Job 11 - Papiamentu Bible 2013

Promé diskurso di Sofar Sofar ta bisa ku Dios no a kastigá Job manera el a meresé

¹ E ora ei Sofar di Naama a rospondé:

² ‘Mester kontestá un hende ku un boka asina grandi, sino e ta kapas di kere, ku e tin rason.

³ Job, bo ta kere ku niun hende no por kontrarestá bo papiamentu sin pia sin kabes; ku niun hende no por pone bo kabes pareu, ora bo ta pil hende?

⁴ Bo ta pretendé ku bo punto di bista ta korekto i ku bo no tin nada di skonde pa Dios?

⁵ Ai, mare Dios por habri su boka i papia direktamente ku bo.

⁶ Mare E por splika bo kuantu sabiduria impenetrabel E tin, kon inkomprensibel tur kos ku E hasi ta. E ora ei lo bo realisá ku ni kastigá E no a kastigá bo sufisiente pa loke bo a hasi.

Sabiduria di Dios ta surpasá Job su komprondementu

⁷ Bo ta kere ku bo por sondia Dios, ku bo por deskubrí límite di Dios Todopoderoso?

⁸ Ki bo ke men antó? Su grandesa ta surpasá shelu altu. Ki bo ta kere? Su poder ta yega te den reino di morto.

⁹ Grandesa di Dios ta mas hanchu ku mundu, mas amplio ku laman.

¹⁰ Si Dios pasa kasualmente, E haña gana di arestá bo i hiba bo dilanti di hues, ken por stòp E?

¹¹ Pasobra Dios sa ken ta engañoso i ora E mira piká di hende E no ta sera wowo p'e.

¹² Pero asta un hende kabes di pal'i maishi por haña sintí; al fin i al kabo no ta tur hende na kuminsamentu ta tèrko manera burik'i mula?

Sofar ta sigurá Job ku si Job renunsiá su maldat, Dios ta rekompens'é

¹³ Job, si abo habri bo kurason pa Dios, bo habri bo plant'i mannan i alsa nan den orashon,

¹⁴ si bo laba bo man sushá ku piká, i no laga maldat drenta bo kas,

¹⁵ e ora ei bo por kana kara na laria, bo por para firme i sin miedu.

¹⁶ Bo ta lubidá bo problema sigur, e ta bira un rekuerdo bago, manera awa den roi ku a pasa bai.

¹⁷ Bo bida lo bria mas ku solo di mèrdia bo oranan di mas skur lo ta manera ourora.

¹⁸ Lo bo tin seguridat, pasobra tin speransa pa bo; Dios lo protegé bo i lo bo por sosegá sin miedu.

¹⁹ Bo por kai drumi trankil sin niun hende spanta bo; i hopi hende lo kalanchá bo pa optené fabor.

²⁰ Pero si un hende bira lomba pa Dios, e no por biba komprondé loke pasa kuné. E no ta sintié sigur niun kaminda, morto ta su úniko speransa.’