Isaías 39 - Papiamentu Bible 2013

Ezekías ta risibí un delegashon di Babilonia

¹ Den e tempu ei rei Merodak-Baladan, yu di Baladan, rei di Babilonia, a manda mensahero ku karta i regalo serka Ezekías, komo el a tende ku Ezekías a kaba di lanta for di kama di malu i ku e tabata rekuperando.

² Ezekías a skucha nan i a laga nan weta tur su kambernan di warda tesoro, su plata, oro, perfume i zeta kostoso, henter su depósito di arma i tur loke e tabatin wardá den su depósitonan. No tabatin nada den su palasio ni den su reino ku e no a mustra nan.

³ E ora ei profeta Isaías a bai serka rei Ezekías i a puntr'é: ‘Kiko e hòmbernan ei a bin papia ku bo i di unda nan a bini?’ Ezekías a kontestá: ‘Nan a bini serka mi for di un pais mashá leu, di Babilonia.’

⁴ Isaías a puntra: ‘Kiko nan a weta den bo palasio?’ Ezekías a kontestá: ‘Nan a weta tur kos ku tin den mi palasio; no tin nada den mi kambernan di warda tesoro ku mi no a mustra nan.’

⁵ Isaías a bisa Ezekías: ‘Skucha palabra di SEÑOR soberano:

⁶ “Tende un kos akí, ta yega un tempu ku nan lo bai Babilonia ku tur loke tin den bo palasio, tur loke bo antepasadonan a spar te dia djawe. Nada lo no keda atras,” SEÑOR ta bisa.

⁷ “Nan lo bai Babilonia ku algun di bo desendientenan, bo mes sanger, pa nan sirbi komo funshonario di korte na palasio di rei di Babilonia.” ’

⁸ Ezekías a kontestá Isaías: ‘E mensahe di SEÑOR, ku b'a trese pa mi ta bon.’ Pasobra el a pensa: ‘Tòg lo tin pas i seguridat durante mi bida.’