Job 4 - Papiamentu Bible 2013

Promé tanda di diskursonan Promé diskurso di Elifaz Job mester tin speransa

¹ E ora ei Elifaz di Teman a tuma palabra:

² ‘Bo ta pèrmití mi bisa bo algu, Job? Mi ta spera ku bo no ta rabia, pero mi no por keda ketu mas.

³ Kuantu be abo no a konsehá otro hende i bo n' duna man débil forsa?

⁴ Bo palabranan a tene hende ku ta tambaliá riba pia i fortifiká rudianan ku ta tembla.

⁵ Pero awor ku ta toka abo, bo ta tambaliá; awor ku ta bo mes kueru ta pika bo ta kolèps.

⁶ Unda bo rèspèt di Dios, ku a yena bo semper ku konfiansa, a keda? Unda e forsa interior, resultado di un bida sin mancha, ta?

Hende hustu no ta sufri bou di Dios su ira

⁷ Pensa un ratu: Akaso nunka un hende ku temor di Dios a bai pèrdí, o un hende rekto a keda destruí?

⁸ Segun mi eksperensia: Esun ku planta krímen i maldat ta kosechá loke nan a planta.

⁹ Dios ta hala rosea riba nan i nan ta muri; E ta supla riba nan i nan ta disparsé kompletamente.

¹⁰ Maske nan gruña i grita manera leon, Dios ta kibra nan djente pa sera nan boka.

¹¹ Nan ta muri manera leon ku no a haña víktima; i yunan di e mama leon lo ta plamá.

Elifaz ta raportá un vishon: niun hende no ta sin piká den bista di SEÑOR

¹² Un stèm a papia den sekreto ku mi, a kuchikuchi algu den mi orea,

¹³ ora ku mi tabata wul den kama, hañando vishon i bai un sleim di soño.

¹⁴ Spantu i sustu a drenta mi kurpa, mi tabata tembla manera bara bèrdè.

¹⁵ M'a sinti un bientu supla den mi kara, ku a pone mi kabes reis.

¹⁶ Tabata un figura — mi n' sa di kiko — e tabata pará mi dilanti. Tabata reina un silensio, m'a tende un stèm:

¹⁷ “Hende mortal por ta mas perfekto ku Dios, un hende mas puru ku su Kreador?

¹⁸ Dios no ta konfia ni su ayudantenan selestial, den su bista asta su angelnan por kometé falta.

¹⁹ Ki' ta para pa hende, trahá di tera, ku no ta nada otro sino stòf i mas delikado ku un mòt?

²⁰ Den un fregá di wowo nan ta plèchá. Bo n' pèrdè nan fo'i bista ku ya nan a disparsé.

²¹ Nan bida ta kaba manera ora kòrta un kabuya di wanta tènt, nan ta muri sin a konosé sabiduria.”