Job 16 - Papiamentu Bible 2013

Job ta keha ku su amigunan ta konsoladónan di awa dushi

¹ Job a rospondé:

² ‘Mi ta fadá di tende e palabranan akí! Ta konsoladó di awa dushi boso ta!

³ Ki dia ta yega un fin na e blablamentu ei sin pia sin kabes? Ki mania di bo esei di keda pusta boka ku mi?

⁴ Ami na boso lugá, tambe lo por a papia meskos ku boso. Mi tambe lo por a pega palabra bunita na otro pa bisa boso, sakudiendo mi kabes ku duele.

⁵ Lo mi por a duna boso kurashi, ku boka so sí, hasiendo un esfuerso pa dominá mi lepnan ku l'a tembla.

⁶ Tantu bal papia o keda ketu, tòg mi doló no ta haña alivio.

Job ta keha ku Dios ta trat'é ku violensia

⁷ Awor sí ta di bèrdè mes Dios a kaba ku mi forsa. Dios, Bo a laga tur mi hendenan hororisá di spantu.

⁸ Bo a humiliá mi i esei ta demostrá ku Bo ta kontra mi; mi mizeria ta prueba di mi kulpa.

⁹ Dios ta gruña, saka djente bora mi ku su mirada; E ta sker mi den su rabia.

¹⁰ Hende ta hasi bofon di mi. Pa mustra nan menospresio nan ta dal mi bòftá i ta sera grupo pa ataká mi.

¹¹ Dios a entregá mi den man di un bandidu, benta mi den gara di hende malbado.

¹² Tur kos tabata bai bon ku mi, pero El a machiká mi; El a kohe mi tene na mi pal'i garganta i spat mi na pida pida. E ta usa mi pa su blanko;

¹³ su tiradónan di flecha a rondoná mi. Su flechanan a traspasá mi higra pero E no a sinti niun tiki kompashon; mi higra a basha su hal riba suela.

¹⁴ E ta bula riba mi manera guerero, heridá mi kada be di nobo.

¹⁵ Paña di rou a bira mi di dos kueru i mi a hinka mi kabes den stòf.

¹⁶ Mi wowonan ta hinchá di yora, nan ta pretu bou di nan,

¹⁷ pasobra mi mannan nunka no tabata violento i mi orashon na Dios tabata sinsero.

¹⁸ O tera, no tapa mi sanger; mare mi gritu por keda sklama pa hustisia.

¹⁹ Na e momento akí mes mi tin un testigu den shelu, sí, ayariba mi abogado ta boga pa mi.

²⁰ Mi amigunan ta trata mi ku despresio, miéntras mi ta yora na Dios.

²¹ Pero mi abogado sí ta boga pa mi serka Dios, manera pa un amigu.

²² Mi dianan ta kontá, mi tin ku kohe e kaminda sin regreso.