Huesnan 5 - Papiamentu Bible 2013

Kanto di Debora

¹ E dia ei Debora i Barak, yu di Abinoam, a kanta e siguiente kantika:

² ‘Alabá SEÑOR, pasobra na Israel ainda tin hòmber ku ta dispuesto pa bai guera, hòmber di pueblo, ku a rospondé ora a yama nan pa bringa.

³ Skucha, reinan! Habri boso orea, mandatarionan! Mi ke kanta pa SEÑOR! Mi ke toka pa Dios di Israel!

⁴ Dia Abo, SEÑOR, a sali for di Seír; dia Abo a sali for di region di Edom, tera a sakudí, awa a kai for di shelu, nubia a basha awa;

⁵ seru a sakudí; Sinai a sakudí pa Bo, SEÑOR; pa Bo, Dios di Israel.

⁶ Den tempu di Shamgar, yu di Anat, i den tempu di Yael, kaminda tabata bashí i esnan ku tabata biaha tabata kohe kaminda di kabritu.

⁷ Na Israel no tabatin hende ta biba den kunuku mas. Tur kunuku tabata bandoná. Ta den e tempu ei mi a lanta; ami, Debora, un mama pa Israel.

⁸ Ki ora ku nan skohe dios nobo, tabatin guera den e siudatnan. Por a haña ni eskudo ni lansa serka e 40.000 hòmbernan di Israel?

⁹ Di kurason mi ta stima e lidernan di Israel, esnan ku sí tabata dispuesto na bai guera. Alabá SEÑOR!

¹⁰ Boso ku ta kore riba buriku blanku, boso ku ta sintá riba tapeit i boso ku ta na pia,

¹¹ konta kon SEÑOR ta salba hende. Laga boso stèm zona mas duru ku esnan ku ta laga nan bestianan bebe awa na pos. Konta kon SEÑOR a salba e israelitanan ku tabata biba den kunuku. E ora ei e pueblo di SEÑOR a baha bai porta di siudat:

¹² Lanta, lanta, Debora! Lanta, Lanta, kanta un kantika. Lanta, Barak! Bini ku bo prezunan di guera; abo, yu di Abinoam!

¹³ E ora ei esnan ku a keda na bida a baha for di e serunan pa uni ku esnan na poder; e pueblonan di SEÑOR a baha bini serka mi, pa bringa.

¹⁴ For di Efraim a bini esnan ku a konkistá Amalèk. Nan tras a bini trupanan di Benhamin; for di Makir lidernan a baha bini i for di Zebulon a bini e ofisialnan;

¹⁵ e hefenan di Isakar tambe a kompañá Debora. Isakar tabata fiel na Barak i a sigui su tras, baha den e vaye. Pero den tribu di Ruben tabata reina desunion, nan no por a tuma un desishon.

¹⁶ Di kon boso a keda skucha flùit banda di boso kurá di bestia? Den tribu di Ruben tabata reina desunion, nan no por a tuma un desishon.

¹⁷ E habitantenan di Guilead a keda na otro banda di riu Yordan. Di kon Dan a keda traha riba barku? Asher a keda na kosta i no ker a move bai for di su hafnan.

¹⁸ Pero Zebulon i Naftali a riska nan bida riba kampo di bataya, den seru.

¹⁹ Rei a bin bringa, e reinan di Kanaan a drenta guera na Tanak, banda di e riu i roinan di Megido. Pero nan no a haña ni un pida plata.

²⁰ For di shelu e streanan a bringa kontra Sísera. For di espasio nan a bringa kontra dje.

²¹ Riu Kishon a lastra nan bai kuné, e riu ku semper tabat'ei. Mi tin ku sigui ku forsa.

²² E ora ei pata di kabai tabata resoná, ora e kabainan tabata hui bai purá.

²³ “Israel mester maldishoná Meroz!” Asina Angel di SEÑOR ta bisa. Un maldishon fuerte pa su habitantenan, pasobra nan no a bin yuda SEÑOR. Nan tabata kobarde.

²⁴ Dios bendishoná Yael mas ku tur muhé; Yael, kasá di e kenita Hèbèr. Dios bendishon'é mas ku tur muhé ku ta biba den tènt!

²⁵ Sísera a pidi awa, ma Yael a dun'é lechi; den un skalchi di hopi balor el a dun'é lechi di e mihó kalidat.

²⁶ El a saka su man kohe un pènchi, ku su man drechi el a kohe un martin pisá; el a bati kabes di Sísera, kibra su kabes ku e pènchi, bora su sintí.

²⁷ Na pia di Yael, Sísera a sak den otro, kai i keda eibou; na su pia el a sak den otro i a kai; kaminda el a sak den otro, ei el a keda, morto.

²⁸ Mama di Sísera a wak dor di bentana i a grita dor di e tralinan: “Di kon su garoshi di guera no tin fin di yega? Di kon mi no ta tende su garoshinan?”

²⁹ Algun di su damanan mas sabí a kontestá, i e mes tambe a bisa:

³⁰ “Kasi sigur ta e botin nan ta parti: un galeinske òf kisas dos, pa kada sòldá. Sísera ta haña tela di paña karu. Un tela di paña bòrdá, kisas dos, di diferente koló, pa mara na garganta di e vensedó.”

³¹ Asina tur bo enemigunan lo keda destruí, SEÑOR, pero esnan ku stima Bo lo bria manera solo ku ta subi den tur su splendor.’ Despues a reina pas den e pais durante kuarenta aña.