Génesis 40 - Papiamentu Bible 2013

Jozef ta splika dos soño

¹ Despues a sosodé ku e sirbidó di biña i e panadero di rei di Egipto a traishoná nan shon.

² Fárao tabata mashá rabiá ku su dos trahadónan, esta ku hefe di e sirbidónan di biña i ku hefe di e panaderonan.

³ El a laga sera nan den e mes prizòn ku Jozef tabata, den edifisio di e hefe di su guardia personal.

⁴ E hefe di guardia personal a duna Jozef enkargo pa sòru pa nan i nan a keda algun tempu será.

⁵ Un anochi e dos prezunan, esta e sirbidó di biña i e panadero, a soña i kada soño tabatin su mes nifikashon.

⁶ Mainta ora Jozef a pasa serka nan, el a ripará ku nan tabata mashá preokupá.

⁷ P'esei el a puntra nan: ‘Di kon boso kara ta tristu asina awe?’

⁸ ‘Nos a soña i no tin ningun hende ku por splika nos e soñonan,’ nan a kontestá. ‘Ta Dios so por duna e splikashon,’ Jozef a bisa. ‘Konta mi antó kiko boso a soña.’

⁹ E ora ei e hefe di e sirbidónan di biña a konta Jozef su soño: ‘Den mi soño mi a weta un mata di wendrùif

¹⁰ ku tres ranka. E no a kaba di bona i floria ku e flornan a bira tròshi di wendrùif hechu.

¹¹ Mi tabatin kopa di fárao den mi man. Mi a kohe e wendrùifnan, primi e djus den e kopa i duna fárao.’

¹² Jozef a bis'é: ‘Ata splikashon di bo soño: e tres rankanan ta tres dia. Denter di tres dia

¹³ fárao ta revisá bo kaso; bo ta haña bo puesto bèk i lo bo sirbi fárao biña manera tabata bo kustumber.

¹⁴ Dia ta bai bo bon atrobe kòrda riba mi; i sea asina bon di hasi un palabra serka fárao pa e saka mi for di e lugá akí.

¹⁵ Promé nan a sekuestrá mi for di pais di e hebreonan; i aki tampoko mi no a hasi nada malu pa mi ta será.’

¹⁶ Ora e hefe di e panaderonan a tende ku Jozef a duna un splikashon faborabel, el a bis'é: ‘Ami a soña ku mi tabatin tres makutu di pan riba mi kabes.

¹⁷ Den e makutu di mas ariba tabatin tur sorto di bolo fini pa fárao, pero para a kome tur kos for di e makutu riba mi kabes.’

¹⁸ Jozef a kontest'é: ‘Ata splikashon di bo soño: e tres makutunan ke men tres dia.

¹⁹ Denter di tres dia fárao ta revisá bo kaso; e ta laga horka bo i para lo kome bo karni.’

²⁰ Tres dia despues fárao a hasi aña i el a pone un komementu grandi pa tur su funshonarionan. Durante e komementu fárao a laga saka e hefe di sirbidó di biña i e hefe di panadero for di prizòn.

²¹ E sirbidó di biña a haña su puesto bèk i por a sirbi fárao biña manera ántes.

²² Pero el a laga horka e panadero. A sosodé manera Jozef a splika.

²³ Pero e sirbidó di biña no a kòrda mas riba Jozef; el a lubidá riba dje.