Hakobo 2 - Papiamentu Bible 2013

Tene kuidou ku diskriminashon

¹ Mi rumannan, boso ku tin fe den nos glorioso Señor Hesu-Kristu no mester diskriminá hende.

² Suponé ku un hende riku ku dede tur na renchi di oro i ku paña karu na su kurpa bishitá boso reunion i un hende pober ku paña mizerabel tambe bini.

³ Anto boso ta faboresé e hende bon bistí i bis'é: ‘Tuma e asiento di honor akí,’ pero e hende pober boso ta bisa: ‘Abo keda pará ei banda òf sinta akibou na mi pia.’

⁴ Ta diskriminá boso ta diskriminá otro i boso motibunan pa balorá hende ta robes.

⁵ Mi rumannan stimá, skucha mi! Dios a skohe hende pober riba e mundu akí pa ta riku den fe i tuma parti na e reino ku El a primintí esnan ku ta stim'É.

⁶ Pero boso ta menospresiá hende pober! No ta hende riku ta oprimí boso i lastra boso hiba dilanti hues?

⁷ No ta nan ta blasfemá e nòmber presioso ku a invoká riba boso?

⁸ Boso ta hasi bon, si di bèrdat boso atené boso na e lei supremo ku nos ta haña den Skritura, esta e Lei ku ta bisa: ‘Stima bo próhimo manera bo ta stima bo mes.’

⁹ Pero si boso diskriminá hende, boso ta kometé piká i Lei ta kondená boso komo violadó di Lei.

¹⁰ Pasobra ken ku aten'é na henter Lei, pero faya ku djis ún mandamentu so ta resultá kulpabel di a faya ku tur e otro mandamentunan.

¹¹ Ta e mesun Dios ku a bisa: ‘No kometé adulterio’ a bisa tambe ‘No mata’! Ke men ku te na ora bo no a kometé adulterio, pero bo a mata hende, tòg bo ta un violadó di Lei.

¹² Papia i aktua manera hende ku lo ta husgá pa e lei ku ta hasi nos liber.

¹³ Pues Dios lo no mustra mizerikòrdia, ora E husga esun ku no tabatin mizerikòrdia ku otro hende, pero esun ku sí tabatin mizerikòrdia lo sali viktorioso na momento di huisio.

Fe i obra

¹⁴ Mi rumannan, ki bal un hende bisa: ‘Mi tin fe’ i su obranan no ta demostrá esei? Akaso e fe ei por salb'é di huisio?

¹⁵ Suponé ku tin un ruman sin paña drechi pa bisti ni sufisiente kuminda pa kome.

¹⁶ Ki bal un di boso bis'é: ‘Te aworó! Tur kos bon! Kòrda tapa pa bo no kohe bientu i bon apetit,’ si bo no yud'é den su nesesidat?

¹⁷ Asina fe tambe ta morto riba su mes, si e no ta kompañá pa obra!

¹⁸ Pero awor un hende por bisa: ‘Abo tin fe i ami tin obra!’ Anto ami lo kontest'é: ‘Mustra mi kon un hende por tin fe sin obra i ami lo mustra bo mi fe dor di mi obranan.’

¹⁹ Bo ta kere ku ta un Dios so tin? Ta bon ku bo ta kere esei, pero asta e demoñonan ta kere esei i nan ta tembla di miedu!

²⁰ Hende bobo! Ta mira bo no ke mira ku fe sin obra no tin balor?

²¹ Dios a aseptá nos antepasado Abraham komo hustu pa loke el a hasi: el a pone Isak riba altá pa sakrifik'é.

²² Bo por mira ku obra tabata kompañá i perfekshoná su fe.

²³ Anto e Skritura akí a keda kumplí: ‘Abraham a konfia Dios i p'esei Dios a konsider'é un hende hustu.’ I yama Abraham amigu di Dios.

²⁴ Boso ta mira antó ku Dios ta aseptá nos komo hustu pa loke nos ta hasi i no djis pasobra nos tin fe.

²⁵ Esei tambe a pasa ku e prostituta Rahab. Dios a asept'é komo hustu pa loke el a hasi, esta mustra hospitalidat na e spiònnan israelita i yuda nan skapa via di un otro ruta.

²⁶ Ke men anto, meskos ku un kurpa ta morto si e no tin rosea, asina fe ta morto si e no ta kompañá pa obranan.