Huan 2 - Papiamentu Bible 2013

Hesus ta kambia awa hasié biña

¹ Dos dia despues ku Hesus a topa Natanaèl, tabatin un kasamentu na Kana di Galilea. Hesus su mama tabata na e kasamentu.

² Nan a kombidá Hesus tambe huntu ku su disipelnan.

³ Ora ku biña a kaba, Hesus su mama a bis'É: ‘E hendenan no tin mas biña!’

⁴ Hesus a kontest'é: ‘Señora, kiko bo ta deseá di Mi anto? Mi ora no a yega ainda.’

⁵ Hesus su mama a bisa e kriánan: ‘Hasi loke E bisa boso.’

⁶ T'asina ku hudiu tin nan kustumbernan religioso di purifikashon; pa e motibu ei tabatin seis tinashi einan. Kada tinashi por a tuma ochenta pa shen liter di awa.

⁷ Hesus a bisa e kriánan: ‘Yena e tinashinan ei ku awa.’ I e kriánan a yena nan te na rant.

⁸ E ora ei El a bisa nan: ‘Saka poko awa i hiba pa e maestro di seremonia.’ I nan a hiba e awa pa e hòmber.

⁹ Ora e maestro di seremonia a purba e awa ku a kambia bira biña, el a manda yama e brùidehòm. E no tabata sa di unda e biña a sali, ma naturalmente e kriánan ku a saka e awa, sí tabata sa.

¹⁰ El a bisa e brùidehòm: ‘Tur hende ta parti e mihó biña promé i despues ora e hendenan a bebe basta kaba, nan ta parti e biña di ménos kalidat. Ma abo a warda e mihó biña te awor!’

¹¹ Asin'akí Hesus a hasi su promé señal milagroso: ei na Kana di Galilea El a mustra su gloria i su disipelnan a kere den djE.

¹² Despues Hesus, su mama, su rumannan i su disipelnan a bai Kafárnao i nan a keda aya un par di dia.

Tèmpel ta kas di Dios

¹³ E fiesta ku hudiunan sa selebrá, fiesta di Pésag, tabata serka i Hesus a bai Herusalèm.

¹⁴ El a haña nan ta bende bue, karné i palomba i tabatin kambiadó di plaka tambe sintá den tèmpel.

¹⁵ Hesus a mara kabuya na otro, traha un karbachi i kore ku nan tur for di tèmpel huntu ku nan karnénan i nan buenan. El a basha sèn di e kambiadónan di plaka abou i bòltu nan mesa.

¹⁶ Anto El a bisa esnan ku tabata bende palomba: ‘Saka e palombanan ei fo'i djaki! No hasi kas di mi Tata un marshe!’

¹⁷ E disipelnan a kòrda ku Skritura ta bisa: ‘Zelo pa bo kas, o Dios, lo kima den mi manera kandela!’

¹⁸ Outoridatnan hudiu a bis'É: ‘Mustra nos un señal milagroso pa nos mira ku kua derechi bo ta hasi e kos akí.’

¹⁹ Hesus a kontestá nan: ‘Destruí e tèmpel akí i den tres dia Mi ta lant'é atrobe.’

²⁰ Nan a bis'É: ‘A tuma 46 aña pa traha e tèmpel akí. Awor abo ta bai lant'é den tres dia?’

²¹ Ma e tèmpel ku Hesus tabata papia di dje, tabata su mes kurpa.

²² Dia El a lanta for di morto, su disipelnan a bin kòrda loke El a bisa i nan a kere den Skritura i den e palabranan ku Hesus a bisa nan.

²³ E dianan ku Hesus tabata na Herusalèm durante fiesta di Pésag, hopi hende ku a mir'É hasi señal milagroso a pone nan fe den djE.

²⁴ Ma Hesus mes no ker a habri su mes pa nan, pasobra E tabata konosé kurason di tur hende.

²⁵ Niun hende no tabatin mester di bis'É loke ta biba den hende, pasobra E mes tabata konosé kurason di hende.