Job 3 - Papiamentu Bible 2013

Promé diskurso di Job Job tin duele ku el a nase Job ta maldishoná e dia ku el a nase

^1-2 Finalmente Job a habri su boka i maldishoná e dia ku el a nase, bisando:

³ ‘Maldishoná sea e dia ku m'a nase, pió ainda, e anochi ku un yu hòmber a keda konsebí den barika di mi mama.

⁴ Pa mi parti e dia ei keda tapá ku skuridat, Dios ayariba keda sin buska su drechi mas i solo no sali p'e hamas.

⁵ Mare skuridat di abismo di morto por poderá di dje numa, nubianan pretu hala sera riba dje i sukú torment'é.

⁶ Mare e anochi ku mi mama a konsebí mi por pèrdè den un skuridat sin fin, mare e no por konta mas komo dia di aña, pió ainda, mare por kit'é mes fo'i riba tur kalènder.

⁷ Mare matris di niun otro muhé no por habri riba fecha dje anochi ku mi mama a konsebí mi, mare e por ta un anochi sin gritu di alegria.

⁸ Mare hende ku sa plega, plegadónan poderoso ku poder asta riba Leviatan por pone boka riba dje.

⁹ Mare streanan di mardugá a keda sin sali. Mare rayo di ourora a keda sin pinta na horizonte, e ora ei e anochi lo a keda warda sin fin riba kibrá di dia.

¹⁰ Maldishoná sea e anochi ei, pasobra pa mi mala suerte matris di mi mama no a keda será; e anochi ei no a hasi nada pa salba mi di tantu mizeria.

Job ta keha ku su bida ta insoportabel

¹¹ Di kon mi no a muri na momento di mi nasementu, mi no a stek ora m'a slep sali for di seno di mi mama?

¹² Di kon tabatin skochi pa zoya mi i pechu pa alimentá mi?

¹³ Si m'a muri lo mi tabata sosegá den graf, lo m'a drumi trankil,

¹⁴ huntu ku reinan i konseheronan di mundu, huntu ku reinan di Asiria ku a gaba rekonstrukshon di nan palasionan, awe na ruina,

¹⁵ huntu ku prínsipenan ku tabata biba den rikesa i tabata yena nan palasionan ku oro i plata.

¹⁶ Pakiko n' pusha mi den tera, n' dera mi manera yu ku a nase morto, mucha ku nunka n' mira lus di dia?

¹⁷ Den tera kaminda tur instigashon di mala fe ta kaba i tur ku ta morto kansá ta haña sosiegu.

¹⁸ Ei katibunan tambe lo gosa di nan trankilidat; nan no ta tende gritunan di bomba mas.

¹⁹ Tantu e hòmber chikí komo e shon importante lo resultá ei, katibu lo ta liber di su shon.

²⁰ Di kon ta duna esnan den mizeria lus i esnan ku alma amargá bida?

²¹ Nan ta anhelá e morto, ku no ke bini, nan ta preferá koba nan mes graf na lugá di koba pa buska tesoro skondí.

²² Alegria ta yega pa hende asina, ora ku porfin nan por baha den graf.

²³ Di kon hende ku no a haña kapasidat, pa skohe su mes kaminda ta haña bida, hende ku nan bida ta resultá sin salida, pasobra Dios den shelu a serka nan?

²⁴ Pasobra mi ta tene rou na lugá di kome i mi ta keha konstantemente.

²⁵ Loke mi tabatin hopi miedu di dje ta pasa mi awor, loke semper a yena mi ku teror ta basha bini riba mi.

²⁶ Mi no tin ni sosiegu ni trankilidat, e angustia den mi paden no ta duna mi or'i porta.’