Job 24 - Papiamentu Bible 2013

Job ta keha ku hende malbado ta eksplotá hende pober

¹ Di kon Dios Todopoderoso no ta fiha un fecha, pa husga hende malbado? Pakiko ni su siguidónan di mas fiel no sa riba kua dianan E ta dikta sentensia?

² Tin hende ku ta hala e pènchinan di nan propiedat, pa haña mas tereno; nan ta kohe bestia di otro hende laga nan kome yerba den nan kunuku i konsiderá nan di nan.

³ E úniko buriku ku un wérfano tin, nan ta hòrta fo'i dje; e úniko bestia ku un biuda tin pa traha kunuku p'e, nan ta eksigí komo pant.

⁴ Nan ta asta pusha hende pober fo'i riba kaminda; e pober no tin niun derecho. Delaster un pipit'i hende ku ta pertenesé n'e grupo mizerabel akí, mester buska un lugá di skonde.

⁵ Manera buriku di mondi e pobernan akí ta kana rondia kuminda den lugánan desolá, niun otro kaminda nan n' ta haña ko'i kome pa nan yunan.

⁶ Nan tin ku piki kos den kunuku bashí pa nan kome, o buska manera di frifri algu den hòfinan di wendrùif di nan eksplotadónan.

⁷ Nan tin ku kai drumi blo sunú, sin paña pa protegé nan kontra friu.

⁸ Áwaseru friu ta bira basha riba nan, muha nan papa muhá i komo nan no tin lugá di skonde, nan ta brasa baranka di piedra pa nan haña un tiki kalor.

⁹ Sierto malbado ta ranka yu sin tata fo'i pechu di nan mama. Pasobra hende debe nan i no por paga, nan ta abusá di nan.

¹⁰ Hende pober ta kana blo sunú, nan lomba kargá ku kos di kome, nan barika blo bashí.

¹¹ Nan ta drei piedra di mulina pa saka zeta, ta machiká drùif pa traha biña tanten ku nan mes ta muri di set.

¹² Gritu di ansha ta sali for di siudat, gargantanan heridá ta sklama: “Abusu! Ousilio!” Sinembargo Dios no ta hasi kaso di e abusunan akí.

Job ta deskribí krímennan di hende malbado, kometé den skuridat

¹³ Tin hende ku ta odia klaridat, nan no konosé kamindanan iluminá ni no ta keda riba beredanan di lus.

¹⁴ Ora ta sukú ainda e asesino ta lanta pa mata hende pober i den nesesidat; den anochi e ta bira ladron.

¹⁵ Bista di hende ku ta kometé adulterio ta fihá riba skuridat ku ta drenta; su pensamentu ta: “Niun wowo no ta mira mi,” i e ta tapa su kara pa nan no rekonosé.

¹⁶ Den anochi ladronnan ta drenta kas, via buraku ku nan ta habri den muraya; di dia nan ta skonde nan n' sa mes kon lus di dia ta.

¹⁷ Pa nan lus di dia ta skuridat, kosnan hororoso den anochi ta nan kompinchi.

Deskripshon di destino di hende malbado i di huisio di Dios

¹⁸ Awa ta lastra hende malbado bai kuné. Maldishon di Dios ta kai riba su tera i niun hende no ta traha den su hòfi di wendrùif mas.

¹⁹ Manera kalor i sekura ta guli sneu ku a dirti, asina graf ta guli hende ku a hasi piká.

²⁰ Ni su mama mes ku a parié, no ta kòrda riba dje mas; bichi ta kom'é tur limpi i ta kap e bent'abou manera un palu morto.

²¹ Asina ta sosodé ku hende ku ta laga muhé infértil pasa den skual i ku no tin sintimentu pa biuda.

²² Pero Dios tin forsa pa deshasí dje tiranonan akí, Dios ta tuma su desishon i ayó malbado!

²³ Podisé E ta laga nan ketu den nan kreensia ku nan ta seif, pero su bista ta sigui kada paso ku nan dal.

²⁴ Hende malbado ta bira prominente pa sierto tempu so, pero despues nan ta disparsé. Pasobra ta kòrta nan manera yerba shimaron i nan ta seka i bira manera tapushi kòrtá fo'i pal'i maishi.

²⁵ Ken ta tribi bisa ku mi ta gaña? Tin hende ku por refutá mi?’