Hebreonan 5 - Papiamentu Bible 2013

¹ Kada gransaserdote ta keda skohí for di hende i nombrá pa representá hende serka Dios; e mester ofresé sakrifisio i ofrenda pa piká.

² Komo e mes tambe ta someté na debilidat humano, e por tin komprenshon pa hende ignorante i esnan ku a pèrdè kaminda.

³ I komo e mes ta débil, no ta solamente pa piká di e pueblo e mester ofresé sakrifisio, sino tambe pa su mes pikánan.

⁴ Niun hende no ta duna su mes dignidat di gransaserdote; Dios mester yam'é pa e risibí e dignidat ei, manera a sosodé ku Aaron tambe.

⁵ Asina Kristu tampoko no a duna su mes e honor di gransaserdote; esei ta Dios a hasi, ku a bis'É: ‘Bo ta mi Yu; awe Mi a duna Bo bida.’

⁶ Un otro kaminda E ta bisa tambe: ‘Lo Bo ta saserdote pa semper na mesun manera ku Melkisedèk.’

⁷ Durante su bida na mundu El a resa i supliká Dios, ku por a salb'É for di morto, bou di gritu i yoramentu. I Dios a skuch'É pasobra El a someté su mes na Dios.

⁸ Ounke E tabata Yu di Dios, El a siña pa medio di tur loke El a sufri, kiko ta obediensia.

⁹ Ora El a logra su meta, El a bira kousa di salbashon eterno pa esnan ku ta obedes'É,

¹⁰ i Dios a nombr'É pa ta gransaserdote na mesun manera ku Melkisedèk.

Atvertensia kontra regreso na piká

¹¹ Nos tin hopi kos di bisa di e asuntu akí, pero e ta difísil pa splika, komo boso ta mashá pokopoko pa komprondé algu.

¹² Entretantu boso mester a siña otro hende kaba, pero boso mes mester di enseñansa atrobe den e promé prinsipionan di mensahe di Dios. Boso tin mester di lechi na lugá di kuminda sólido.

¹³ Hende ku ta biba di lechi ainda, no tin idea di loke ta hustu, pasobra e mes ta un bebi ainda.

¹⁴ Kuminda sólido ta pa hende grandi; pa medio di eksperensia nan sentidonan ta itrein pa distinguí entre bon ku malu.