Huesnan 19 - Papiamentu Bible 2013

E levita i su konkubina

¹ Den e tempu ei no tabatin rei na Israel. Leu den e serunan di Efraim tabata biba un levita ku tabatin un konkubina di Betlehèm di Huda.

² Pero e konkubina a rabia kuné i a bai lag'é. El a regresá kas di su tata na Betlehèm, kaminda el a keda kuater luna largu.

³ E hòmber a prepará i a sali ku su sirbidó i dos buriku pa bai busk'é. E ker a kombersá ku e muhé pa wak si esaki ker a kambia di idea i bini bèk serka dje. Ora e muhé a hib'é kas di su tata, e tata a risibié kontentu.

⁴ E suegu no ker a laga e levita bai i el a keda tres dia einan. Nan a kome, bebe i pasa nochi.

⁵ Riba e di kuater dia, ora nan a lanta trempan mainta i e levita tabata prepará pa sali, tata di e mucha muhé a bisa su suegu: ‘Kome pida pan promé bo sali pa bo haña forsa.’

⁶ El a keda i nan dos a kome i bebe huntu. E ora ei tata di e mucha muhé a bisa e levita: ‘Keda un anochi mas i pasa kontentu.’

⁷ Ora e hòmber a lanta pa e bai tòg, e tata a sigui insistí i e hòmber a disidí di keda drumi atrobe.

⁸ Riba e di sinku dia, ora el a lanta trempan mainta pa e sali bai, tata di e mucha muhé a bisa: ‘Kome promé pa bo haña forsa i keda un tiki mas; warda te atardi.’ Nan dos a kome huntu.

⁹ Ora e hòmber a lanta pa e ku su konkubina i su sirbidó sali bai, e suegu a bis'é: ‘Wak, nochi ta kasi sera. Dia a pasa kaba, keda drumi aki i pasa kontentu; e ora ei boso por lanta trempan mañan mainta i biaha pa kas.’

¹⁰ Pero e hòmber no ker a keda drumi atrobe. El a sia su dos burikunan, sali bai ku su konkubina yega te banda di Yebus, ku ta Herusalèm.

¹¹ Komo nan tabata serka di Yebus i solo a baha basta kaba, e sirbidó a bisa su shon: ‘Laga nos kita bai siudat di e yebusitanan i keda pasa nochi einan.’

¹² Pero su shon a kontest'é: ‘Nos no ta bai un siudat strañero, kaminda no tin israelita ta biba, nos ta sigui bai Guibea.

¹³ Ban purba yega maske ta na Guibea òf Rama pa nos keda drumi na un di e lugánan ei.’

¹⁴ Nan a sigui bai i ora nan a yega Guibea, siudat di tribu di Benhamin, solo tabata bahando kaba.

¹⁵ P'esei nan a kita bai aya pa nan pasa nochi. Ora nan a yega, nan a bai sinta riba plenchi di siudat. Pero ningun hende no a invitá nan keda drumi serka dje.

¹⁶ Despues di poko ratu un hòmber bieu a yega for di kunuku kaminda e tabata traha. El a nase den e serunan di Efraim i e tabata biba komo strañero na Guibea. E habitantenan di e siudat mes tabata benhaminita.

¹⁷ Ora el a mira e biahero riba plenchi di siudat, el a puntra: ‘Unda bo ta bai i for di unda bo a bini?’

¹⁸ E levita a kontestá: ‘Nos a bini for di Betlehèm di Huda pa bai leu den e serunan di Efraim, kaminda mi ta biba. Mi a bai Betlehèm di Huda i awor mi ta na kaminda pa bai mi kas. Ningun hende no a invitá mi bin pasa nochi na su kas

¹⁹ pero mi tin yerba seku i kuminda pa e burikunan, pan i biña pa mi, pa mi señora i pa mi sirbidó. Nos no tin falta di nada.’

²⁰ E ora ei e hòmber bieu a kontestá: ‘Bonbiní! Laga mi sòru pa tur loke bo mester; mihó bo no pasa nochi riba plenchi sí.’

²¹ E ora ei el a bai su kas ku nan. Nan a laba pia, kome, bebe i e hòmber a duna e burikunan kuminda.

²² Pero miéntras nan tabata kome i bebe na nan antoho, e hòmbernan di e siudat, un sèt di malechor, a rondoná e kas. Nan a kuminsá bati riba e porta i grita e hòmber bieu, doño di e kas: ‘Trese e hòmber ku ta bo invitado, pafó, pa nos tene relashon kuné.’

²³ E ora ei e hòmber, doño di kas, a bai pafó serka nan i bisa: ‘Nò, rumannan, no hasi malu; awor ku e hòmber ta serka mi na kas boso no mester kometé un akto perverso asina.

²⁴ Wak, ata mi yu muhé señorita akí i e señora di mi invitado. Mi ta trese nan pa boso violá nan i hasi loke boso ke ku nan, pero ku e hòmber akí sí boso no mester kometé un akto perverso asina.’

²⁵ Pero e hòmbernan no ker a tende. E ora ei e levita a kohe su konkubina i hib'é pafó pa nan. Henter anochi nan a tene relashon ku e muhé i abusá di dje. Te ora di dia a habri nan a lag'é bai.

²⁶ Na e ora trempan ei el a kana yega te na kas di e hòmber kaminda su kasá tabata; el a kai abou i keda dilanti di porta di e kas. Ora solo a sali, ainda e tabata eibou.

²⁷ Ora su kasá a lanta mainta i el a habri porta sali pa e sigui biaha, el a topa e muhé eibou na entrada di e kas, ku su mannan riba drempi.

²⁸ El a bis'é: ‘Lanta pa nos ban.’ Pero e no a haña ningun kontesta. E ora ei e hòmber a hisa e kurpa di e muhé, but'é riba buriku i biaha pa kas.

²⁹ Ora el a yega kas el a kohe un kuchú i a kòrta e kurpa na diesdos pida. Despues el a manda e pidanan pasa rònt den henter e region di Israel.

³⁰ Ken ku a mira a bisa: ‘For di dia ku e pueblo di Israel a sali for di Egipto te awe, un kos asina akí no a sosodé; ni nunka nos no a mira un kos asina. Nos mester papia e kos akí i disidí kiko nos ta hasi.’