Job 12 - Papiamentu Bible 2013

Job ta dirigí su mes na su amigunan Job ta pretendé ku e ta mes sabí ku su amigunan

¹ E ora ei Job a rospondé:

² ‘Ai sí, boso ta, sin duda, e delaster sabionan; dia boso muri sabiduria a kaba!

³ Mi tambe tin sintí, meskos ku boso, mi no ta inferior na boso. Akaso boso ta kere, ku loke boso a bini kuné ta kos nobo?

⁴ Mi a para bira pantomina di mi amigunan, ami, un hòmber ku sa resa na Dios i haña kontesta. Ami, un hòmber hustu, sin mancha, a para bira pantomina.

⁵ Esnan ku no sa pasa den skual ta pensa: “Ban pone salu riba su heridanan, ban dal e hòmber akí bash'abou, awor ku e ta tambaliá.”

⁶ Hende violento ta gosa di pas i trankilidat, hende ku ta provoká Dios, ta seif, ta parse ku nan ta pone Dios hasi loke nan ke.

Dios a duna asta bestia sabiduria

⁷ I ainda boso ta tribi bisa mi: “Puntra bestia, nan ta siña bo, puntra para den laria, nan ta bisa bo,

⁸ o papia ku tera i e ta instruí bo, ku piská den laman i nan ta informá bo.

⁹ Kua di nan no sa ku ta man di SEÑOR a hasi esaki?

¹⁰ Bida di tur kriatura i rosea di henter humanidat ta den su man.

¹¹ Akaso hende no mester averiguá loke su orea tende, manera lenga mester kùr loke e pruf?

¹² Job, serka bieunan tin sabiduria, komprondementu ta bini ku edat.”

Job sa ku Dios tin poder pa hasi loke Dios ke

¹³ Pero Dios, ku tin sabiduria, tin poder tambe. E tin sintí i konosementu.

¹⁴ Loke Dios destruí, niun hende no por rekonstruí, hende ku E pone prezu, no ta sali liber mas.

¹⁵ Si Dios wanta áwaseru, tera ta seka, si E manda yobida, e ta inundá tur kos.

¹⁶ Dios ta fuerte, semper viktorioso; kriminal o víktima, tur ta someté na su poder.

¹⁷ Konseheronan, E ta pone marcha, tur plumá, i fo'i huesnan E ta kita kapasidat pa diserní.

¹⁸ Fo'i kurpa di reinan, E ta kita paña real i bisti nan lantera di katibu.

¹⁹ Saserdotenan E ta pone marcha, tur plumá, i na outoridat establesí E ta pone un fin.

²⁰ E ta tapa boka di hende ku pueblo ta konfia; E ta kita bon huisio for di ansianonan.

²¹ E ta kubri hende altu ku bèrgwensa i kibra forsa di poderosonan.

²² Dios ta revelá profundidatnan skur, skuridat di graf E ta klara.

²³ E ta hasi nashonnan grandi i E mes ta destruí nan; E ta plama nan i E mes ta guia nan.

²⁴ E ta kita sano huisio for di lidernan di pueblo, nan ta bruha i pèrdè kaminda.

²⁵ Nan ta kana zeilu, manera hende fuma i nan ta tira man pa fula kon kana den skuridat.