Huan 19 - Papiamentu Bible 2013

¹ E ora ei Pilato a kohe Hesus i laga batiÉ ku karbachi.

² E sòldánan a bistiÉ un korona ku nan a flèktu di sumpiña i un mantel kòrá püs.

³ Despues nan a bini serka djE i bis'É: ‘Biba rei di hudiu!’ I nan a bòft'É.

⁴ Pilato a bolbe bai pafó i a bisa e hendenan: ‘Tende, mi a tres'é pafó aki serka boso pa boso mira ku mi no ta haña ningun motibu pa konden'é.’

⁵ Hesus a bini pafó ku e korona di sumpiña riba su kabes i e mantel kòrá püs bistí. Pilato a bisa e hendenan: ‘Ata e hòmber akí!’

⁶ Ora e saserdotenan importante i e guardianan a mir'É, nan a grita: ‘Krusifik'é! Krusifik'é!’ Pilato a bisa nan: ‘Awèl, bai kuné i krusifik'é boso mes; ami no ta haña ningun motibu pa konden'é.’

⁷ E hendenan a kontestá: ‘Nos tin un lei i segun e lei ei e mester muri, pasobra el a pretendé di ta Yu di Dios!’

⁸ Ora Pilato a tende esei, el a haña mas miedu ainda.

⁹ El a drenta bèk den e residensia prinsipal i puntra Hesus: ‘Di unda bo ta bini?’ Ma Hesus no a dun'é kontesta.

¹⁰ Pilato a bis'É: ‘Bo no ke papia ku mi? bo no sa ku t'ami tin outoridat pa laga bo liber i outoridat pa krusifiká bo?’

¹¹ E ora ei Hesus a rospond'é: ‘Lo bo no tabatin e outoridat ei riba Mi, si no ta Dios a duna bo e oportunidat ei. P'esei mes esun ku a entregá Mi den bo man ta mas kulpabel ainda ku bo.’

¹² Ora Pilato a tende esei, el a buska un manera di pone Hesus den libertat. Ma e pueblo a grita: ‘Si bo laga e hòmber akí liber, bo no ta amigu di emperador! Ken ku pretendé di ta rei, ta bai kontra emperador.’

¹³ Ora Pilato a tende e palabranan akí, el a hiba Hesus pafó i a kai sinta riba e stul ku hues ta usa den e lugá ku yama ‘Patio di Piedra’. Na hebreo e nòmber ta ‘Gabata’.

¹⁴ Tabata diesdos or di mèrdia riba dia di preparashon pa Pésag. Pilato a bisa e hudiunan: ‘Ata boso rei!’

¹⁵ Nan a grita: ‘Kaba kuné! Kaba kuné! Krusifik'é!’ Pilato a puntra nan: ‘Krusifiká boso rei?’ E saserdotenan importante a rospondé: ‘Ta un rei so nos tin: emperador!’

¹⁶ E ora ei Pilato a entregá Hesus na nan pa nan krusifik'é. Nan a bai ku Hesus.

Ta krusifiká Hesus

¹⁷ Ora El a sali, E mes tabata karga su krus. El a yega na un lugá ku yama ‘Lugá di Karpachi’, ku na hebreo yama ‘Gólgota’.

¹⁸ Ei nan a krusifik'É huntu ku dos otro hòmber; Hesus tabata meimei di nan dos.

¹⁹ Pilato a laga skibi riba un bòrchi i pon'é riba e krus. Tabatin skibí: ‘Hesus di Nazarèt, Rei di hudiu’.

²⁰ Hopi hende a les'é, pasobra e lugá kaminda Hesus tabata krusifiká no tabata keda muchu leu for di siudat i loke tabatin skibí riba e bòrchi tabata skibí tantu na hebreo komo na latin i griego.

²¹ P'esei e saserdotenan importante a bisa Pilato: ‘Bo no mester a pone “Rei di hudiu”, ma “E hòmber akí a bisa ku e ta rei di e hudiu”.’

²² Pilato a bisa nan: ‘Loke Mi a skibi ta keda skibí!’

²³ Despues ku e sòldánan a krusifiká Hesus, nan a kohe su pañanan i parti nan den nan kuater. Tambe nan a kohe su kamisa, pero e no tabatin nachi; e tabata tehé di un solo pida, djariba te abou.

²⁴ P'esei nan a bisa otro: ‘Laga nos no sker e, ma tira lòt, wak ken ta gan'é.’ Asin'ei anto e palabranan di Skritura a keda kumplí: ‘Parti nan a parti mi pañanan entre nan i a tira lòt pa mi bistí.’ I esei ta loke e sòldánan a hasi.

²⁵ Turesten Hesus su mama, ruman muhé di su mama, Maria kasá di Kleopas i Maria Magdalena tur tabata pará na su krus.

²⁶ Ora Hesus a mira su mama i su disipel stimá pará einan, El a bisa su mama: ‘Señora, ata bo yu!’

²⁷ Despues El a bisa e disipel: ‘Ata bo mama!’ For di e ora ei e disipel a tuma Maria den su kas.

Hesus ta kumpli ku su mishon

²⁸ Despues di esei Hesus tabata sa ku tur kos tabata kumplí. Pa kumpli ku Skritura, El a bisa: ‘Mi tin set!’

²⁹ Tabatin un butishi ku biña zür. Nan a papa un spòns ku e biña, pon'é na un taki di un mata ku yama hisopo i pon'é na Hesus su boka.

³⁰ Hesus a bebe e biña i bisa: ‘Ta kumplí!’ Despues El a baha su kabes i entregá su spiritu.

Ta traspasá Hesus su kustia

³¹ E outoridatnan hudiu a pidi Pilato pèrmit pa laga kibra pia di e hendenan ku nan a krusifiká i baha e kurpanan for di krus. Nan a pidi esei, komo tabata dia di preparashon, esta bispu di sabat, i nèt e sabat ei tabata un dia mashá santu; nan no tabata ke pa e kurpanan keda na krus durante sabat.

³² P'esei e sòldánan a bai i kibra pia di e promé i despues di e di dos hòmber ku tabata krusifiká huntu ku Hesus.

³³ Ma ora nan a yega serka Hesus nan no a kibra su pianan, pasobra nan a mira ku El a muri kaba.

³⁴ Sinembargo un di nan a traspasá Hesus su kustia ku un lansa i mesora sanger i awa a basha afó.

³⁵ Esun ku a mira esaki, ta testiguá pa boso tambe kere; su testimonio ta kuadra ku bèrdat i e sa ku e ta papia bèrdat.

³⁶ E kosnan akí a sosodé pa Skritura keda kumplí: ‘Lo no kibra niun di su wesunan!’

³⁷ I tambe tin un otro Skritura ta bisa: ‘Nan lo fiha nan bista riba Esun ku nan a traspasá!’

Nan ta dera Hesus

³⁸ Despues di loke a pasa, Hosé di Arimatea a pidi Pilato pa por a baha kurpa di Hesus. Hosé tabata un siguidó di Hesus na skondí, pasobra e tabatin miedu di e outoridatnan hudiu. Pilato a dun'é pèrmit i Hosé a kohe e kurpa bai kuné.

³⁹ Nikodemo, ku promé aya tambe a bai bishitá Hesus anochi, a bai huntu ku Hosé. El a bai ku un trinta kilo di un meskla di mira i bálsamo ku ta hole dushi pa hunta kurpa di e morto kuné.

⁴⁰ Nan a kohe Hesus su kurpa i lor'É den paña di lenen huntu ku e spesereinan, segun kustumber hudiu di drecha morto pa entiero.

⁴¹ Kaminda nan a krusifiká Hesus tabatin un hòfi ku un graf nobo ku nan no a usa ainda.

⁴² Komo tabata dia di preparashon pa sabat i e graf no tabata leu, nan a pone Hesus eiden.