Job 10 - Papiamentu Bible 2013

Job ta akusá Dios di ta inhustu ku su kriaturanan

¹ Mi ta fadá di biba; mi ta bai deshogá mi, trese mi kehonan dilanti i saka tur amargura ku mi alma ta sinti.

² Mi ta bai bisa Dios: No kondená mi, Dios. Bisa mi di kon Bo ta akusá mi.

³ Bo gusta oprimí mi? Bo ta despresiá trabou di bo propio man, tanten ku intriga di hende malbado sí Bo ta gosa?

⁴ Akaso Bo ta mira kosnan manera hende ta mira nan? Bo bista riba nan n' ta mas amplio ku di nos?

⁵ Akaso bo bida ta mes kòrtiku ku di nos, Bo ta mortal, manera nos, hende?

⁶ Pakiko Bo ta rondia tur mi pikánan antó i skrudiñá kada falta ku mi tin,

⁷ ounke Bo sa ku mi no ta kulpabel i ku niun hende no por libra mi di bo poder?

Job ta akusá Dios ku E ta vigilá Job pa destruyé

⁸ Bo mannan mes a modelá i forma mi, akaso e mes mannan ei ku a hasi mi un obra asina presioso, awor ke destruí mi?

⁹ Kòrda ku Bo a modelá mi manera klei, awor Bo ke hasi mi stòf atrobe?

¹⁰ Bo a laga mi kurpa forma manera ora lechi kuaha bira keshi;

¹¹ Bo a hinka mi den otro ku wesu i múskulo, Bo a lora nan den karni i tapa nan ku kueru.

¹² Bo a duna mi bida i amor. Mi tabata bou di bo protekshon.

¹³ Sinembargo bo intenshon a keda skondí; awor mi sa ki plan Bo tabatin:

¹⁴ Bo tabata sinta vigilá ki ora mi ta peka, pa Bo nenga mi bo pordon.

¹⁵ Asina mi peka m'a kohe awa serka Bo, pero te na ora mi hasi loke ta bon mes, mi tin ku kana kabes abou. Mi no ta solamente yená ku tristesa, nò, mi ta hogá den aflikshon.

¹⁶ Si mi hera kana kara na laria, Bo ta yag riba mi manera leon; i Bo ta asta hasi kosnan maravioso djis pa tormentá mi.

¹⁷ Bo ta keda ataká mi pa pone mi sufri i bo rabia kontra mi ta krese kada be mas. Bo ta manda problema pa mi manera sòldánan deskansá, fresku pa bataya.

Job ta pidi Dios pa lag'é na pas, pasobra tòg e ta serka di muri

¹⁸ Dios, pakiko Bo a laga mi nase? Mihó m'a muri promé ku wowo di hende a mira mi,

¹⁹ e ora ei lo mi no a eksistí nunka i lo a saka mi fo'i den barika di mi mama, hiba graf.

²⁰ Mi bida n' ta basta kòrtiku kaba? Laga mi na pas, podisé e ora ei mi por tin un tiki alegria

²¹ promé ku mi bai e lugá sin regreso, e pais di tiniebla i sombra di morto,

²² e pais ku skuridat profundo, di abismo pretu i di káos, kaminda asta klaridat ta skur.’