Kolosensenan 3 - Papiamentu Bible 2013

¹ Unabes ku boso a lanta for di morto huntu ku Kristu, dirigí boso bida riba loke ta den shelu, kaminda E ta sintá na man drechi di Dios.

² Empeñá pa kos di shelu i no pa kos di e mundu akí.

³ Pasobra boso ta morto i awor boso bida ta skondí huntu ku Kristu den Dios.

⁴ Boso bida real ta Kristu mes i ora E bini bèk, boso tambe lo aparesé huntu kunÉ i kompartí su gloria.

Bida nobo i un bida bieu

⁵ P'esei mata tur loke ta di e mundu akí den boso: inmoralidat seksual, indesensia, pashon, deseo malu i avarisia, ku ta igual na idolatria.

⁶ Pa motibu di kos asina Dios ta rabia i kastigá esnan ku no ta obedes'É.

⁷ Boso tambe tabata hasi asina, tempu boso tampoko no tabata obedesé Dios.

⁸ Pero awor akí boso mester stòp di rabia, di bira furioso, di hasi maldat, di kalumniá, di papia palabra baho

⁹ i di gaña otro. Pasobra boso a pone boso bida di ántes un banda huntu ku e kosnan ku boso tabata hasi

¹⁰ i boso a kuminsá biba manera hende nobo, ku Dios, e Kreador, ta sigui renobá pa asina boso kambia den su imágen i siña konos'É di bèrdat.

¹¹ Esei ta trese kuné ku no ta importá si un hende ta hudiu òf no hudiu, sirkunsidá òf no-sirkunsidá, strañero, sin sivilisashon, katibu òf liber, pero loke ta importá ta Kristu, ku ta den nan tur.

¹² Dios a skohe boso; boso ta su pueblo santu, ku E ta stima. P'esei bisti boso ku kompashon, mizerikòrdia, bondat, humildat, mansedumbre i pasenshi.

¹³ Soportá otro i pordoná otro ki ora ku un di boso tin un keho kontra otro. Pordoná otro meskos ku Señor a pordoná boso.

¹⁴ I huntu ku tur esaki pone amor tambe; amor ta mara boso tur huntu den un union perfekto.

¹⁵ Laga e pas di Kristu guia boso kurason; pasobra ta pa haña e pas ei mes, Dios a yama boso pa huntu boso forma ún kurpa. Sea gradesido na Dios!

¹⁶ Laga e mensahe tokante Kristu permanesé ku tur su rikesa den boso kurason. Siña i koregí otro ku tur sabiduria. Kanta salmo, himno i kantika spiritual na Dios ku un kurason gradesido.

¹⁷ Den tur loke boso bisa òf hasi, boso mester honra nòmber di Señor Hesus, yamando Dios Tata danki pa medio di djE.

Relashon den kas di famia

¹⁸ Señoranan, someté boso na boso esposo, manera ta deber di un hende ku ta biba den union ku Señor.

¹⁹ Hòmbernan, stima boso esposa i no trat'é brutu.

²⁰ Muchanan, obedesé boso mayornan den tur kos, pasobra esei ta agradá Señor.

²¹ Tatanan, no amargá bida di boso yunan pa boso no deskurashá nan.

²² Katibunan, obedesé boso shonnan aki na mundu den tur sirkunstansia. No hasi manera hende chifladó i sirbi nan djis ora nan ta mira boso. Ma obedesé nan ku un kurason sinsero, pasobra boso tin temor di Señor.

²³ Hasi tur kos di henter boso kurason, komo si fuera ta pa Señor boso ta traha i no pa hende.

²⁴ Kòrda ku e ora ei Señor lo rekompensá boso ku e benefisionan ku E tin wardá pa su pueblo. Pasobra boso ta den servisio di Kristu ku ta boso Doño.

²⁵ Es ku hasi malu, malu ta p'e; Dios no ta hasi distinshon di persona!