Isaías 38 - Papiamentu Bible 2013

Enfermedat i kura di Ezekías

¹ Den e tempu ei Ezekías a bira malu pa muri. Profeta Isaías, yu di Amoz, a bai serka dje i bis'é: ‘Asina SEÑOR ta bisa: “Duna bo famia bo último instrukshonnan, pasobra bo dianan ta kontá. Bo no ta bira bon mas.” ’

² Ezekías a bira kara pa muraya i resa na SEÑOR:

³ ‘Ai SEÑOR, kòrda ku mi a sirbi Bo fielmente i di henter mi kurason i ku mi a hasi loke ta bon den bo bista.’ Despues el a grita yora.

⁴ Despues Isaías a haña un palabra di SEÑOR:

⁵ ‘Bai partisipá Ezekías ku SEÑOR, Dios di su antepasado David, ta bisa: “Mi a skucha bo orashon i a mira bo lágrimanan; p'esei Mi ta duna bo diessinku aña mas di bida.

⁶ Ademas Mi ta salba abo i e siudat akí for di gara di rei di Asiria. Mi ta protegé e siudat akí.”

⁷ SEÑOR ta duna bo un señal pa mustra bo ku E ta tene su mes na su palabra:

⁸ “Mira, lo Mi laga e sombra ku ta marka posishon di solo riba e trapi di Ahas, hala dies tret patras.” ’ I asina a sosodé.

Kanto di rei Ezekías

⁹ Dia rei Ezekías di Huda a rekuperá di su malesa el a skibi lo siguiente:

¹⁰ ‘Mi di: “Den flor di mi bida mi tin ku laga kai, pasa portanan di reino di morto i keda privá di mi sobrá añanan.”

¹¹ Mi di: “Nunka mas lo mi n' mira SEÑOR den tera di bibunan; nunka mas mi tampoko, manera esnan den mundu di sombra, lo no fiha mi bista riba hende nunka mas.

¹² Ta basha mi kas abou, kit'é fo'i mi, manera ta baha tènt di wardador. Ya m'a entregá mi bida kaba.” M'a lor'é manera trahadó di tela ta lora e pida paña ku el a traha; ta kòrta so SEÑOR ta'tin ku kòrta e delaster hilu. E por a kaba ku mi bida promé ku anochi a sera.

¹³ Ya m'a imaginá mi kaba: Ora di dia habri, E ta habraká mi wesunan manera leon. E ta kaba ku mi bida promé ku anochi sera.

¹⁴ Manera gritu suak di un souchi òf di un para di paso, manera keho di un palomba, asina mi stèm a zona. Mi wowo tabata kansá di fiha na shelu: Señor, mi ta sinti mi anshá, sali pa mi!

¹⁵ Kiko mi por bisa? El a papia i kumpli ku su palabra. Mi ta pasa tur mi añanan sufriendo amargamente, un pia un pia mi ta lastra bai.

¹⁶ O Señor, despues di tur loke a pasa i tur loke B'a primintí mi, rebibá mi spiritu! Duna mi mi salú, laga mi biba!

¹⁷ Sigur, mi sufrimentu tan amargo tabata pa mi mes bon. Bo a rondoná mi ku bo amor tierno, salba mi for di graf i tira tur mi pikánan tra'i bo lomba.

¹⁸ Reino di morto no por alabá Bo, Lamuèrtè no por proklamá bo grandesa. Esnan ku a baha den graf no ta konta mas ku bo fieldat.

¹⁹ Ta hende bibu so por alabá Bo, manera ami ta hasi awor akí. Tatanan ta siña nan yunan kon fiel Bo sa ta na hende.

²⁰ SEÑOR ta para kla pa yuda mi, p'esei nos lo toka arpa tur dia di nos bida den tèmpel di SEÑOR.’

²¹ Isaías a bisa: ‘Laga nan kohe un kataplan di figo i pon'é riba e postema i Ezekías lo kura.’

²² Promé ku Ezekías a bira bon, el a puntra Isaías: ‘Kiko ta e señal ku mi por bai tèmpel atrobe?’