Job 8 - Papiamentu Bible 2013

Promé diskurso di Bildad Bildad ta konsehá Job pa e roga Dios debolbé Job su rikesa

¹ Awor Bildad di Sua a tuma palabra:

² ‘Bo ta blo papia numa. Ki dia bo ta stòp di usa bo rosea pa papia kos sin pia sin kabes?

³ Dios Todopoderoso nunka no ta trose ni hustisia ni derecho.

⁴ Kasi sigur bo yunan a peka kontra Dios, p'esei El a entregá nan na e kastigu, ku nan pikánan mes a okashoná.

⁵ Si bo buska Dios ku zelo i pidi Dios Todopoderoso tene piedat di bo,

⁶ si bo ta honesto i ta aktua ku rektitut, E ta sali pa bo sigur i restablesé bo hogar komo rekompensa.

⁷ E rikesanan ku bo tabatin no ta nada kompará ku loke bo ta bai risibí.

E patriarkanan tabata sa ku hende sin Dios ta sufri

⁸ P'esei, reflekshoná un ratu riba eksperensia di generashonnan di tur tempu, konsiderá e bèrdatnan di bida, ku nos antepasadonan a siña.

⁹ Nos aki no sa, t'ayera nos a nase, nos bida akibou ta kore pasa mes lihé ku un sombra.

¹⁰ Pero ta di nan bo por siña, ta esnan ku eksperensia por papia.

¹¹ Akaso mangel por krese kaminda no tin humedat, kaña kaminda no tin awa?

¹² Si awa seka nan ta promé ku ta marchitá, bèrdè ainda, sin ku por a ranka nan pa usa.

¹³ Hende ku no tin atenshon pa Dios, ta manera kaña ku no ta haña awa. Hende sin Dios ta muri sin speransa.

¹⁴ E ta pega su kurason na kos ku ta kibra fásilmente. Su seguridat ta mes frágil ku spenra.

¹⁵ E ta stèns riba su prosperidat, pero esaki no ta algu sólido; su kurason ta pegá na su propiedat, pero esaki no ta algu duradero.

¹⁶ E ta manera mata ku ta bona, den kalor di solo. E vipénan ku e mata saka ta spreit kore den henter e hardin,

¹⁷ lora nan rais den piedra i penetrá den blòki.

¹⁸ Pero ora ranka nan for di ei, e mes lugánan kaminda nan a pasa, lo no ta ni kòrda nan mas.

¹⁹ Ai sí, hende malbado, t'esaki pa nan ta e bida bon; awor otro hende ta bin tuma nan lugá.

Dios lo yuda Job si e ta fiel

²⁰ Dios no ta rechasá hende di kondukta ireprochabel; E no ta duna man di malechornan forsa.

²¹ Un añ' riba un dia E ta bolbe laga bo hari i lo bo bolbe kanta di alegria;

²² enkambio bo enemigunan sí, Dios ta yena ku bèrgwensa i E ta destruí kas di malbadonan.’