Job 26 - Papiamentu Bible 2013

Job ta interumpí diskurso di Bildad i ta hasié ridíkulo

¹ E ora ei Job a rospondé:

² ‘Esta un bon manera di yuda hende, un hende pober i débil manera mi!

³ Esta bon bo ta duna hende sin sabiduria konseho! Bo gran sabiduria frankamente a laga mi babuká!

⁴ Ken a yuda bo ku e palabranan bunita ei? Ken a inspirá bo pa bo papia asina?’

Bildad ta sigui ku su diskurso Grandesa di Dios

⁵ Bildad a kontinuá: ‘Spiritu di hende morto ta tembla pa Dios manera bara bèrdè, habitantenan di lamannan bou di tera tambe.

⁶ Reino di morto ta hanchu habrí p'E, eiden nada no ta keda skondí p'E.

⁷ Den e espasio bashí parti nort Dios a span shelu i El a pone mundu kaminda no tabatin nada pa want'é.

⁸ E ta retené awa den nubia sin ku nan sker.

⁹ E ta tapa su trono ku kapa di nubia diki.

¹⁰ E ta pinta e sírkulo di horizonte riba laman i aki lus di dia ta kambia bira anochi.

¹¹ Ora Dios menasá, serunan ta tembla di miedu, serunan manera pilá ku ta karga shelu.

¹² El a dominá laman ku su forsa; El a derotá e mònster Rahab ku su sabiduria.

¹³ Ku su rosea El a supla riba firmamentu, lag'é limpi limpi i El a bora e mònster yangadó di laman mata.

¹⁴ Tur loke m'a trese dilanti ta djis un punta di loke Dios a hasi; tur loke nos a tende ta djis un vrunvrun! Imaginá bo kon zonido poderoso di su poder por aplastá nos.’