Isaías 21 - Papiamentu Bible 2013

Profesia riba kaida di Babilonia

¹ Dios ta bai baha pisá riba Babilonia, e Desierto na Riu. Manera warwarú ku ta ranka bini for di desierto, asina desaster ta bini for di sabana, for di un pais spantoso.

² Teribel ta loke Dios ta laga mi mira i tende! Elamitanan, ataká! Habitantenan di Media, sitia e siudat! Tòg traidor sa traishoná, destruktor sa destruí! Mi ta bai pone un fin na tur kehamentu ku Babilonia ta okashoná.

³ P'esei mi paden ta kue kram, doló ta dal mi manera e ta dal un muhé na parto. Mi kurason ta krem pa loke mi ta tende, mi ta sobresaltá pa loke mi ta mira.

⁴ Mi kurason ta bati duru, sustu ta drenta mi; nochesitu su freskura, ku tantu mi gusta, ta motibu di spantu pa mi.

⁵ Mi ta mira: na Babilonia ta drecha mesa ta habri tapeit, ta kome i bebe… i diripiente un gritu: ‘Lanta òfisirnan, seba eskudonan!’

⁶ Pasobra Señor a bisa mi: ‘Pone un sentinela i lag'é mèldu tur loke e mira!

⁷ Si e mira garoshinan di guera, halá pa dos kabai, i hòmber riba buriku i kamel, e mester paga tinu, bon tinu.’

⁸ E ora ei e sentinela a grita: ‘Mi Shon, henter dia di Dios mi ta pará riba mi toren di vigilansia; nochinan largu mi ta tene warda fielmente.

⁹ I até, awor sí, ata un hòmber ta bini aya riba un garoshi di guera, halá pa dos kabai. El a anunsiá: “Babilonia a kai! Sí, kai el a kai! Tur imágen di nan diosnan ta bentá abou, kibrá na wèrki!” ’

¹⁰ Mi pueblo, trapá manera maishi batí riba plenchi, mi a anunsiá boso loke SEÑOR soberano, Dios di Israel, a bisa mi.

Un profesia kontra Edom

¹¹ Dios ta bai baha pisá riba Duma. Mi ta tende un gritu for di Seír: ‘Guardia, kuantu mas falta pa di dia habri? Guardia, kuantu mas falta pa di dia habri?’

¹² I e guardia ta kontestá: ‘Di dia ta habri sigur, pero awor ainda ta anochi. Si ta un kontesta bo ke, anto bini bèk un be mas.’

Profesia kontra Arabia

¹³ Hòmbernan di Dedan, keda pasa anochi ku boso karavananan den mondi di Arabia.

¹⁴ Habitantenan di Tema, hiba awa pa e dedanitanan, morto di set; duna e fugitivonan akí di kome,

¹⁵ pasobra hui nan ta hui pa spada, p'e spada sunú i p'e bog armá, pa furia di guera.

¹⁶ T'esaki Señor a bisa mi: ‘Denter di un aña sin kita sin pone, grandesa di Kedar lo kaba na nada.

¹⁷ Loke sobra di dje, di su famoso tiradónan di flecha i sòldánan entrená, lo no nifiká gran kos.’ T'asina SEÑOR, Dios di Israel mes, a bisa.