku e hòmber ku drep usa ta bira impuru.

¹⁰ Ken ku mishi ku un opheto ku e hòmber ku drep a usa pa sinta riba dje, ta keda impuru te ora nochi sera. Ken ku transportá un opheto asina, mester laba su pañanan i dal un baño, e ta keda impuru te ora nochi sera.

¹¹ Ken ku e hòmber asina mishi kuné sin laba man, mester laba su pañanan i dal un baño, e ta keda impuru te ora anochi sera.

¹² Si e hòmber malu mishi ku algu trahá di klei, mester kibra e artíkulo ei; si ta algu trahá di palu mester hawa e artíkulo ku awa.

¹³ Si e hòmber kura di su enfermedat, e mester warda shete dia promé ku e bira henteramente puru; e ta laba su pañanan i baña ku awa di bròn; despues di e shete dianan akí e ta puru atrobe.

¹⁴ Riba e di ocho dia e ta bai para ku dos tòrteldùif òf dos pichon dilanti di SEÑOR, na entrada di tènt di enkuentro, i aya e ta duna saserdote nan.

¹⁵ Saserdote ta ofresé un di e paranan komo sakrifisio pa pordon di piká i e otro komo sakrifisio di kandela. Asina, dilanti di SEÑOR, e ta drecha tur kos entre e hòmber ku a kura, i Dios.

¹⁶ Ora un hòmber pèrdè simia, e mester laba henter su kurpa, e ta keda impuru te ora nochi sera.

¹⁷ Mester laba tur paña di bisti òf tur artíkulo di kueru ku a mishi ku e simia, nan ta keda impuru te ora nochi sera.

¹⁸ Ora un hòmber i un hende muhé tabatin relashon seksual ku otro, tur dos mester dal un baño, nan ta keda impuru te ora nochi sera.

Impuresa seksual di hende muhé

¹⁹ Ora un muhé tin su regla ku sanger ta sali for di su kurpa, e ta keda shete dia impuru. Ken ku mishi kuné ta bira i keda impuru te ora nochi sera.

²⁰ Tur kama ku e muhé drumi ariba òf tur opheto ku e sinta ariba durante e dianan di su regla ta bira impuru.

^21-22 Tur hende ku mishi ku e kama ei òf e opheto di sinta ariba ei mester laba su pañanan i dal un baño, e hende ta keda impuru te ora nochi sera.

²³ Ken ku mishi ku algu ku tabatin riba e kama òf e opheto ku e muhé a usa, ta bira impuru te ora nochi sera.

²⁴ Si un hòmber drumi ku un muhé, i sanger di su regla mishi ku e hòmber, e hòmber tambe ta bira shete dia impuru. Tur kama ku e drumi ariba ta bira impuru.

²⁵ Si un muhé fuera di su dianan di regla tin bashamentu durante poko dia òf su regla dura mas ku normal, e ta keda tur e tempu ei impuru, meskos ku durante e dianan di su regla.

²⁶ Tur kama ku e drumi ariba, tur opheto ku e sinta ariba ta bira impuru, meskos ku durante e dianan di su regla.

²⁷ Ken ku mishi ku e kama ei òf e opheto di sinta ariba ei, mester laba su pañanan i dal un baño, e ta keda impuru te ora nochi sera.

²⁸ Ora e bashamentu pasa, e muhé mester warda shete dia, pa e bolbe bira puru.

²⁹ Riba e di ocho dia e ta kohe dos tòrteldùif òf dos pichon i hiba nan pa e saserdote na entrada di tènt di enkuentro.

³⁰ E saserdote ta ofresé un di e paranan komo sakrifisio pa pordon di piká i e otro komo sakrifisio di kandela. Asina, dilanti di SEÑOR, e ta drecha tur kos atrobe entre e muhé ku a kura, i Dios.

³¹ Hinka den e israelitanan pa nan kumpli ku e preskripshonnan di puresa akí. Pasobra lo ta nan morto si nan yega den estado di impuresa den bisindario di e tènt kaminda Mi ta biba meimei di nan.’

³² Te asina leu e instrukshonnan enkuanto e hòmber ku bira impuru pa motibu ku e tin drep òf pasobra e ta pèrdè simia,

³³ tokante un muhé ku tin su regla òf ta sufri di bashamentu, i tambe di e hòmber ku drumi ku un muhé ku ta impuru.