Job 17 - Papiamentu Bible 2013

¹ Forsa a bandoná mi, mi dianan ta kontá, graf ta yama mi.

² Mi tin sigur ku tur hende ta hasi bofon di mi i mi tin ku soportá.

Job ta pidi Dios asept'é para bòrg pa su mes

³ Dios, aseptá mi para bòrg pa mi mes, akaso tin otro hende ku ke hasié pa mi?

⁴ Bo a tapa sintí di mi atversarionan, anto awor bo ke laga nan triunfá riba mi?

⁵ Si un hende traishoná su amigu buskando su mes probecho, su yunan ta karga konsekuensia.

Job ta keha, pasobra hende ta kere ku e ta sin Dios.

⁶ Mi nòmber ta den boka di pueblo, ku ta skupi den mi kara.

⁷ Mi wowonan kasi no ta mira dje grandi ei mi pena ta; mi brasa- i pianan t'asina flènguèflènguè, ku ni sombra nan n' ta tira.

⁸ Hende hustu ta spanta pa mi destino; — esta intachabel nan sí ta — nan ta tira na mi kara ku mi no ta fiel na Dios.

⁹ Nan ta sigui nan kaminda; nan man limpi ta haña dia pa dia mas forsa.

¹⁰ Laga nan tur presentá aki i lo mi no haña den nan niun solo hende sabí.

E úniko speransa di Job ta: muri.

¹¹ Mi dianan ta kontá, mi plannan tur desbaratá, deseonan di mi kurason tambe.

¹² Si mi por bai tras di mi amigunan, anto mi anochi por bira di dia. Nan ta bisa ku ta pinta un klaridat, pero ami sa, ku mi ta keda den skuridat.

¹³ Si graf ta e úniko lugá ku mi por yama mi kas i ei den skuridat ya mi kama ta drechá,

¹⁴ si mi por yama buraku den santana “Tata” i bichi “Mama” o “Ruman stimá”,

¹⁵ unda antó mi speransa a keda? Ken por mustra mi algu ku meresé konfiansa ainda?

¹⁶ Akaso e speransa ei tin ku baha den graf pareu ku mi, sosegá den stòf huntu ku mi?’