Hebreonan 7 - Papiamentu Bible 2013

Hesus, saserdote na mesun manera ku Melkisedèk

¹ E Melkisedèk akí tabata rei di Shalem i saserdote di Dios Altísimo. Ora Abraham a bini bèk despues di su viktoria riba e reinan, Melkisedèk a sali pa risibí Abraham i bendishon'é.

² Abraham a duna Melkisedèk un désimo parti di tur loke el a kita for di e reinan. E nòmber Melkisedèk ta nifiká: rei di hustisia; tambe e tabata rei di Shalem i esei ta nifiká: rei di pas.

³ No sa nada di su tata i mama, ni di su desendensia, ni di kuminsamentu òf fin di su bida. E ta meskos ku Yu di Dios: un saserdote pa semper.

⁴ Kon importante e tabata, boso por ripará na e echo ku asta patriarka Abraham a dun'é un désimo parti di e botin.

⁵ Segun Lei di Moises e saserdotenan, ku ta desendiente di Levi, tin derecho di kobra e pueblo désimo parti di tur kos, ke men, nan mes kompatriotanan, ku meskos ku nan, ta tambe desendiente di Abraham.

⁶ Pero Melkisedèk, ounke e no tabata desendiente di Levi, a kobra Abraham, ku a haña e promesanan di Dios, e désimo parti. Asina Melkisedèk a bendishoná Abraham.

⁷ Awor ningun hende no por nenga ku esun ku duna bendishon, ta mas grandi ku esun ku haña bendishon.

⁸ Den kaso di e desendientenan di Levi ta hende mortal ta risibí e désimo partinan, pero den kaso di Melkisedèk Skritura ta papia di un hende ku ta na bida ainda.

⁹ Por bisa asta ku Levi, kende su desendientenan ta kobra e désimo partinan, mes a paga désimo parti pa medio di Abraham,

¹⁰ pasobra ora Melkisedèk a sali bai topa Abraham, Levi tabata ainda den kurpa di su antepasado Abraham.

¹¹ Pueblo di Israel a haña e lei a base di e saserdosio levítiko. Si awor e saserdotenan akí por a hiba hende na perfekshon, no tabata na nodi di nombra un saserdote ku ta saserdote na e mesun manera ku Melkisedèk i no na e manera di Aaron.

¹² Pasobra si saserdosio kambia, ta sigui inevitablemente tambe un kambio di lei.

¹³ Nos Señor, di kende Skritura ta papia aki, tabata pertenesé na un otro tribu di Israel, for di kua te ainda niun hende no tabata atmití na altá.

¹⁴ Pasobra ta generalmente konosí ku E tabata bini di tribu di Huda, un tribu ku Moises no ta menshoná den su stipulashonnan tokante saserdote.

¹⁵ E kaso ta bira mas kla ainda si nos pensa ku e otro saserdote ku a aparesé, tabata manera Melkisedèk,

¹⁶ ku no a bira saserdote a base di un lei ku ta fiha di kua famia mester bini, pero a base di e poder di un bida indestruktibel.

¹⁷ Pasobra Skritura ta bisa di djE: ‘Lo Bo ta saserdote pa semper na mesun manera ku Melkisedèk.’

¹⁸ A abolí e preskripshon eksistente pasobra e tabata inútil i sin forsa:

¹⁹ E lei no a hiba na perfekshon. Na lugá di esei a bini speransa pa algu mihó, un speransa ku ta hiba nos mas serka Dios.

²⁰ I esaki ta tuma lugá ku un huramentu solèm. No tabatin huramentu ora e otronan a bira saserdote,

²¹ pero Hesus a bira saserdote ku un huramentu ku Dios a hasi n'E, ora El a bisa: ‘Señor a hura — l'E no kibra su palabra —: “Lo Bo ta saserdote pa semper.” ’

²² E diferensia akí ta pone ku Hesus ta para bòrg pa un aliansa ku ta mihó ku esaya.

²³ Tin un diferensia mas: den saserdosio levítiko kada be otro hende mester a bira saserdote, pasobra morto tabata stroba nan di keda komo saserdote.

²⁴ Pero komo Hesus ta keda biba semper, su ofisio saserdotal no ta pasa pa ningun otro hende.

²⁵ P'esei pa semper E por salba esnan ku ta aserká Dios pa medio di djE, pasobra E ta biba pa semper pa boga pa nan serka Dios.

²⁶ Asina anto, Hesus ta presisamente e gransaserdote ku nos tabatin mester. E ta santu, sin maldat i sin mancha, saká fo'i meimei di pekadó i poné mas altu ku shelu.

²⁷ Tampoko E no tin mester di ofresé sakrifisio kada dia di nobo, promé pa su mes pikánan i despues pa esunnan di e pueblo, meskos ku e gransaserdotenan, pasobra El a hasi esaki un bia i pa semper, dia El a sakrifiká su mes.

²⁸ Lei di Moises ta nombra hende imperfekto komo gransaserdote; pero Dios su huramentu, ku a tuma lugá despues di lei, ta nombra su Yu gransaserdote, kende ku pa semper kaba a yega na perfekshon.