Levítiko 11 - Papiamentu Bible 2013

Instrukshonnan tokante loke ta puru i impuru Bestia puru i impuru

¹ SEÑOR a ordená Moises i Aaron pa duna e israelitanan e siguiente instrukshonnan:

² ‘Boso por kome tur bestia ku ta biba riba tera,

³ basta nan tin pata tur isples i ta bolbe kou nan kuminda despues ku nan kaba di kome.

⁴ Pero boso no mag kome e siguiente bestianan ku sea ta bolbe kou nan kuminda òf tin pata isples. Boso mester konsiderá nan impuru: kamel, pasobra e ta bolbe kou su kuminda, ma no tin pata isples;

⁵ marmòt di seru, pasobra e ta bolbe kou su kuminda, ma no tin pata isples;

⁶ tambe has ku ta bolbe kou su kuminda, ma no tin pata isples;

⁷ porko tampoko boso no mag kome, boso mester konsider'é impuru, pasobra ounke e tin pata tur isples, e no ta kou su kuminda atrobe.

⁸ No kome karni di e bestianan ei, ni mishi ku nan kadaver; nan ta impuru pa boso.

⁹ Di e bestianan ku ta biba den awa, den lago, den laman i den riu, boso por kome esnan ku tin ala i skama.

¹⁰ Keda leu for di bestia ku no tin ala ni skama i ku ta biba den awa grandi òf chikitu.

¹¹ Komo boso mester keda leu for di nan boso no mester kome nan karni i boso mester evitá di mishi ku nan kadaver.

¹² Keda leu for di tur bestia di awa ku no tin ala ni skama.

¹³ Ata e paranan ku boso mester keda leu for di nan i ku boso no mester kome: águila, buitre kibra wesu, makuaku,

¹⁴ kinikini i tur sorto di falki,

¹⁵ tur sorto di raf,

¹⁶ abestrus, palabrua orea largu i palabrua orea kòrtiku, i tur sorto di warawara,

¹⁷ shoko, bubi balaú i ides,

¹⁸ zuan, ganshi i gabilan piskadó,

¹⁹ óyevar i tur sorto di grabèchi, bubi i raton di anochi.

²⁰ Keda leu for di tur insekto ku ala i kuater pata.

²¹ Un eksepshon ta forma e insektonan ku tin kuater pata mas dos pata pa nan bula bula riba suela.

²² Di nan boso por kome tur sorto di dalakochi grandi, gueli, kriki i dalakochi chikí.

²³ Keda leu for di tur otro insekto ku tin ala i ku tin kuater pata.

²⁴ Kontakto ku e bestianan akí ta hasi hende impuru: ken ku mishi ku nan kadaver ta keda impuru te ora nochi sera.

²⁵ Ken ku hisa nan kadaver mester laba su paña i ta keda impuru te ora nochi sera.

²⁶ Ata e bestianan ku boso mester konsiderá impuru: bestianan ku pata no kompletamente isples i ku no ta bolbe kou nan kuminda. Ken ku mishi ku nan ta keda impuru;

²⁷ tur bestia ku kuater pata i ku ta kana riba nan planta di pia. Ken ku mishi ku nan kadaver ta keda impuru te ora nochi sera.

²⁸ Ken ku hisa nan kadaver mester laba su paña i ta keda impuru te ora nochi sera.

²⁹ Entre e bestianan ku ta move abou riba suela, boso mester konsiderá impuru: mòl, raton, e diferente sorto di lagadishi,

³⁰ totèki, pegapega, yuana, blousana i kameleon.

³¹ Konsiderá tur e bestianan akí impuru: ken ku mishi ku nan kadaver ta keda impuru te ora nochi sera.

³² Si kadaver di un di e bestianan akí kai riba kualke opheto trahá di palu, òf riba paña, kueru òf saku, mester laba e opheto pa loke sea ta us'é i e ta keda impuru te ora nochi sera; despues e ta bira puru atrobe.

³³ Si kadaver di un di e bestianan akí kai den un poron trahá di klei, tur kontenido dje poron ta bira impuru i mester kibra e poron.

³⁴ Si basha awa for di e poron riba un kuminda ku por kom'é normalmente, e kuminda ta bira impuru. Si ta trata di un líkido ku por bebe normalmente, e tambe ta bira impuru.

³⁵ Si kadaver di un di e bestianan akí kai riba kualke opheto, e opheto ta bira impuru. Si ta trata di un fòrnu di piedra òf un fogon di klei, mester kibr'é, pasobra mester konsider'é impuru.

³⁶ Pero si kadaver di un di e bestianan kai den un bròn òf un pos, e awa ta keda puru, pero e hende ku saka e kadaver ta bira impuru.

³⁷ Si un kadaver kai riba simia ku mester sembra ainda, e simia ta keda puru.

³⁸ Pero si e kai riba simia muhá, mester konsiderá e simia impuru.

³⁹ Si un bestia ku hende sa kome muri, ken ku mishi ku e kadaver ta keda impuru te ora nochi sera.

⁴⁰ E hende ku kome karni di e bestia morto mester laba su pañanan, ma e ta keda impuru te ora nochi sera; e hende ku hisa kadaver di e bestia bai kuné tambe mester laba su pañanan, ma e ta keda impuru te ora nochi sera.

⁴¹ Keda leu for di bestia ku ta bruha den otro abou riba suela.

⁴² No kome nan, sea ku nan ta lastra riba nan barika òf ta kana riba kuater pata òf mas; keda leu for di nan.

⁴³ Evitá di kontaminá boso dor di mishi ku e bestianan ei, no laga nan kontaminá boso, pasobra boso ta bira impuru.

⁴⁴ Ami ta SEÑOR, boso Dios, komportá boso manera hende santu, pasobra Ami ta santu. No hasi boso impuru dor di mishi ku e bestianan chikitu ku ta bruha den otro abou riba suela.

⁴⁵ Ami ta SEÑOR, ku a saka boso for di Egipto, pa Mi ta boso Dios. Sea santu, pasobra Ami ta santu.’

⁴⁶ Te asina leu e lei tokante bestia riba tera, para, bestia den awa i bestia ku ta move riba suela.

⁴⁷ Asina por distinguí bestia puru for di bestia impuru, esnan ku sí mag kome for di esnan ku no mag kome.