Job 39 - Papiamentu Bible 2013

¹ Bo sa ki ora kabritu di mondi ta wèrp? Bo t'ei pará ora biná pari su yu?

² Bo sa kuantu luna nan ta keda dek? Bo sa ki ora ta nan ora?

³ E binánan muhé ta sak abou pa pone nan yu riba suela.

⁴ E yunan ta krese, bira fuerte, sali bai, drenta kunuku, sin bolbe mas serka nan mama.

⁵ Ken a duna burik'i mondi libertat, di manera ku nan por kore rònt pa nan kuenta?

⁶ Mi a duna nan un lugá, kaminda hende no ta biba ni labra tera i kaminda yerba no ta krese.

⁷ Nan ta keda leu for di siudatnan lawai i niun hende no por mansa nan ni pone nan traha.

⁸ Nan ta rekoré seru buskando yerba, kualke yerba bèrdè pa nan kome.

⁹ Bo ta kere ku toro salbahe ke sirbi bo i pasa nochi den bo stal?

¹⁰ Bo por mara kabuya na su garganta lag'é hala karga, o pon'é lastra un balki pa paria bo tera?

¹¹ Pasobra e tin asina tantu forsa bo por konfi'é pa hasi bo trabounan pa bo?

¹² Bo por konta ku e ta bini bèk fo'i kunuku i trese bo kosecha riba bo plench'i bati trigo?

Preguntanan tokante abestrus, kabai i para di rapiña

¹³ Ounke alanan di abestrus ta bati kontentu, bo no por kompará nan ku alanan di óyevar, ku sí por bula.

¹⁴ E abestrus ta pone su webunan riba suela i ta laga nan keinta den santu,

¹⁵ sin sa ku un pata por machiká nan, ku kualke animal salbahe por plèchè nan.

¹⁶ E ta mama kurason duru pa su yunan; e ta trata nan manera yu straño i no ta import'é ku el a pone webu por nada,

¹⁷ pasobra Dios a lubidá riba dje na momento di duna sabiduria i no a dun'é niun tiki komprondementu.

¹⁸ Pero e tin mas liheresa ku kabai i ginete pareu; e ta bula lanta, saka kareda i hari nan.

¹⁹ Bo ta duna kabai su forsa o dòrna su nèk ku un klina, ku ta basha riba su lomba?

²⁰ Bo ta lag'é salta manera dalakochi, miéntras e ta supla i snùif na un manera spantoso?

²¹ E ta sapatiá ku furia, gosando su forsa; e ta ranka drenta bataya kontra armanan di enemigu.

²² E ta pil di miedu, e no konosé temor, e no sa retirá,

²³ maske kokernan di flecha ta borotá den su orea i lansa i sabla ta lombra den solo.

²⁴ Temblando di eksitashon e kabai ta ranka sali; ora tròmpèt zona e no por para ketu.

²⁵ Kada be ku e tende e zonido ei e ta grita, djaleu e ta hole e bataya i ta tende e komando, gritá p'e kabesantenan.

²⁶ Ora un para di rapiña habri su ala, pa bula bai zùit, t'abo a siñ'é bula?

²⁷ Ta riba bo komando águila ta subi bai laria i traha su nèshi te arib'ayá?

²⁸ E ta akomodá su mes den e barankanan i aya e ta drumi riba punta di su fòrti.

²⁹ Fo'i djei e ta wak si tin kuminda, e ta peilu un distansia leu.

³⁰ Kaminda tin kadaver, ei warawara ta reuní, su yunan ta bebe e sanger.’