Job 38 - Papiamentu Bible 2013

SEÑOR ta papia ku Job Promé parti dje diskurso di SEÑOR Dios ta reta Job pa kontestá su preguntanan

¹ E ora ei SEÑOR, Dios di boso antepasadonan, a kontestá Job ku stèm ku tabata sali riba e tormenta, ku a lanta:

² ‘Ken ta esun ku ta nubla e konsepto, ku Mi ke pa hende tin di Mi, papiando sin konosementu?

³ Bon antó, para manera hòmber i kontestá e preguntanan akí.

Preguntanan tokante mundu i laman

⁴ Unda bo tabata, dia Mi a basha fundeshi di mundu? Rospondé mi no, si bo por!

⁵ Ken a disidí kon grandi e mester tabata? Esei abo mester sa! Bo sa tambe ken a midi tur kos ku sinta di midi?

⁶ Riba kiko basenan di mundu ta ankrá, o ken a lant'é p'el a yega te na nòk,

⁷ miéntras streanan di mardugá tabata forma koro i henter korte selestial tabata kanta di húbilo?

⁸ Ken tabata wanta laman, ora e ker a brota fo'i skochi,

⁹ ora a bistié nubia pa paña i lor'é den skuridat profundo,

¹⁰ ora a fren'é i ser'é na kandal;

¹¹ ora a bis'é: “Te aki bo ta yega, no mas leu; aki bo olanan orguyoso tin ku wanta”?

Preguntanan tokante ourora, skuridat i Reino di Morto

¹² Nunka den bo bida bo a duna òrdu pa ourora kibra i di dia habri,

¹³ pa nan kohe mundu tene na su puntanan i sakudí tur hende malbado fo'i riba dje,

¹⁴ miéntras mundu ta kobra forma manera klei ora lora un seyo riba dje; lagando su karakterístikanan resaltá manera dibuho riba un bistí?

¹⁵ E ora ei loke pa hende malbado ta nan lus, ta kitá for di nan i nan ta pèrdè tur nan forsa pa hasi daño.

¹⁶ Bo a yega te na e brònnan, ku ta alimentá oséanonan, o kana listra den tur huki i nachi di fondo di laman?

¹⁷ A mustra bo unda portanan di Reino di Morto ta, o bo a yega di kontemplá e portanan den e skuridat, ku ta reina den abismo di morto?

¹⁸ Bo tin un idea kon inmenso mundu ta? Bisa Mi no, si bo ta kere ku bo sa!

¹⁹ Bo ta na altura kon ta yega na e lugá, kaminda lus ta biba, o skuridat ta alohá,

²⁰ di manera ku bo por hiba nan nan kas, ya ku bo konosé e kaminda wowo será?

²¹ Bo mester por sa tòg, bo n' nase e tempu ei kaba? N' ta basta aña bo tin riba e mundu akí? N' ta hende di temp'i kouchiboulo bo ta?

Preguntanan tokante shelu

²² Bo a yega di drenta den depósito pa sneu, o mira mangasinanan pa pipit'i eis,

²³ ku mi ta reservá pa usa den tempu malu, den dianan di guera i bataya?

²⁴ Kon yega na e lugá, fo'i kaminda welek ta dispersá, o kaminda bientunan di ost ta sali bai plama riba mundu?

²⁵ Ken ta habri un kanal den shelu pa áwaseru kore, bira basha i un bereda pa ronkamentu di bos pasa,

²⁶ pa por muha un tera despoblá, un desierto bandoná;

²⁷ pa sasia set di mondi será i desolá i laga yerba spreit riba dje?

²⁸ Akaso áwaseru tin tata? Ken ta engendrá gotanan di serena?

²⁹ For di ken su seno eis ta nase? Ken ta duna lus na tempu friu for di shelu,

³⁰ ora awa bira duru manera piedra, superfisie di oséano fris?

³¹ Bo por mara Shete Strea na kadena, lòs kordonnan di Orion?

³² Bo por dirigí streanan temporada tra'i temporada i guia konstelashon di Kanser i di Leo?

³³ Bo konosé e leinan ku ta goberná shelu; e mes reglanan ta konta tambe pa mundu?

³⁴ Bo por grita duna nubianan òrdu, di manera ku un lawin'i awa ta bira basha riba bo?

³⁵ Bo por komandá welek pa kòrta? Lo e kana bini i bisa bo: “Na bo òrdu!”?

³⁶ Ken ta duna e para ibis sabiduria pa anunsiá ku awa di Nilo lo subi, o ken ta duna gai e saber pa pronostiká tempu?

³⁷ Ken tin basta abilidat pa konta nubia? Ken por bòltu poronnan di awa di shelu,

³⁸ lagando stòf bira duru i klòmp'i tera pega na otro?

Preguntanan tokante bida den mondi

³⁹ Bo ta yag riba víktima pa e leon muhé i buska kuminda p'e yunan di leon,

⁴⁰ ora nan krem den nan hòl o drumi ketu warda den mondi será?

⁴¹ Ken ta proveé kuminda pa rafnan, ora nan yunan ta grita na Dios i kana dualu mort'i hamber?