Huan 10 - Papiamentu Bible 2013

Parábola tokante kurá di karné

¹ Hesus a sigui bisa: ‘Mi ta sigurá boso: esun ku no drenta kurá di karné di porta, ma bula drenta di otro kaminda, ta un ladron i bandidu.

² Ma esun ku ta drenta di porta, ta e wardadó di karné.

³ Esun na porta ta habri p'e drenta, i e karnénan ta rekonosé su stèm. E ta yama su karnénan na nan nòmber i ta guia nan bai pafó di kurá.

⁴ Ora e saka nan tur, e ta kana nan dilanti i nan ta siguiÉ, pasobra nan ta rekonosé su stèm.

⁵ Nunka nan lo no sigui un hende straño; sino nan ta kore p'e, pasobra nan no konosé stèm di hende straño.’

⁶ Hesus a konta nan e parábola akí, ma nan no a komprondé kiko E tabata ke men.

Hesus ta e bon wardadó di karné

⁷ Hesus a sigui bisa: ‘Mi ta sigurá boso: Ami ta e porta pa e karnénan.

⁸ Tur ku a bini promé ku Mi, tabata ladron i bandidu i e karnénan no a tende di nan.

⁹ Ami ta e porta; ken ku drenta paden via Ami, lo haña salbashon; lo e drenta paden i ora e sali, e ta haña kunuku di yerba bèrdè.

¹⁰ Un ladron no ta bin hasi nada otro ku hòrta, mata i destruí. Ami a bini pa duna bida, bida na abundansia.

¹¹ Ami ta e bon wardadó; un bon wardadó ta entregá su bida pa su karnénan.

¹² Un hende ku ta risibí pago no ta un wardadó ni ta doño di e karnénan. Ora e mira un lobo ta aserká, e ta bandoná e karnénan i baha na katuna. E ora ei e lobo ta hòrta e karnénan i plama nan for di otro.

¹³ Pasobra e hende ku ta risibí pago no ta nada mas ku un trahadó e no ta preokupá pa e karnénan.

¹⁴ Ami ta e bon wardadó; Mi konosé mi karnénan i nan konosé Mi.

¹⁵ Meskos tambe Mi konosé mi Tata i mi Tata konosé Mi; Mi ta entregá mi bida pa mi karnénan.

¹⁶ Mi tin otro karné tambe, ku no ta di e kurá akí. Mi mester guia nan tambe; nan lo tende di Mi i lo ta ún trupa di karné ku ún wardadó.

¹⁷ Tata stima Mi, pasobra Mi ta dispuesto na entregá mi bida pa despues Mi tum'é bèk.

¹⁸ Niun hende no ta kita mi bida for di Mi; Mi ta entreg'é di mi mes boluntat. Mi tin poder pa entreg'é i poder pa tum'é bèk. T'esaki mi Tata a manda Mi hasi.’

¹⁹ E pueblo a bolbe drenta den desakuerdo ku otro, e bia akí pa motibu di e último palabranan akí.

²⁰ Hopi di nan tabata bisa: ‘E ta poseé pa demoño: su kabes no ta bon! Pakiko boso ta skuch'é?’

²¹ Otro tabata bisa: ‘E palabranan akí no ta palabra di hende poseé pa demoño. Demoño por duna hende siegu nan bista antó?’

Hudiunan ta rechasá Hesus

²² Tabata wenter i nan tabata selebrá fiesta di purifikashon di tèmpel na Herusalèm.

²³ Hesus tabata kana den galeria di tèmpel, den e balkon dediká na Salomon.

²⁴ E pueblo a rondon'É i puntr'É: ‘Pa kuantu tempu mas, Bo ta laga nos den suspenso? Si ta Bo ta e Mesias, bisa nos esei bon kla!’

²⁵ Hesus a kontestá nan: ‘Mi a bisa boso, ma boso no a kere. E obranan ku Mi ta hasi den nòmber di mi Tata, ta testiguá na mi fabor.

²⁶ Ma boso no ker a kere, pasobra boso no ta pertenesé na mi trupa di karné.

²⁷ Mi karnénan ta skucha mi stèm; Ami konosé nan i nan ta sigui Mi.

²⁸ Ami ta duna nan bida eterno i nunka nan lo no bai pèrdí; niun hende no por ranka nan kita for di mi man.

²⁹ Mi Tata ku a duna Mi nan, ta mas grandi ku tur i niun hende no por ranka nan kita for di man di mi Tata.

³⁰ Ami ku mi Tata ta un!’

³¹ Nan a bolbe bai kohe piedra bini kuné, pa piedra Hesus.

³² Hesus a bisa nan: ‘Mi a mustra boso hopi bon obra, ku ta bini di mi Tata. Pa kua di nan boso ke piedra Mi?’

³³ Nan a bis'É: ‘No ta pa motibu di bo bon obranan nos ke piedra Bo, sino pasobra Bo ta blasfemá Dios. Abo ku ta un ser humano, ta konsiderá bo mes igual na Dios!’

³⁴ Hesus a kontestá: ‘Ta skibí den boso lei ku Dios a bisa: “Boso ta diosnan”.

³⁵ Dios a yama esnan ku a risibí su palabra “dios”, i nos sa ku no por kita Skritura su outoridat.

³⁶ Awor kon boso ke bin bisa Ami, Esun ku Tata a konsagrá i manda bini mundu: “Bo ta blasfemá Dios”, pasobra Mi a bisa: “Mi ta Dios su Yu”?

³⁷ Si Mi no tabata hasi e obranan di mi Tata, boso no tabatin nodi di kere Mi.

³⁸ Ma si Mi ta hasi esei, laga di kere Ami mes antó, kere sikiera e obranan. Ya boso ta haña konosementu i realisá ku Tata ta den Mi i Ami ta den Tata.’

³⁹ Atrobe nan a buska moda di kohe Hesus prezu, ma El a logra skapa for di nan man.

⁴⁰ Despues El a bolbe bai e otro banda di Yordan, na e mesun lugá kaminda Huan Boutista tabata batisá hende ántes, i a keda aya.

⁴¹ Hopi hende a bai serka djE i bisa: ‘Huan mes no tabata hasi ningun señal milagroso, ma tur loke el a bisa tokante e hòmber akí ta palabra bèrdat.’

⁴² I hopi hende ei a kere den djE.