Lamentashonnan 3 - Papiamentu Bible 2013

Speransa apesar di mizeria profundo

¹ Ami, ku ta skibi esaki, ta un hòmber ku sa loke ta nifiká sufri bou di gòlpinan di Señor su furia.

² El a yag mi su dilanti, pusha mi kada be mas den e anochi di mas pretu.

³ Henter dia, kada be di nobo, su man ta baha pisá riba mi.

⁴ Ta pa su via mi karni a kita fo'i mi kurpa i El a kibra mi wesunan.

⁵ El a sera mi aden di tur banda, rondoná mi ku amargura i mizeria.

⁶ El a laga mi biba den tiniebla manera esnan k'a muri hopi tempu pasá.

⁷ El a traha un muraya rondó di mi i mara mi na kadena; for di e prizòn akí no tin skapatorio.

⁸ Maske mi ta grita pidi ousilio, E no ta aktu mi orashon.

⁹ El a sera mi kaminda ku barank'i piedra, di manera ku mi tabata desviá kada be.

¹⁰ E ta lur mi manera un oso, manera un leon skondí un kaminda.

¹¹ El a ranka mi fo'i riba kaminda, sker mi na pida pida i laga mi bentá pa mi kuenta.

¹² El a mek e bog riba mi i usa mi komo blanko pa su flechanan.

¹³ Te den mi higra m'a sinti e flechanan ku El a tira riba mi.

¹⁴ Henter dia bai mi pueblo ta hasi bofon di mi, ta kanta kantika pa chèrchè mi.

¹⁵ Señor a duna mi yerba di mas marga kome, laga mi bebe aw'i sentebibu.

¹⁶ El a frega mi kara abou den tera i kibra mi djentenan kontra piedra.

¹⁷ Tur mi pas a disparsé, mi no sa mas kiko ta felisidat.

¹⁸ Mi ta sinti mi sin futuro, sin nada mas di spera di SEÑOR.

¹⁹ Ora mi kòrda mi mizeria i abandono, ta manera ta aw'i sentebibu mi ta bebe.

²⁰ Pero tòg ata mi ta bolbe kòrda i mi kurason ta kai.

²¹ Sinembargo un kos mi ke graba den mi mente i pone mi speransa den dje:

²² SEÑOR su fiel amor no tin fin, su bondat no ta kaba nunka.

²³ Tur mainta nan ta nobo atrobe. Señor, esta grandi bo fieldat ta!

²⁴ Mi ta bisa mi mes: ‘SEÑOR ta tur kos pa mi, p'esei mi ta pone mi speransa den djE.’

²⁵ SEÑOR ta bon pa esnan ku konfia den djE, pa tur ku buska su presensia.

²⁶ P'esei ta mihó keda ketu i spera riba yudansa di SEÑOR.

²⁷ Ta bon pa hende siña karga peso fo'i den su hubentut.

²⁸ Un hende por bien sinta un banda i sera su boka si SEÑOR pone un karga riba su lomba.

²⁹ E por bien bùig i pone su boka na suela: por tin speransa ainda.

³⁰ Lag'é bira kara p'esun ku ta bòft'é, i karga tur bèrgwensa.

^31-32 Ounke Señor manda sufrimentu pa nos, tòg E ta bolbe tene piedat di nos, dje abundante ei su amor i bondat ta. E no ta rechasá nos pa semper.

³³ No ta agrad'É kousa hende tristesa i doló.

³⁴ Si hende trapa sin mizerikòrdia tur esnan, ku nan a kohe prezu den e pais,

³⁵ si den kara di Dios Altísimo nan ta trapa derecho di hende,

³⁶ si nan ta trose hustisia den korte, akaso Señor no ta mira esei?

³⁷ Ken tin ku papia djis ún palabra so pa algu sosodé? Akaso tur kos no ta sosodé riba òrdu di Señor?

³⁸ Si algu pasa nos, bon o malu, no ta pasobra Dios Altísimo a orden'é?

³⁹ Ku ki derecho un hende ku ta na bida, ta keha? At'é riba pia, apesar di su pikánan!

⁴⁰ Ban saminá nos manera di aktua i bolbe serka SEÑOR!

⁴¹ Ban resa na Dios den shelu no solamente ku nos man, pero tambe ku nos kurason alsá:

⁴² ‘Nos a lanta kontra Bo, Señor, nos a rebeldiá i Bo no a pordoná nos falta ainda.

⁴³ Bo a persiguí i mata nos, bo kompashon a skonde tra'i bo rabia.

⁴⁴ Bo a tapa Bo mes ku un nubia, pa nos orashon no penetrá te serka Bo.

⁴⁵ Bo a bari nos huntu manera sushi, manera basura di pueblonan.

⁴⁶ Tur nos enemigunan ta grita hari pil di nos,

⁴⁷ Pániko, trampa, destrukshon i ruina, t'esei a bira nos destino.’

⁴⁸ Mi wowo ta pari riu di lágrima, ora mi mira destrukshon di mi dushi pueblo.

⁴⁹ Ketu bai awa ta basha fo'i mi wowo, mi no ta stòp di yora,

⁵⁰ te ora SEÑOR wak abou fo'i den shelu i mira nos.

⁵¹ Mi kurason ta morde ora mi mira ki' ta para di e muhénan den mi siudat.

⁵² Mi enemigunan a kohe mi manera para den trampa, pero no ta'tin motibu pa nan odia mi.

⁵³ Nan a dera mi bibu den un pos i tapa su boka ku un piedra.

⁵⁴ Awa a subi pasa mi kabes. M'a pensa: ‘Awor sí m'a muri.’

⁵⁵ For di profundidat di mi graf m'a grita: ‘SEÑOR, ousilio!’

⁵⁶ Bo a tende ora mi a grita: ‘No sera bo orea! Skucha mi lamento i gritu di ousilio!’

⁵⁷ I enberdat, Bo a yega serka ora m'a grita, Bo a bisa mi: ‘No tene miedu!’

⁵⁸ Señor, Bo a pleita mi kaso, Bo a salba mi bida.

⁵⁹ Husga na mi fabor, Bo sa kuantu malu mi enemigunan a hasi mi.

⁶⁰ Bo a mira tur nan set di vengansa i nan kònkelmentu kontra mi.

⁶¹ SEÑOR, Bo a tende kon nan a pil di mi, kon nan a kònkel kontra mi.

⁶² Tur loke e enemigunan ei bisa i pensa, ta bai kontra mi, dia aden, dia afó.

⁶³ Djis wak nan! Kiko ku nan hasi o laga, t'ami t'e blanko di nan kantikanan di chèrchè.

⁶⁴ SEÑOR, paga nan bèk tur loke nan a hasi mi.

⁶⁵ Hasi nan mente stòmpi i laga bo maldishon baha riba nan.

⁶⁶ Persiguí nan den bo rabia i bari nan for di riba mundu.