Job 21 - Papiamentu Bible 2013

Job ta rospondé Job ta pidi su amigunan skuch'é

¹ E ora ei Job a rospondé:

² ‘Si boso a skucha mi palabranan ku atenshon, esei lo tabata e konsuelo di mas grandi ku boso lo por a duna mi.

³ Tene pasenshi ku mi ora ámi ta papia; ora mi kaba, sigui hasi bofon di mi numa!

⁴ Ta hende ta mi problema antó? Nò! P'esei mes mi t'asin'akí!

⁵ Si boso skucha ku atenshon, ki ta mi problema, boso ta keda babuká.

⁶ Ora mi sinta pensa riba dje, mi ta desanimá i mi ta tembla manera bara bèrdè.

Job ta pretendé ku hende malbado ta felis

⁷ Di kon hende, ku bira lomba pa Dios, ta biba largu, alkansá un edat altu i krese den prestigio i poder?

⁸ Nan lo mira nan yu 'i yunan krese i gosa di seguridat na nan lado.

⁹ Nan ta biba trankil den nan kas, sin miedu; Dios no ta usa su bulpes nunka pa kastigá nan.

¹⁰ Kada be ku toro di un hende malbado dèk e bakanan nan tur ta bira dek; ora nan wèrp, nunka nan no ta pèrdè yu.

¹¹ E yunan chikí dje hende malbado por pèrmití nan e luho di belenkiá i bula manera lamchi;

¹² nan ta kanta ku muzik di tamburein i lira i ta dibertí nan mes riba zonido di flùit.

¹³ Despues di a gosa plenamente di bida, hende malbado ta baha trankil pa sawaka.

¹⁴ Nan ta bisa Dios: “Bai, hala kita! Bo n' tin ku siña nos kon nos mester biba.

¹⁵ Ta ken Todopoderoso ta, ku nos mester sirbiÉ? Kiko nos ta gana ku resa n'E?”

¹⁶ Pero no kere ku hende malbado ta determiná nan mes bienestar. Ami sí no ta pensa esei!

Job ta pretendé ku hende malbado no ta haña kastigu

¹⁷ Akaso nunka lus sa paga den nan kas, desgrasia sa baha riba nan antó? Akaso nunka Dios sa rabia ku nan i pone nan sufri?

¹⁸ Kuantu be boso a yega di mira nan manera plushi den bientu, manera bagas ku warwarú ta hisa bai kuné?

¹⁹ Boso ta konvensí ku Dios ta wanta e kastigu pa despues lag'é kai riba kabes di nan yunan; ami sí ta pensa ku Dios por a bien kastigá nan mes, ya nan ta siña!

²⁰ Nan mester eksperensiá nan mes desgrasia, pruf e vengansa di Dios Todopoderoso nan mes.

²¹ Ki nan tin kunes loke pasa nan famia, despues ku nan mes a muri kaba?

²² Akaso hende por duna Dios konosementu, e mes Dios ku ta husga asta esnan den shelu huntu kuné?

²³ Tin hende ta keda bon di salú te dia nan muri; na pas i sin miedu di nada,

²⁴ yen di prosperidat, perfektamente bon di salú.

²⁵ Otro, al kontrario, ta biba amargá, sin nunka a purba felisidat.

²⁶ Pero al fin i al kabo, nan tur lo resultá bou di tera, tapá ku bichi.

Job ta pretendé ku hende malbado ta biba bon i ta haña un entiero yen di honor

²⁷ Ai sí, mi konosé boso pensamentu i boso kòmplòtnan pa perhudiká mi.

²⁸ Pasobra boso ta puntra: “Unda e tirano ei su kas a keda antó?”

²⁹ Boso no a kuestioná biaheronan nunka? Boso no a pone atenshon na loke nan a konta:

³⁰ ku ora Dios rabia, E ta manda desaster, pero hende ku a bira lomba pa Dios sí ta sali ileso

³¹ Niun hende no ta tribi denunsiá komportashon di hende malbado i niun hende no ta tribi kastig'é pa loke el a hasi.

³² T'asina ku asta ora hende malbado muri, e ta haña un entiero ku e no meresé, su graf lo ta bon kuidá,

³³ i lo e sosegá dushi bou di tera. T'esei a sosodé ku hopi promé kuné i lo sosodé ku hopi ku ta bini despues.

³⁴ Ta kon boso ta kere di por konsolá mi antó ku palabra bashí? Boso manera di rasoná no ta bon.’