Job 32 - Papiamentu Bible 2013

¹ Awor e tres hòmbernan a stòp di diskutí ku Job, pasobra Job a keda insistí ku e tabata inosente.

² Pero Elihu, yu di Barakel di Buz, di famia di Ram, a rabia mashá pisá ku Job, pasobra Job tabata pensa ku e ta den su derecho dilanti di Dios.

³ E tabata rabiá tambe ku e tres amigunan di Job, pasobra nan no a logra refutá Job su defensa i sinembargo nan a konden'é.

⁴ Te na e momento ei Elihu no a papia niun palabra ku Job, pasobra e amigunan tabata mas bieu kuné.

⁵ Pero ora el a mira ku e tres hòmbernan no por a rospondé nada mas, el a bira furioso.

Elihu ta haña ku e tin derecho di papia

⁶ P'esei el a bisa: ‘Ami ta hóben ainda i boso ta hende di edat mas avansá, p'esei mi tabatin miedu i no a tribi bisa boso loke mi sa.

⁷ Mi a pensa den mi mes: “Behes mester opiná; edat avansá mester instruí kiko ta sabiduria.”

⁸ Pero ta spiritu den hende, rosea di Todopoderoso, t'esei ta duna hende poder pa diserní.

⁹ Sabiduria i rekonosementu di loke ta hustu, no ta dependé ni di edat ni di eksperensia.

¹⁰ P'esei mi ta bisa: “Skucha mi i tende loke mi sa.”

Elihu ta akusá e amigunan di a faya den nan kontesta na Job

¹¹ Wak, mi a warda miéntras boso tabata papia; mi a sinta skucha boso rasoná. Miéntras boso tabata trese boso argumentonan dilanti,

¹² mi kompleto atenshon tabata pa boso. Pero niun di boso no por a refutá Job su palabranan; niun di boso no a kontestá su argumentonan.

¹³ Boso no por bini mi ku e kuenta: “Nos a haña sabiduria kaba, laga Dios i no hende kontradesié.”

¹⁴ Argumentonan di Job a sera boso boka, no di mi, ami lo no rospond'é, usando boso argumentonan.

Elihu ta mustra ku e tin ku papia sino e ta rementá

¹⁵ Job, bo tres amigunan! Ai, kampana a guli lenga! Palabra a kaba laga nan!

¹⁶ Mi mester para warda, miéntras nan ta keda ketu, sin palabra sali fo'i nan boka?

¹⁷ Mi tambe ke dòsplaka di palabra; mi tambe ke bisa loke mi sa,

¹⁸ pasobra mi kana ta yen, palabra ta choka mi!

¹⁹ Mira, mi paden ta manera saku nobo yená ku biña ku ta fermentá; kla pa rementá!

²⁰ Mi mester papia pa haña alivio; mi mester habri mi boka, rospondé.

²¹ Mi no ta tuma parti pa niun hende, ni mi no ta trastia niun hende,

²² pasobra trasteria no ta den mi. Si esei tabata e kaso, antó mi Kreador lo a kaba ku mi mesora.