Hakobo 4 - Papiamentu Bible 2013

Amistat ku mundu

¹ Di unda tur e pleitamentu i bringamentu ku otro ta bini? No ta di boso mal deseonan, ku ta lucha den boso paden?

² Boso ta deseá algu ma no por hañ'é, p'esei boso ta kla pa mata; boso ta envidiá loke un hende tin ma boso no por hañ'é, p'esei boso ta bringa i pleita. Boso no ta haña nada, pasobra boso no ta pidi Dios.

³ Te na ora boso pidiÉ mes, boso no ta haña tòg, pasobra boso ta pidi ku mal intenshon: boso ke dispidí loke boso haña pa satisfasé boso mal deseonan!

⁴ Hendenan infiel! Boso no sa ku amistat ku mundu ta nifiká enemistat ku Dios? Esun ku ke bira amigu di mundu ta bira enemigu di Dios!

⁵ Boso ta kere ku ta por nada Skritura ta bisa: ‘Dios ke e spiritu ku El a pone den nos p'E so’?

⁶ Pero Dios ta bondadoso i ta duna nos hopi mas, manera Skritura ta bisa: ‘Dios ta resistí esnan orguyoso, pero E ta duna esnan humilde grasia.’

⁷ P'esei someté boso na Dios; resistí diabel i lo e hui bai for di boso.

⁸ Hala serka Dios i E lo hala serka boso. Boso, pekadó, laba boso man; boso ku ke stima Dios i mundu pareu, purifiká boso kurason.

⁹ Rekonosé kon mizerabel boso ta, yora i lamentá; yora na lugá di hari i bira tristu na lugá di ta kontentu.

¹⁰ Humiliá boso den bista di Señor i lo E alsa boso.

No husga bo ruman

¹¹ Rumannan, no papia malu di otro. Esun ku papia malu di su ruman òf husg'é ta papia malu di Lei i ta husga Lei. I si abo ta husga Lei en bes di obedes'é, bo ta hasi bo mes hues riba dje!

¹² Ta Dios so a duna Lei i E ta e úniko Hues; E so por salba i E so por destruí. Awor abo, ta ken bo ta kere bo ta pa kondená bo próhimo?

No broma

¹³ Anto boso ku ta bisa: ‘Awe òf mañan nos lo biaha bai tal i tal siudat; nos lo keda un aña, hasi negoshi i gana plaka,’ tende akí!

¹⁴ Boso no sa mes kiko lo sosodé mañan. Boso bida ta manera neblina ku t'ei pa un tempu i djis despues ta somentá!

¹⁵ Mihó bisa: ‘Si ta Dios su boluntat, nos lo ta na bida i hasi esaki òf esaya!’

¹⁶ Pero awor boso ta broma ku boso mes ideanan di grandesa; e bromamentu ei ta robes!

¹⁷ Si un hende sa kiko ta bon pa hasi, ma ta keda sin hasié, e ta hasi piká.