Huan 13 - Papiamentu Bible 2013

Hesus ta laba pia di su disipelnan

¹ Fiesta di Pésag tabata serka i Hesus tabata sa ku su ora a yega pa bai laga e mundu akí i bai serka su Tata. Te na final El a sigui mustra su amor pa esnan ku riba e mundu akí tabata pertenesé n'E.

² Nan tabata sintá na mesa pa kome. Ya diabel a hinka e idea pa traishoná Hesus den mente di Hudas, yu di Simon Iskariot.

³ Hesus tabata sa ku Tata a dun'É poder riba tur kos, ku El a bini di Dios i ku E tabata bai bèk serka Dios.

⁴ P'esei El a lanta for di mesa, kita su paña djariba i mara un paña na su sintura.

⁵ Despues El a basha awa den un kòmchi i a kuminsá laba pia di e disipelnan; ku e paña mará na su sintura, E tabata seka nan pia.

⁶ A yega turno pa laba pia di Simon Pedro. Pedro a bis'É: ‘Señor, Abo, laba mi pia?’

⁷ Hesus a kontest'é: ‘Awor akí bo no ta realisá kiko Mi ta hasiendo, ma lo bo komprondé, despues ku tur kos ta tras di lomba.’

⁸ Pedro a rospond'É: ‘Mi n' ta laga Bo laba mi pia, hamas i nunka!’ Hesus a kontest'é: ‘Si Mi no laba bo pia, bo no ta pertenesé na Mi.’

⁹ Simon Pedro a bis'É: ‘Señor, no laba mi pia so antó; laba mi man i mi kabes tambe!’

¹⁰ Hesus a sigui bis'é: ‘Esun ku a baña su kurpa kaba ta kompletamente limpi, ta su pia so e mester laba ainda. Ma boso tur, ménos un, ta puru kaba.’

¹¹ El a bisa asina, pasobra E tabata sa kaba ken tabata bai traishon'É.

¹² Ora Hesus a kaba di laba nan pia, El a kohe su paña djariba, bolbe tuma lugá na mesa i puntra nan: ‘Boso sa kiko Mi a hasi ku boso?

¹³ Ku rason boso ta yama Mi “Maestro” i “Señor”, pasobra esei Mi ta.

¹⁴ Ke men, si Ami, boso Señor i Maestro, a laba boso pia, boso tambe mester laba pia di otro.

¹⁵ Mi a duna boso un ehèmpel pa boso tambe hasi pa otro loke Ami a hasi pa boso.

¹⁶ Mi ta sigurá boso: Un sirbidó no ta mas altu ku su shon, ni un mensahero no ta mas altu ku esun ku a mand'é.

¹⁷ Awor ku boso sa e kosnan akí, boso lo ta felis si boso hasi nan tambe.

¹⁸ Mi no ta papiando di boso tur; Mi sa ta ken Mi a skohe. Ma e palabranan akí di Skritura mester keda kumpli: “Esun ku a kome huntu ku Mi, a lanta kontra Mi.”

¹⁹ Mi ta konta boso e kos akí, promé ku e sosodé. Ya boso ta kere e ora ei ku “AMI TA”.

²⁰ Mi ta sigurá boso: esun ku risibí un hende ku Ami manda, ta risibí Mi mes. I esun ku risibí Mi, ta risibí Esun ku a manda Mi.’

Hesus ta bisa ken lo traishon'É

²¹ Despues di a papia asina, Hesus a bira tur sobresaltá i testiguá: ‘Mi ta sigurá boso: un di boso lo traishoná Mi.’

²² E disipelnan a keda mira otro. Nan no tabata sa ta ken E ker a men.

²³ Un di nan, e disipel ku Hesus tabata stima mashá, tabata sintá serka di Hesus.

²⁴ Simon Pedro ku seña a pidié puntra Hesus ta ken E ke men.

²⁵ E disipel a lèn patras, hala mas serka Hesus i puntr'É: ‘Señor, ta ken?’

²⁶ Hesus a kontestá: ‘Mi ta dòp pida pan den skalchi; esun ku Mi duna e pan t'e ta e persona!’ Anto Hesus a kohe pida pan, dòp e den skalchi i duna Hudas, yu di Simon Iskariot.

²⁷ Na momento ku Hudas a tuma e pan, satanas a drent'é. Hesus a bis'é: ‘Hasi loke bo tin ku hasi lihé!’

²⁸ Niun di e otro disipelnan sintá na mesa no tabata sa pakiko Hesus a bisa Hudas asina.

²⁹ Algun di nan a pensa ku ya ku Hudas tabata tene e kaha di plaka, Hesus a enkarg'é pa e bai kumpra loke nan tabatin mester pa e dianan di fiesta òf pa e bai duna hende pober algu.

³⁰ Hudas a tuma e pan i a sali bai mesora; nochi a sera.

Un mandamentu nobo

³¹ Despues ku Hudas a sali bai, Hesus a bisa: ‘Awor Yu di hende ta haña gloria i Dios ta haña gloria dor di djE.

³² Si Dios haña gloria dor di djE, Dios lo demostrá gloria di Yu di hende den Dios mes tambe i Dios ta bai hasi esaki umbe aki.

³³ Mi yunan stimá, lo Mi no ta pa muchu tempu mas huntu ku boso. Boso lo buska Mi i manera Mi a bisa e outoridatnan hudiu, asina Mi ta bisa boso awor akí tambe: Kaminda Mi ta bai, boso no por bini.

³⁴ Mi ta duna boso un mandamentu nobo: Stima otro! Manera Ami a stima boso, asina boso tambe mester stima otro.

³⁵ Si boso stima otro, tur hende lo sa ku boso ta mi disipel.’

Hesus ta bisa delantá ku Pedro lo neng'É

³⁶ Simon Pedro a puntra Hesus: ‘Señor, unda Bo ta bai?’ Hesus a rospond'é: ‘Kaminda Mi ta bai, bo no por sigui Mi awor akí, ma despues lo bo sigui Mi.’

³⁷ Pedro a bisa: ‘Señor, pakiko mi no por sigui Bo awor akí? Mi ta entregá mi bida pa Bo!’

³⁸ Hesus a bis'é: ‘Bo ta entregá bo bida pa Mi? Mi ta sigurá bo: promé ku gai kanta, lo bo a nenga tres be kaba ku bo konosé Mi.