Job 34 - Papiamentu Bible 2013

Di dos diskurso di Elihu Elihu ta kritiká su amigunan

¹ E ora ei Elihu a sigui:

² ‘Boso, hòmbernan tan sabí, skucha mi palabranan! Boso, hendenan tan studiá, skucha mi!

³ Pasobra hende mester averiguá, loke su orea tende; su lenga mester kùr, loke e pruf.

⁴ Ban konkluí pa nos mes loke ta hustu; ban disidí loke ta korekto den e kaso akí,

Elihu ta kritiká e pretenshon ku Job tin ku e ta inosente

⁵ pasobra Job ta bisa: “Mi ta inosente, pero ta Dios ta impedí mi di haña un trato hustu.

⁶ Maske mi tin rason, ta konsiderá mi un gañadó; maske mi ta sin falta, Dios su flecha ta okashoná un herida ku no ta kura.”

⁷ Esaki sí ta un Job! E ta hasi bofon di Dios manera nada!

Elihu ta duna testimonio di Dios su hustisia

⁸ Job ta kompinchi di malbadonan; man riba barika ku hende ku ta hasi malu.

⁹ Pasobra e ta pretendé: “Hende, ku hiba un bida manera Dios ta deseá, no ta gana nada ku esei.”

¹⁰ P'esei, skucha mi, boso ku tin asina tantu sano huisio! No biba pensa mes ku Dios ta hasi malu ku Todopoderoso ta hasi kos robes.

¹¹ Nò! E ta paga kada hende konforme su obra; E ta manda p'e loke su kondukta meresé.

¹² Ta imposibel ku Dios por hasi kos malu, ku Todopoderoso por trose hustisia.

¹³ Akaso Dios a risibí su poder di otro hende? T'un hende a enkarg'É ku mundu?

¹⁴ Si E ke kita spiritu i rosea fo'i hende,

¹⁵ n' ta tur ta muri sin eksepshon i bolbe bira stòf atrobe?

Elihu ta defendé soberania di Dios

¹⁶ Si bo tin komprondementu, skucha e kos akí! Tende loke mi ta bai bisa.

¹⁷ Ta di bèrdè bo ta kere, ku Dios por odia hustisia i tòg goberná? Lo bo kondená Dios ku ta hustu i poderoso?

¹⁸ No ta E ta bisa reinan: “Boso ta sinbèrgwensa!” i dignatarionan: “Boso ta mal hende!”?

¹⁹ Tur hende ta obra di su man, p'esei E no ta tuma parti pa lidernan di pueblo, ni no ta faboresé riku riba pober.

²⁰ Meianochi, den un fregá di wowo, nan ta muri; ta shòk nan i nan ta laga bida; poderosonan ta ranká fo'i bida sin intervenshon di man humano.

²¹ Pasobra SEÑOR su bista ta riba nan; E ta wak kada paso ku hende dal.

²² No ta eksistí niun lugá skur, ni sikiera abismo di morto, kaminda malechornan por skonde.

²³ Dios no ta revelá na hende ki ora E ta bai dagfar nan.

²⁴ E ta plama poderosonan, sin tin nodi di investigá i ta pone otro na nan lugá.

²⁵ Pasobra E ta tuma nota di nan echonan, den anochi e ta kita nan fo'i nan lugá i destrosá nan.

²⁶ Públikamente E ta kastigá nan pa nan maldat,

²⁷ pasobra nan a stòp di sigui su kaminda i no a aktu E.

²⁸ Nan a laga hende pober grita i e gritunan akí a yega te serka djE, di manera ku El a tende e lamento di esnan den mester.

^29-30 Si Dios disidí di no hasi nada mes, niun hende lo no por kritik'É. Dios ta usa asta hende mentiroso, ku ta bruha otro hende i E ta laga nan goberná nashonnan.

Elihu ta papia ku Job pa e arepentí

³¹ Tin hende ta bisa Dios: “Mi ta kulpabel, pero mi no ta bai peka mas.

³² Mustra mi mi pikánan, kometé inkonsientemente i lo mi no hasi nan mas.”

³³ Anto awor ábo, Dios mester rekompensá abo, ounke bo nenga di arepentí? Duna mi bo opinion, tòg n' t'abo ta disidí? No ámi!

³⁴ Hende ku sano huisio ta deklará, hende sabí ku ta tende mi, lo kontestá mi:

³⁵ “Job ta papia sin konosementu; su palabranan ta sin sentido.”

³⁶ Mi gran deseo ta: Mare por a tèst Job a fondo, pasobra e ta rospondé manera hende malbado!

³⁷ No ta pekadó so e ta, rebelde tambe! Nos dilanti e ta burla di Dios, diskutiendo sin fin kunÉ.’