Hoséas 7 - Papiamentu Bible 2013

¹ Na momento ku Mi ke kura Israel, maldat di Efraim ta sali na kla, e pikánan di Samaria: nan ta entretené nan mes ku engaño, ladronnan ta penetrá drenta den kas, pafó riba kaya bandidunan ta sakia.

² No ta drenta nan kabes ku Mi ta keda kòrda nan pikánan. Mi ta mira nan sosodé Mi dilanti, nan a keda pegá den nan.’

Kòmplòt kontra nan propio lidernan

³ SEÑOR ta bisa: ‘Nan ta hasi rei alegre, pero ta trama mal plan. Nan ta dibertí e lidernan, pero nan palabranan ta engaño.

⁴ Infiel nan ta, nan tur. Nan ta un fòrnu ku ta keda sendé, maske e panadero tarda pa pone mas palu te ora e mansa ku el a mansa reis.

⁵ Pa kolmo dia ku e lidernan a hasi nos rei malu ku biña tèrko, e dia ei e ku e gañadónan ei a duna otro man.

⁶ Miéntras nan tabata dun'é homenahe e traishon tabata kima den nan kurason manera den fòrnu: henter anochi e ta saka huma, pero mainta e ta saka vlam manera kandela grandi.

⁷ Nan tur ta manera fòrnu sendé: nan ta devorá nan lidernan. Rei tras di rei a kai. I ningun di nan no ta akudí na Mi.’

Israel ta buska yudansa kaminda robes

⁸ Señor ta bisa: ‘Efraim a meskla su mes ku pueblonan strañero. E ta manera un kuki ku no a keda ibòltu.

⁹ Strañeronan a kaba ku su forsa, sin ku el a ripará. Bieu i gastá el a bira, sin ku el a ripará.

¹⁰ Israel su orguyo ta testiguá kontra dje, pero nan no ta bolbe serka Mi, nan no ta buska Mi, apesar di tur loke ta pasa.

¹¹ Efraim a bira manera un palomba, bobo i sin sintí; nan ta pidi Egipto bin yuda nan, despues nan ta akudí na Asiria.

¹² Pero asina nan sali bai, Mi ta habri mi nèt riba nan. Mi ta hala nan abou manera para for di den laria. Mi ta kohe nan asina tende zonido di nan trupa.

¹³ Desaster ta warda nan, pasobra nan a hui bai fo'i Mi. Destrukshon ta bini riba nan, pasobra nan a bira infiel na Mi. Mi a libra nan, pero nan a gaña Mi.

¹⁴ Nan no ta invoká Mi di henter nan kurason, pero riba nan kama nan ta drumi keha i rogando pa grano i biña nan ta kòrta nan mes; asina nan ta demostrá nan resistensia kontra Mi.

¹⁵ T'Ami tabata Esun ku a instruí nan i ku a duna nan brasa forsa, pero nan ta plania maldat kontra Mi.

¹⁶ Nan ta akudí na tur hende, pero ariba, na Mi, si nò; nan ta inkonfiabel manera un bog slap. Egipto lo hasi chèrchè di nan si nan lidernan muri pa medio di spada, pasobra nan a maldishoná Mi.’