Huan 3 - Papiamentu Bible 2013

Kòmbersashon entre Hesus ku Nikodemo

¹ Tabatin un fariseo yamá Nikodemo ku tabata lider di pueblo hudiu.

² Un anochi el a bai serka Hesus i bis'É: ‘Rabi, nos sa ku Dios a manda bo pa siña nos. Niun hende no por hasi e señalnan milagroso ku bo ta hasi, si Dios no ta huntu kuné.’

³ Hesus a kontest'é: ‘Mi ta sigurá bo: niun hende no por mira reino di Dios, si e no nase di nobo.’

⁴ Nikodemo a bis'É: ‘Kon un hende ku ta hende grandi kaba por bolbe nase? Akaso e por drenta skochi di su mama atrobe i bolbe nase?’

⁵ Hesus a rospond'é: ‘Mi ta sigurá bo: niun hende no por drenta reino di Dios, si e no nase di awa i spiritu.

⁶ Un hende ta nase físikamente di su mayornan humano, ma spiritualmente e ta nase di Spiritu Santu.

⁷ No keda sorprendí pasobra Mi ta bisa bo ku boso mester nase di nobo.

⁸ Bientu ta supla kaminda e ke; bo por tende su zonido, ma bo no sa di unda e ta bini ni unda e ta bai. Asina ta ku tur hende ku nase di Spiritu.’

⁹ Nikodemo a puntr'É: ‘Kon e kos ei por ta posibel?’

¹⁰ Hesus a bis'é: ‘Abo ku ta maestro di Israel no sa e kosnan akí?

¹¹ Mi ta sigurá bo: nos ta papia loke nos sa i nos ta testiguá loke nos a mira, ma boso no ta aseptá nos testimonio.

¹² Si boso no ta kere Mi ora Mi papia tokante kos terenal, ta kon boso lo por kere Mi antó ora Mi papia tokante kos selestial?

¹³ Niun hende no a yega di subi bai shelu; ta solamente Yu di hende a baha bini for di shelu.

¹⁴ Manera Moises a hisa e kolebra di bròns riba un staka den desierto, asina tambe mester alsa Yu di hende,

¹⁵ pa tur ku kere den djE, haña e bida eterno ku ta den djE.’

¹⁶ Pasobra Dios a stima mundu asina tantu ku El a duna su úniko Yu, pa tur esnan ku kere den djE no bai pèrdí, ma haña bida eterno.

¹⁷ Dios no a manda su Yu den mundu pa kondená mundu, ma pa salba mundu pa medio di djE.

¹⁸ Lo no kondená esun ku kere den e Yu; esun ku no kere den djE ta kondená kaba, pasobra e no a kere den e úniko Yu di Dios.

¹⁹ T'esaki ta e kondena: lus a bini na mundu, ma hende a stima skuridat mas ku nan a stima lus, pasobra nan tabata praktiká maldat.

²⁰ Tur hende ku ta praktiká maldat ta odia lus i nan no ta bini serka djE, pa nan aktonan malbado no pone nan kara na bèrgwensa.

²¹ Esun ku ta praktiká bèrdat ta serka di e lus, pa e lus mustra ku e hende akí a aktua di akuerdo ku boluntat di Dios.

Hesus i Huan Boutista

²² Despues Hesus i su disipelnan a bai region di Hudea. Aki Hesus a keda i tabata batisá hende.

²³ Awor Huan tambe tabata batisá hende na Enon, serka di Salim, pasobra ei tabatin hopi awa. E hendenan tabata bini pa risibí boutismo.

²⁴ Tur e kosnan akí a sosodé tempu no a benta Huan den prizòn ainda.

²⁵ Disipelnan di Huan a kuminsá diskutí ku un hudiu tokante e baño ritual pa purifikashon.

²⁶ Despues nan a aserká Huan i bis'é: ‘Rabi, bo ta kòrda e hòmber ku tabata huntu ku bo na e otro banda di Yordan; esun ku bo a testiguá na su fabor? Wèl, at'é ta batisá hende i tur hende ta bai serka dje!’

²⁷ Huan a kontestá nan: ‘Ningun hende no tin nada ku e no a haña di Dios.

²⁸ Boso mes ta testigu kon mi a testiguá i bisa: “No ta ami ta e Mesias, pero a manda mi su dilanti.”

²⁹ Brùit ta pertenesé na brùidehòm, ma amigu di e brùidehòm ku ta para pa tende stèm di e brùidehòm, ta bira mashá kontentu ora e tend'é. Esei ta e goso ku ami ta sinti i el a yega na su kulminashon!

³⁰ E mester bira mas importante, miéntras ami ta bira ménos importante.’

Esun ku ta bini for di shelu

³¹ Esun ku ta bini djariba ta mas ku tur hende. Esun ku ta biba riba mundu ta pertenesé na mundu i e ta papia di kos ku tin di aber ku e mundu akí. Esun ku ta bini di shelu ta riba tur hende;

³² E ta papia di loke El a mira i tende, ma niun hende no ta aseptá su testimonio.

³³ Esun ku aseptá su testimonio ta konfirmá ku Dios ta papia bèrdat.

³⁴ Pasobra esun ku Dios a manda ta papia palabra di Dios; pasobra Dios ta dun'É Spiritu Santu na abundansia.

³⁵ Tata ta stima su Yu i a entregá tur kos den su man.

³⁶ Esun ku ta kere den e Yu, tin bida eterno; esun ku desobedesé e Yu, lo no tin bida eterno, pero ta keda sufri kastigu di Dios.