Isaías 17 - Papiamentu Bible 2013

Dekadensia di Siria i di reino nort di Israel

¹ Dios ta bai baha pisá riba Damasko. Pronto palabra lo kaba pa Damasko, l'e no ta un siudat mas, l'e ta un monton di piedra, un ruina.

² E ora ei siudatnan rondó di Aroer lo ta bandoná, solamente usá komo lugá pa trupa di bestia drumi sosegá sin niun hende pa stroba nan.

³ Israel lo pèrdè su siudat fortifiká, Damasko su hegemonia. Loke sobra di Siria lo tin mes tantu balor ku Israel. Ta SEÑOR soberano a papia.

⁴ Den e tempu desisivo ei Israel lo pèrdè dje tantu peso ku l'e keda kueru riba wesu.

⁵ Den e tempu ei lo sosodé manera den tempu di kosechá: kòrtadó di maishi ta tene stakanan den ún man i kòrta tapushi ku e otro, o manera ora kunukero rekohé kosecha den vaye fértil di Refaim:

⁶ ta algun tapushi ku kai abou so ta keda; o manera ora kaba di bati fruta for di palu di oleifi: ta dos, tres fruta hechu so ta keda den tòp i un kuater o sinku asina n'e takinan te abou. T'esei SEÑOR, Dios di Israel, ta bisa.

⁷ Den e tempu ei hende lo hisa wowo mira su Kreador, l'e fiha su bista riba Dios Santu di Israel.

⁸ L'e no hisa wowo mas pa mira e altánan ku e mes a traha, ni e imágennan di diosnan falsu, trabou di su propio man, ni tampoko e pilánan di palu sagrado ni e altánan pa kima sensia ariba.

⁹ Den e tempu ei e siudatnan fortifiká, ku hende mester a bandoná na yegada di e israelitanan, lo keda blo bashí, ku solamente algun taki i kabes di palu kitá den dje: un solo desolashon.

¹⁰ Israel, bo a lubidá ta ken por salba bo: ta bo Dios, e baranka protektor! Bo no ta tum'É na kuenta mas. Prueba di esaki: bo ta planta hardinnan pa diosnan straño i ta yena nan ku stèk importá na nan honor.

¹¹ Mes dia ku bo planta nan ya bo ta laga nan krese kaba. Loke bo planta mainta bo ta laga floria e mes dia, pero un kosecha asina ta disparsé mes lihé tambe. Ta solamente tristesa i malesa e ta trese pa bo i no tin remedi.

Nashonnan ta borotá por nada

¹² Tende kon multitut di pueblo ta borotá, nan ta borotá manera laman razu. Nashonnan ta sulfurá manera rasmentu di lawin'i awa brutu.

¹³ E bochincha di hopi nashon parse ronkamentu di olanan brabu. Pero SEÑOR ta menasá nan i nan ta plama bai leu, manera bagas ku bientu ta supla riba serunan, manera plushi ku orkan ta karga bai kuné.

¹⁴ Te anochi ainda nan ta lanta pániko, promé ku di dia habri ya nan a disparsé. T'asina lo pasa ku esnan ku sakia nos, esei lo ta suerte di esnan ku pluma nos.