Job 7 - Papiamentu Bible 2013

Job ta keha serka Dios ku su eksistensia ta opresivo

¹ Hende no mester lucha riba mundu? Su dianan no ta manera di obrero ku ta kobra pa dia?

² Manera katibu ku ta anhelá un tiki sombra, trahadó kontratá ansioso pa su pago,

³ asina ami tabata obligá di biba mi bida, luna aden luna afó, tur anochi di nobo ku sufrimentu.

⁴ Anochi ora mi kai riba mi kama mi ta puntra: “Kuantu ora falta ainda pa mi lanta?” Pero anochi ta largu i mi ta keda bòltu, te ora di dia habri.

⁵ Mi kurpa ta tapá ku bichi, sushi a forma koncha riba mi kueru, e ta kaska i basha pus.

⁶ Mi dianan ta pasa mas lihé ku kartucha di hilu den man di hiladó; nan ta yega na nan fin, sin duna mi chèns di rekuperá.

⁷ Kòrda o Dios, ta solamente un rosea mi ta; si no bini kambio, mi wowo lo no mira felisidat mas.

⁸ Awe bo wowo ta mira mi, pero lo e no mira mi mas; lo Bo buska mi, pero lo mi no t'ei mas.

Bida ta kòrtiku i Job ke pa Dios lag'é trankil

⁹ Manera nubia ku pokopoko ta evaporá, hende ta muri i baha den reino di morto; e no ta bini bèk mas.

¹⁰ E no ta regresá su kas i pronto su hendenan ta lubid'é.

¹¹ Maske kiko pasa mi no ta sera mi boka, mi mester ekspresá e angustia di mi spiritu, protestá ya ku mi alma ta sinti amargura.

¹² Pakiko Bo ta vigilá mi konstantemente? Akaso mi ta menasá Bo manera laman o manera mònster den dje?

¹³ M'a kere ku kama ta duna mi konsuelo, soño ta aliviá mi destino tristu.

¹⁴ Pero ki ora! Bo a manda soño pa tormentá mi, vishon den anochi pa angustiá mi.

¹⁵ P'esei mihó choka mi mata, ku laga mi keda biba asina mizerablemente.

¹⁶ Mi ta odia e bida akí, e ta kaba ku mi! Duna mi un blo, mi bida ta basta kòrtiku kaba.

Job ta puntra pakiko Dios ta vigil'é asina tantu

¹⁷ Kiko hende ta? Pakiko Bo ta dun'é tantu importansia, Bo ta preokupá asina tantu p'e?

¹⁸ Ta na nodi pa Bo inspekt'é mainta i despues pon'é na prueba kada momento?

¹⁹ Porfin ki dia Bo ta bira kara e otro banda, pa mi haña maske ta un chèns di hala rosea?

²⁰ Si m'a hasi piká mes, kuantu asina mi por a ofendé Bo, o vigilante di hende? Pakiko mi ta blanko di bo flechanan? Ta un karga mi ta pa Bo?

²¹ Di kon Bo no ke tolerá mi pikánan, ni pordoná loke m'a hasi malu? Tòg pronto mi ta bai sosegá den stòf, lo Bo buska mi ku zelo, pero lo mi no t'ei mas.’