Job 31 - Papiamentu Bible 2013

Job ta konkluí su diskurso final Job ta hura di keda intachabel

¹ Mi a sera un pakto ku mi wowonan pa nan no fiha ku deseo riba niun muhé,

² anto awor kiko hende por spera di Dios, ku ta den shelu? Kiko Todopoderoso tin destiná p'e?

³ No ta ruina pa e malbado, desaster pa esnan ku ta kometé inhustisia?

⁴ Dios no ta mira kon ami ta biba? E no ta sigui tur mi pasonan?

⁵ Si tin sospecho ku mi a kana den kaminda di falsedat, o a kore tras di engaño,

⁶ laga Dios pisa mi riba su balansa eksakto numa, antó E lo deklará mi inosente.

Job ta hura ku el a evitá adulterio

⁷ Si akaso mi pasonan a desviá for di e bon kaminda, si loke mi wowonan a mira, mi kurason a deseá, o si mi mannan a hasi kos robes,

⁸ laga otro kome loke mi a planta numa i otro ranka mi kosecha ku rais ku tur fo'i suela.

⁹ Si akaso un muhé a sedusí mi kurason, o si mi a lur den kas di mi bisiña pa slùip drenta serka su kasá,

¹⁰ antó mi kasá laba paña di otro hòmber numa i otro kurpa baha riba esun di dje,

¹¹ pasobra mi krímen, asina perverso, lo tabata un piká, ku a meresé sentensia.

¹² Adulterio ta manera kandela ku lo a kima, destruí mi; i ranka mi kosecha ku rais ku tur fo'i suela.

Job ta hura ku nunka e no a perhudiká hende infelis

¹³ Si akaso mi a trata kualke di mi sirbidónan inhustamente ora nan tabatin un ke otro keho kontra mi,

¹⁴ kiko lo mi mester hasi ora Dios bini pa mi? Kiko lo mi rospondé, ora E pidi mi kuenta i rason?

¹⁵ Akaso n' ta e Dios, ku a krea mi den seno di mi mama, a krea nan tambe? No ta e mes Dios ei a forma nos den barika di nos mama?

¹⁶ Si mi a yega di nenga hende pober loke nan ta deseá, o laga ku biuda no por mira solushon,

¹⁷ si mi a yega di warda mi pan pa mi so, sin kompartié ku yu sin tata,

¹⁸ — pero nò, semper mi a trata wérfano manera un tata i semper mi a defendé biudanan —

¹⁹ si mi a yega di mira ken ku ta muriendo pa falta di paña, o un hende den nesesidat sin kos pa tapa nan kurpa i mi no a hasi nada,

²⁰ antó ki mishi e hendenan akí bendishoná mi den nan kurason, pasobra mi a tene nan kurpa kayente ku lana di mi karnénan?

²¹ Si mi a yega di lanta man pa yu sin tata, sabiendo ku mi por a gana nan den korte,

²² antó mi brasa kita kai for di mi skouder i kibra den èlebog.

²³ Pero nò, mi no a hasi nada di e kosnan ei, pasobra mi tabatin miedu pa Dios no manda desaster riba mi. Antó kon lo mi por a resistí forsa di su mahestat?

Job ta nenga ku e tabatin avarisia i a kometé idolatria

²⁴ Si mi a pone mi konfiansa den oro i bisa oro puru: “T'abo ta mi seguridat!”,

²⁵ si mi tabata gosa mi gran rikesa, tur loke mi mannan mes a produsí,

²⁶ si mi a wak solo bria, luna move mahestuosamente den tur su splendor

²⁷ i si mi a laga esaki atraé mi sekretamente di manera ku mi a tira sunchi pa nan komo homenahe,

²⁸ tur e kosnan akí lo tabata pikánan, ku por a husga mi p'e, pasobra lo mi tabata infiel na Dios den shelu.

Job ta nenga ku e sa tuma vengansa, ku e no ta hospitalario i ta yen di hipokresia

²⁹ Mi no a tuma gustu den destrukshon di mi enemigu, o gosa ora el a hañ'é den problema.

³⁰ Nunka mi no a habri mi boka pa pleg'é ni pidi morto p'e.

³¹ Tur hende ku a yega di bishitá mi tènt no por afirmá ku mi wéspetnan semper a yena nan barika ku karni, ku mi a parti?

³² Niun biahero nunka no tabatin mester di pasa anochi sin dak riba su kabes, pasobra mi porta semper tabata habrí p'e.

³³ Mi no a tapa mi pikánan, manera otro hende sa hasi, mi no a skonde mi falta bou 'i mi paña,

³⁴ pasobra nunka mi no tabatin miedu di mala lenga, nunka miedu pa menospresio di parti di famia- i konosínan no a spanta mi dje tantu ei, ku mi a sera mi kurpa den kas, sin ke papia nada.

Provokashon i huramentu final di Job

³⁵ Ai, mare mi tabatin un hende pa skucha mi! Ata mi ta pone mi firma akí pa verifiká mi defensa. Laga Todopoderoso rospondé mi awor; mare esun ku ta akusá mi por a pone su veredikto riba papel!

³⁶ Lo mi a kana prònk kuné sigur, bistié manera korona riba mi kabes.

³⁷ Lo mi a dun'é kuenta i rason di kada kos ku mi a hasi; lo mi a kana yega serka dje ku kara na laria.

³⁸ Si mi tera ta sklama na shelu kontra mi i si tur su riolnan ta yená ku lágrima,

³⁹ si mi no a duna hende nan pago hustu o si mi a laga trahadónan di kunuku púluwe, sin mizerikòrdia,

⁴⁰ antó mata di sumpiña nase na lugá di trigo, yerba shimaron na lugá di sebada.’ Esaki ta fin di Job su diskurso.