Hebreonan 8 - Papiamentu Bible 2013

Hesus ta gransaserdote di un aliansa nobo

¹ Loke nos ke bisa ta: komo gransaserdote nos tin un persona ku ta sintá na man drechi di trono di Mahestat dibino den shelu.

² E ta sirbi den santuario, den e berdadero tènt sagrado, ku no ta hende a lanta, sino Señor.

³ Tur gransaserdote tin komo tarea ofresé sakrifisio i ofrenda; p'esei e gransaserdote akí tambe mester di algu pa ofresé komo sakrifisio.

⁴ Si E tabata na mundu, lo E no tabata saserdote mes, pasobra aya tin saserdote kaba ku ta ofresé sakrifisio preskribí pa lei.

⁵ Pero nan trabou di sirbishi no ta nada mas ku un kopia i un sombra di esun selestial. Esta esaki tabata loke Moises a haña tende di Dios tempu e tabata bai konstruí e santuario: ‘Sòru traha tur kos meskos ku e modelo ku Mi a mustra bo riba seru.’

⁶ Pero e trabou saserdotal ku Hesus a haña, ta mas elevá; E ta Mediador di un aliansa ku tambe ta mihó, pasobra e ta basá riba mihó promesa.

⁷ Si e promé aliansa no tabatin fayo, esun di dos lo no tabata nesesario.

⁸ Pero Dios ta skual su pueblo, ora E bisa: ‘ “Tende, pronto Mi ta sera un aliansa nobo ku pueblo di Israel i ku pueblo di Huda.

⁹ No un aliansa manera Mi a yega di sera ántes, tempu ku Mi a kohe nan antepasadonan na nan man i saka nan for di Egipto. Pasobra nan no tabata atené nan na e aliansa ei; p'esei Mi no a preokupá mas pa nan,” Señor ta bisa.

¹⁰ “E aliansa nobo ku Mi ta bai sera ku pueblo di Israel lo ta asin'akí: Mi ta bai pone mi aliansa den nan kurason i grab'é den nan mente. Ami lo ta nan Dios i nan, na nan turno, lo ta mi pueblo,” Señor ta bisa.

¹¹ “Lo no tin nesesidat di instruí un konsiudadano òf ruman mas ni di bisa otro: Siña konosé Señor! Pasobra nan tur lo sa ken Mi ta, tur, di chikí te grandi.

¹² Lo Mi pordoná nan maldatnan i no kòrda mas riba nan pikánan.” ’

¹³ Dor di papia di un aliansa nobo El a deklará esun promé antikuá, i tur kos ku bira bieu i tin hopi aña, ta na punto di disparsé.